پوسائیڈن
(جرمن ادب آن)
نوشت: فرانز کافکا
مٹ: عتیق آسکوہ بلوچ
پوسائیڈن تینا ڈیسک آ تولوک حساب کتاب کننگ ئس۔ تیوہ غا سمندر آتا بست و بند اوڑ کن ہچبر ایسر نہ مروکو کاریم اس مسوسُس۔ او تینکن اخس کمکار خوائوس دوئی کننگ کریکہ، اونا بھازا کمکار آک ئسرہ ہم ولے دنکہ او تینا ذمہ واری تا بابت بھاز خیالداری تخاکہ اندا سوب آن او تیوی آ حساب دائے تے اسیکہ وا تینٹ کریکہ۔ دا وڑ اوننگے تو اونا کمکار آک اودے زیات فائدہ تننگ ہلورہ۔
دا پاننگ مفک کہ اودے تینا کاریم آن خوشی مسکہ۔ او دا کاریم ءِ بیرہ دا سوب آن کریکہ کہ اودے دا تننگاسُس۔ او بھاز وار اندن انگا کاریم تیکن خواست کریسس کہ ہرافتے او تینکن زیات خوش سرپد مسکہ ولے اودے ہراتم کاریم نا بابت صلہ تننگاکہ تو اندا ہیت مونا بسکا کہ اودے او کاریم اوخس دوست بتو اخس کہ اونا ساڑی آ کاریم ءِـ
دا بھاز سخت ہم ئس کہ اوڑکن پین کاریم اس پٹنگے، اودے بیرہ اسہ خاص سمندر ئسے نا ذمہ وار کننگ ہم متوکہ، دا ہیت آن بیدس کہ دنو کاریمس کننگ کم ہم آخہ بلکن اسل چنکو کاریمس مسکہ۔ عظیم پوسائیڈن کن تو دا الّمی ئس کہ او بیرہ اسہ گچینوں اوغدہ ئسے آ مرے۔
اگہ اودے دِیر آن مُر اسہ کاریم ئسے نا پاننگوس تو اونا بابت ٹک خلنگ تون اونا طب خراب مسکہ۔ اونا دیوتائی دَم پناکہ و اونا جِک آ سینہ زوت شیف سُریسہ کریکہ۔ او وختا اونا شکائست ءِ ہم کس جوانی تون بنتوکہ۔ ہراتم بھاز طاقتورو ہستی اس تکلیف ئٹ مرے و وڑ و ڈَول اسل ناامیت کروک اس مرے واہم اوڑکن سوگوی نشان تننگ الّمی مریک۔ کس اس ایشکامی تون دا ٹَک ءِ خلتوسس کہ پوسائیڈن ءِ واقعی اونا ذمہ واری تیان دُو خلاس کننگے۔ اودے اول سر آن سمندر آتا دیوتا کننگاسُس و الّمی اندن مُستی مروئی ئس۔
او تیوہ غاتیان زیات سوختہ دا ہیت آ مسکہ و اندا ہیت اودے اونا اوغدہ آن اِربشی کننگ نا تیوہ غان بھلا سوب ئس کہ وارس اودے دا ہم بنوئی تماکہ کہ مخلوق اونا بابت انت انت پائک. مثیال داکہ امر او تینا ترشول تون اوار دریاب نا چُلک آتو ہر ساعت سفر اٹ مریک۔ حالانکہ او ہمیش جہانی سمندر نا کڑمبی ٹی تولوک برجا حساب کتاب کریسہ کریکہ۔ وار وار او جوپیٹر تون اوڑدئی کن سفر آ پیشن مسکہ و اندا اونا تنیائی آن مُری نا اسٹ آ وقفہ مسکہ۔ اندا ہمو سفر مسکہ ہراڑ آن واپسی آ او زیات تر سوختہ تو بسکہ۔
دا وڑ پوسائیڈن سمندر تو کم و وَد خنتویسُس، اندن زی زی آن سمندر ئِ خناکہ ہراتم او اشتاف تون اولمپس مَش نا زی آ لگنگ آ مسکہ و دا سمندر آتا مرغنو سفر گواچنی او اسل کتویسس۔ اودے تو دا پاننگ نا عادت ئس کہ “ہراڑکن کن کسر اُروک ئس، او جہان نا ایسری ئس۔” دوارہ بلکن دُنو چُھپو ساعت نصیب مروس ہراتم ایسری آن دیخہ در مالو و تینا حساب کتاب آ گڈیکو چمشانک ءِ شاغنگ آن گڈ وہ ترندی تون اسہ سیل ئس کروس۔
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان میڈیا نیٹ ورک نا دا ہیت آتے مننگ الّمی اَف و نئے کن دا ادارہ نا پالیسی تا درشانی ءِ کیک۔
