زرپھازیں پدائی شھید منصب کریم
نبشتہ کار: سرباز وفا
دی بلوچستان پوسٹ
وانگ ءُ زانگ ءَ تہنا مردم چہ وانگجاہ ءَ در نہ بارت،بلکیں چہ وتی کش ءُ پھناتاں نشتگیں مردم، چاگرد ءُ جاور ھالاں بازیں زانت ءُ سرپدی در بارت۔ بلے مردم وتی تہ ءَ دربرگ ءِ جھد ءَ بکنت تاں آ گوں وتی لوٹ ءُ واھشتاں ایماندار بہ بیت، گڑا الّم مرادانی منزل ءَ سر بیت ءُ ابدمانیں انسانانی رماں ھوار کپیت۔
شھیدانی کرد ءِ سر ءَ نبشتہ کنگ پہ منی وڑیں نابزانتیں نبشتہ کار ءِ واست ءَ سک گراں اِنت بلے راجی شھیدانی یک ھنچیں دردے کہ مردم لاچار بیت کہ چیزے نبشتہ بکنت اگاں منی لبزانی تہ ءَ نزوری بوت تاں من ءَ پھل بہ کن اِت، بگند ئے منی زانت ءِ تہ ءَ چشیں لبز نیست کہ پہ شھیدے ءِ کرد ءَ انساپ بکنت۔بلے کل شھید بلوچ راج ءِ زندمان ءِ چراگ اَنت آھانی داتگیں دیمونی پہ راجی آجوئی ءِ رھشونی ءَ کن اَنت۔
چہ ھمے بلوچ راجی شھیداں یکے منصب کریم اِنت کہ آئی ءِ جھد مارا ءُ تیوگیں بلوچ راج ءَ پہ بلوچ راجی آجوئی ءِ ھاتر ءَ یک کوھیں ھاٹیگے شکسائیت۔ شھید منسب کریم گریشگ ءَ داردان ءِ جاہ منند اِنت، آئی ءِ پت ءِ نام داد رحمٰن اِنت، واجہ داد رحمٰن یک نزور ءُ بزگیں مردمے بوتگ، شھید منصب کریم ءِ ودی بوگ ءَ چہ پد کماش واجہ داد رحمٰن چہ وتی نادرسی ءَ منصب جان ءَ وانینت کُت نہ کنت وھدیکہ بلوچ راجی جنز شریں وڑے ءَ دیم ءَ کیت تاں منصب کریم وتی راجی ایردستی ءَ ماریت گڑا دو ھزار سیزدہ ( 2013) ءَ بی ایل ایپ ءِ باسک بیت۔بلوچ راجی آجوئی ءِ جھُد ءَ ھوار بیت۔
من ءَ یات اِنت دوھزار پازدہ ( 2015 ) اَت من گون شھید منصب کریم ءَ گند ءُ نند کتگ اَت۔ھمے دیوان ءِ تہ ءَ ھمک سنگت وتی زانت ءِ کساس ءَ گپ کنگ ءَ اِت اَنت، شھید منصب کریم ھمے گشت کہ سنگتاں ،،من نا وانندگے آں بلے من ھمے سرپد باں اے ھک ءُ راستی ءِ جُہد اِنت۔ دُژمن ستر زورآور اِنت بلے اے ھک ءُ راستی ءِ جُہد ءَ سوب بلوچ راجی جنز ءِ شھیدانی دیمونیانی بیت۔بگند تاں گڈی ءَ ھمک وت ءَ برجم داشت مہ کنت بلے اے کاروان وتی مِنزل ءَ الّم سر بیت،،۔
تاں من جست کرت کریم جان تو آجوئی ءِ جھد ءِ درگت ءَ سنگتاں سرپدی بدئے کہ سنگت چہ سنگت ءَ چیزے در بارت۔ تو بلوچ ءِ راجی جُنز ءَ انوں کجام ھدّ ءَ گندگ ءَ ئے، اے بابت ءَ تو چے گش ئے،اے ھاتر ءَ چے گشت کن ئے ؟
شھید ءَ یکبرے کمو بچکندت اِت ئِے ءُ پد ءَ بے توار بوت، تاں ھدے ءَ من پُرس اِت کریم جان تو بچکند اِت ءُ پد ءَ بے توار بوت ئے؟
گڑا شھید ءَ ھمے گشت کہ اے دیوان ءِ تہ ءَ شریں وانندہ ءُ سرپدیں سنگت نشتگ اَنت من پمیشکہ ھچ گُشت نہ کناں۔،،بلے چُش کہ من مدام چہ راجی رھشون ءُ کواسیں سنگتاں اِش کُرتگ کہ چیر جنگی دُژمن ءَ چو شومک ءِ نادراھی ءَ چہ تہ ءَ وارت ءُ توام کنت،،۔
ھمے وڑ ءَ وھد روان اَت دوھزار ھژدہ ( 2018 ) ءَ وھدے شھید ریھان جان پدائی کرت چہ شھید ریھان جان ءِ شھیدی ءَ پد من گون شھید منصب کریم ڈیک وارت تاں اے وھد ءَ شھید منصب کریم گوں من شر درستی اَت گپ ءُ مسکرائی کرت من گشت ھاں کریم جان تو ھالاں بدے بلوچ ءِ جنگ کجا سر بوتگ؟
