شال ءَ دوبر ترا بہ گنداتاں – مھــروز بلوچ

شال ءَ دوبر ترا بہ گنداتاں

مھــروز بلوچ

دی بلوچستان پوسٹ

لکّی ….
لکمیـر ھم منی سرگوست ءِ بھرے جوڑ بوت اے اولی رند ات کہ من آئی ءَ را دیستگ ات ءُ آئی ءِ شیــدائی جوڑ بوتاں کہ آ وتن دیوانگ ءَ کمے ساھتاں من ءَ وتی شیدائی جوڑ کُت، مئے ھنکین جنرل باڈی بوَگ ءَ ات چہ بنجائی باسکانی نیمگ ءَ مئے جنرل باڈی ءِ بھر زورگ ءِ ھاتر ءَ مئے وش بھت ات کہ لکّی دیم دیگ بوت تاکے مئے رھدربری ءَ بہ کنت، ما چہ آئی ءَ چیزے دربہ بر اِیں.
چونایا من وتی بالاد ءَ سیاسی رھشوناں گوں کم نند ءُ نیاد بوتگ آں، بلے ھما کسے ءِ گون ءَ کہ منی ھال اھوال ءُ گند نندے بوتگ ات، بلے من انکس آیانی شیدائی نبوتگ آں چوش کہ من لکّی دیست ءُ آئی شیدائی بوتاں، بچکنداں گوں من ءَ سرپدی دیان ات انچوش سما بوت کہ اے مئے اولی رند نہ اِنت بلکن ءَ چہ کسانی ءَ مئے گون ءَ ھمگرنچ بوتگ، ھمے چیزیں ساھتاں من آئی ءَ را ھنچوش سرپد بوتاں دل ءَ نہ گُشت کہ آئی ءَ یلہ بکن. آئی ءَ وتی ھنکین ءَ بدار ءُ تاکہ مئے ھنکین ءَ را گیش سرپدی بدنت، اے روچ ءَ ما آئی ءَ را چیئرمین سرپد بوت اِیں ھمے ماریت کہ اگاں کامریڈ مئے ڈبہ ءَ بزوریت من نا بلکیں مئے ھنکین ھمے سرپد بیت کہ چئیرمین واتر اتکگ، چار کلاک ءَ گوں ما ھمدیوان بوت بلے اے چاریں کلاک چار دمان اِت اَنت …..

من ءَ وتی لیڈر شپ ءَ بازینیں دوست ات ھما کس کہ من دیستگ ات یا ھما کہ من ءَ آیانی گُشتانک آیانی پگر ءُ لیکہ من ءَ دوست بوتگ تاں آ ھما کس کہ مروچی من ءَ واجو ءَ بزاں (ڈاکٹر اللہ نزر) ءَ وتی…. وتی ناں بلکہ راج ءِ من پیگمبر سرپد باں بلے آئی ءَ ھم منی اندر ءَ انکس جلدی جاہ نکُتگ کہ لکی ءَ جاہ کُتگ. اے کمے ساھت ءَ آئی ءَ منی اندر جاہ کُرت منی وڑیں نابزانتیں ھمے کمے ساھتاں گوں ھمگرنچی ءَ آ وڑ ءَ نبشتہ کُرت نہ کنت کہ آ وڑ یک کلمکار ءُ زانتکارے کہ آئی ءَ ھر لبز لبز ءَ تشری بہ کنت ءُ بہ نبیس ایت، منی اے نزوریں زانت ءُ کلم ءَ آ بستار نیست کہ یک کلمکار شاہ زانتے ءِ بیت. منی اے کمیں ساھتاں کہ من گوں لکی ھم دیوان اَت ت
آں من ءَ ھمے گمان بوت کہ من تھنا لکی ناں ، بلکن ءَ سرجمیں لیڈر شپ ءَ گوں ھم دیوان آں ھو ھماھانی دانکاں من چہ لکی زبان اش کنگ ءَ آں ءُ ھما دانک انت کہ لکّی رھشونی کُرتگ ات ءُ لکّی منی رھشونی کنگ انت .