بچکندان ءَ پسّو ئِے ،دات نوں گپ نہ بیت بلوچ ءِ جنگ پدائی ءَ سر اِنت ءُ بازینے ءَ وتی دیم سیاہ کرت ءَ دُژمن ءِ دیم ءَ سِلاہ اِش دور دات اَنت۔راجی جُنزانی تہ ءَ چُش بیت کہ مردم دمبر اَنت،باز پہ درمُلکاں درک بیت ءُ باز دُژمن ءِ دیم ءَ سراں جھل کن اَنت۔بلےبلوچ راجی جُنز انگت سنٹ نہ اِنت،اے جُنز ءَ ریھان جان اوں رودینتگ ءُ ھزاراں دگہ ریھان ھم ھست اِنت کہ پہ سرڈگار ءِ آجوئی ءَ چہ سراں سر گوْز اَنت،چین ءُ پاکستان اے گپ ءَ الم پوہ بنت کہ بلوچ راجی سرمچار چون کہ بہ بیت وتی سرڈگار ءَ پہ وشیں دلے ءَ کس ءَ را نہ بکش ءَ اَنت،،۔
وھدء کراچی ءَ چینی کارگس ( دفتر ) ءِ سر ءَ بی ایل اے مجید برگیڈ ءَ اُرش کرت منی گون شھید منصب کریم ءَ ھال ءُ اھوال ھستگ اَت گڑا من ھال کرت کریم جان چون گند ئے بلوچ ءِ جنگ ءَ شھید ءَ پد ءَ ھندگے جت ءُ گشت ئِے ،،بس بلوچ ءَ نوں پدائی اُرش کنگی اِنت،مَرگ المی اِنت۔بلے مارا انچیں مَرگے ءَ مِرگی اِنت کہ دُژمن ءِ ھپت پُشت ءِ دُگنیا یات بہ کنت کہ بلوچ ءَ گوں جنگ کنگ ارزان نہ اِنت،بلوچ وتی سرڈگار ءِ پھازگ ءَ توامیں ھَدّاں سر گوز کنت۔بلوچ چہ مَرگ ءَ نہ تُرسیت۔
شھید منصب کریم ءِ بابت ءَ من چنچو کہ نبشتہ بکناں تاں ھچ نہ اَنت۔پرچاکہ شھید ءِ داتگیں دیمونی وت کسہ کنت۔شھید ءَ مدام گوں سنگتاں گشتگ کہ پاکستان ءُ چین ءِ شھرگ انوں گوادر اِنت ءُ گوادر ءَ انچیں کاری کنگی اِنت کہ دُژمن سرین پروش بہ بیت۔اگاں شھید منصب وانندگے نہ اَت بلے بلوچ راجی جُنز ءُ دُژمن ءِ بازیں نزوریاں پوہ اَت۔ بلوچ رھشونانی گشتن ھمیش اِنت کہ وتا ءُ وتی راج ءِ بزگی ءَ ھوار دژمن ءِ رپکانی زانگ الّمی اِنت۔راج ءِ بزگیاں مارئے تاں زندگ مان ئے ِ،دُژمن ءِ رپکاں سرپد بئےتاں آئی ءَ پروش دات کن ئے۔زانت ھمیشی ءَ گُش اَنت ءُ شھید منصب جان چہ زانت ءَ چکار اَت۔
11 سوچکان ( مئی ) دوھزار نوزدہ ( 2019 ) اَت منی سر ءَ سنگتے ءَ اکسے دیم دات من اِت داں چار سنگت اَنت یکے منصب کریم انت۔ من جست کرت سنگت ھالاں بدے باریں؟
سنگت ءَ گشت کہ مرچی گوادر ءَ پی سی ھوٹل ءِ سر ءَ اُرش ( حملہ ) بوئگ ءَ اِنت ھمے چاریں سنگتاں پی سی ھوٹل ءِ سر ءَ اُرش اِش کرتگ ءُ جنگ بندات اِنت۔تاں منی چم ارس بوت اَنت۔دل ءِ تہ ءَ من پہ اجکہ گشت کریم جان تو وتی بے تواری ءِ تہ ءَ چنچو مھکم اَت ئے۔بلے تو وت ءَ ھمے وڑ داشتگ اَت ترا کس سرپد نہ بوت ،من ءَ تئی ھما ھبر یات اَنت کہ تو گشتگ اَت،،چین ءِ کمزور کنوکیں جاہ گوادر اِنت کمیں رند تر ءَ بی ایل اے بیان اھت کہ منی مجید برگیڈ ءِ پدائی ھمل پتھ،اسد بلوچ،کچکول بلوچ منصب کریم ءَ مرچی زرپھاز آپریشن کنگ ءَ اَنت۔زرپھازیں پدائیاں سرجمیں دگنیا ءَ را سر ءَ زُرتگ اَت.
زانت شھیدانی دیمونی دگنیا ءِ دیم ءَ پدر اِنت شھید منسب کریم چہ وتی نیک نیتی ءُ ایمانداری ءَ پدائی زرپھاز ءِ نام ءَ زانگ بیت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