چوش کہ چئیرمین ءِ سنگت شھید ڈاکٹر منان بہ بیت یا زاھد پگر جوھر بہ بیت آ ھم مئے ھلک آھتگ تاں من آھاں گوں ھم دیوان بوتگ تاں بلے اے ساھت ءَ کہ من گوں لکّی ھم دیوان تاں ھمے سما کُرت کہ آھانی دیوان من بس ھما دیستگ تاں بلے لکی ءِ دیوان ءَ من سرجمیں لیڈر شپ وتی کِرّ ءَ سما کُت انت گُش ئے من ھمایانی میان نشتگ ءُ آیان ءَ گوشدارگ تاں آئی ءَ ھر دانک ءَ ھمے گمان بوت کہ تھنا لکمیر نہ انت آئی ءِ بچکنداں من ءَ زاھد ءُ زاکر گندگ آتک انت آئی ءَ ھر دانک ءَ مناں چئیرمین گلام مھمد گندگ ات.

آئی زانت ءُ زنشت ءِ من باز ھب دار بوتاں منی لوٹ ات کہ من گوں اے وتن دیوانگ ءَ ھر کجا ھمراہ بہ باں، ھر کجا بُرواں گوں اے ھنچیں وتن دیوانگ ات کہ یک دید ءَ وت ءَ منی اندر ءَ جاہ دات. وسواس بوت کہ پرچاکہ ھمے دیوانگ ءَ پیش ھمگرنچ نبوتگ انت ءُ ھچ در نبرتگ.

پرچاکہ منی ھند ءَ چئیرمین ءَ پد چوشیں وتن دیوانگ ودی نہ بوتگ . بوت کنت کہ ودی بوتگ ءُ گوں من دچار نہ کپتگ اَنت کہ من آھاں ھمگرنچ بباں ءُ چیزے درببراں، بلے استیں وھد ءَ من لکّی ءِ وڑیں کامریڈ وتی ھند ءَ ندیستگ کہ من آئی ءَ لکّی ءِ شاھیم ءَ تور بکناں ..

جنرل باڈی ءَ پد آھاں چہ ما موکل گپت واتر بوت اَنت. من ھم چہ گس ءَ دراتک ءُ دیم پہ بازار ءَ….. دیر نگوستگ ات کہ من دیست لکی واتر پیداک انت ، ھال پُرسی کُت آئی ءَ گوں بچکنداں جواب دات
کہ دگ لشکر ءَ بستگ پمیشا ما واتر بوتگ اِیں دگہ نیمگے ءَ در کائیں. من گُشت بے وھد انت شپ ءَ بدار اِت ءُ آئی ءَ منی گپ سرجم نہ اشت درئینت ئِے مارا دیم ءَ جنزگی انت کہ باز کار پش کپتگ دومی ھنکیناں رؤگی انت ، وتی کار سرجم کنگی اَنت جاور مدامی است انت.

آئیءِ ھمے دانکاں وتن دوستی زاھر ات آئی ءِ اے ھیال نیست ات کہ جاور نگیگ انت باریں دومی ھنکیناں رؤگ بیت یا ناں آئی ءَ ھمے ڈک داتگ ات کہ کار اوشت آماچ مہ بنت مروچی کار باند ءِ اوست یلہ دئیگی نہ انت، ھمچو گوں گل ءَ گوں وتی کاز مکلس ات آئی ءَ ریاست ءِ ھچ چیز دیم ءَ نہ اتک کہ من گرگ بوت کناں گار کنگ باں، آئی ءِ پگر بس ھمیش ات کہ کار کنگی انت کار دیم برگی انت پہ وتن لوٹ کنگی انت …….

من آئی ءِ بچکند چارت ءُ گُشت وھدے کہ واتر بئے الّم مارا ھال بکن دیوان بدے پدا وتی ھنکین واتر بہ بو آئی ءِ پسّہ ترینت واتر پدا اے کشک نہ باں بلے گوں شما الم دگہ دیوان دئیں …
بلے ……. بلے پدا ھما انت کہ ما دچار نہ کپتیں،
کامریڈ زوت واتر کن کہ مارا تئی وڑیں وتن دیوانگ ءِ پکار انت، زوت واتر بات ئے
شال ءَ مئے ءُ تئی دوبر دیوان بات