“هم ءَ ساوؔڑ شُمارا یات بیت؟ “
نبشتہ کار : ماهل بلوچ
دی بلوچستان پوسٹ
نا کہ شپ جلّیت ناکہ روچ بس هما نام جلّ اَنت ءُ ابدمان بنّت کہ پہ لیکہ ءُ راجی باندات ءِ هاتِر ءَ وت ءَ کربان کن اَنت ۔۔ زمین بے مٹّیں مڈی یے کہ ایشی بدل دگہ هِچ دَری دیار بوت نہ کنّت ءُ زمین ءِ مِہر بُنکی مِہرے کہ هرکسّی دِل ءِ تہ ءَ چہ ابرم ءَ هست اِنت ۔ چوناها گُش اَنت کہ اگاں ترا گوں چیزے ءَ مِہر بہ بیت تو آئی رکینگ ئِے هاتِرا وت را هم کُربان کنگ ءَ چَک ءُ پد نہ بئے وتی ساه ءَ چہ سرگوز ئے آئی پهازگ ءَ پہ همے داب ءَ اِے نوجوان ءَ هَم وتی ساه دات۔۔۔۔۔
پہ وتی مکہیں زمین ءِ پہازگ ءَ وتی تنگوئیں ساه ءَ چہ سرگوستگ ۔پہ دائمی راج ءِ دِلانی تها وت ءَ را چوں کندیل ءَ بالینتگ من شُمارا هنچیں ورنایے بارو ءَ سرپد کنگ لوٹ آں کہ پہ وتی هاک ءَ دیوانگ بوت ءَ پہ گُلزمین ءَ زروک بوت ءَ آ شهید سراج پَنام ءِ ساوڑ بلوچ ءَزانگ بیت ۔۔
ساوڑ 1990ء واجہ پزل ءِ گِس ءَ کولواه ،آواران ءَ ودی بوتگ ، ساوڑ جان بے دروریں سنگتے بوتگ آ بلوچ نودربر گَل آزات (بی ایس او آزاد)ءِآواران هنکین ءِ یک سرپد ءُ کامریڈیں سنگتے بوتگ
2008 ءَ ساوڑ جان ءَ وتی وانگ بزاد لد ءِ وانگجاه ءَ بندات کُتگ پدا 2010 آ پہ گیشتر وانگ ءِ هاتِرا مالار ءَ روت وتی نُہمی تَبَک(class) ءِ چکاس ءَ سوبمند بیت۔ دیم ترا ونت کُرت نہ کنت پاکستان ءُ آئی کاسگ چٹیں پوج ءِ سوب ءَ۔۔
2011 ساوڑ جان آواران هنکین ءِ کارمستر جوڑ کنگ بوت .شهید ساوڑ جان یک وشتَب ءُ مھروانیں مردُمے اَت آئی مُدام گوں بِچکند آں مردُم وش اَتک کُتگ اَنت هرکّس را ھندگ ءِ سوگاتے بکشات آ وهد ءَکہ ساوڑ شهید کنگ بیت آ سکّ کسان بیت۔۔
نوں جیڑه اِش اِنت کہ یک چُکے ءِ زِندگ بوهگ پہ پاکستان ءَ جنجالی یے کہ آ چُک ءِ پِگر ءَ ولگوج کنگ ءِ هاتِرا آ وڑ وڑیں پندل سازیت کہ من چے پیم ءَ ایشی ءِ دِل ءَ چہ آجوئی ءِ شہزانتی ءَ دَر بکناں ءُ آ منی ھاکمی ءِ تھارگ ءِ وڑالاں بہ بیت .
ساوڑ یک جْوان ءُ دلیریں سنگتے بوتگ آئی مُدام وتی کلم ءُ کتاب ءِ زور ءَ دُژمن ءَ شیکست دیگ ءِ جُھد ءَ اَت ۔ کواس گُشت اگاں تو یک راجی یے پروش دیگ لوٹ ئے تو درُستاں چہ پیسر آئی پدریچ ءَ هلاس بکن کہ آئی اوست اِنت آ مُدام وتی راج ءِ باندات بابت ءَ جیڑہ اِیت ۔
ساوڑ ءِ بارو ءَ هرچی بہ نویس آں انگت ءَ کم اِنت آ یک دیوانگ ءُ ملنگے اَت پہ زمین ءَ شیدا اَت کہ مرگے همباز اِت بلّے پاکستان ءِ گُلامی یے نہ منّ اِت کُل درچک ءُ دار ساوڑ ءِ گِسر بوھگ ءَ موتکی اَنت .ساوڑ جان ءَ وتی زِند ءِ سرجمیں وهد ءُ پاس گوں آشوبی چِست ءُ ایراں گوازینت مُدام گوں هما کاراں گُلائیش اَت کہ راج ءَ را نپ اِش دات پہ راج ءِ وشیں باندات ءِ هاتِر ءَ مُدام جُهد ءَ اَت آ چو کوه ءَ مُهکم اَت ۔ ساوڑ پہ بلوچستان ءِ آشوب ءِ جُنز ءَ یک مِسالے اَت ساوڑ ءِ مٹ ءُ مُل هر هما بچّ ءُ جِنّک اِنت کہ پہ وتی ڈیہ ءَ جہد ءَ اِنت پہ ڈیہ رکینگ ءِ هاتِر ءَ وتی وس ءُ واک ءَ چیزے کنگ ءَ اِنت .
23 سوچکان (مئی) 2017ء ءِ هما سیاه ءُ تهاریں روچ اِنت کہ بلوچستان ءُ پہ کولواه ءِ سنگت ءُ بیلّ باھڑیں باسک ساوڑ اَچ ما گِستا بوت ءُ پہ وتی ڈیہ ءَ سالونک بوت هون ریتک اَنت کولواہ ءِ دِلبند ءَ کُش ءِ وشبوُ ءَ آتار اَنت۔۔
هو ! هون ءِ وشبو هما بوُ اِنت۔۔۔کہ ھؤر ءِ اولی ترمپ کہ زمین ءِ دلبند ءَ کپ ایت ھما بوُ مردم پُرتاھیر کنت ۔ پدا ھک ءِ ریتکگیں هون کہ پہ زمین ریتکگ هما هون کہ آجوئی مستاگ ءَ دنت اِے وشبوُ ھمیش اِنت
(ساوڑ ءِ جِتائی ءَ بلوچستان ارسیگ اِنت شال پُرسیگ اِنت کیچ ءَ جنوزامی سیہ ایں پوشاک پوشتگ اَنت کولواه ءِ کپوت نالنت ءُ تئ نام ءَ گِراں مُھرانی کلات پرُشتگ اَنت ، کوه ءِ مُراد چو مرید ءَ تئ لوٹوک اِنت اَلبُرز کپتگ چہ وتی بالاد ءَ خاران ءِ همُک سرگوْپ نازینیت ترا ءُ ماتی سِپتاں جنّت کہ تئ مَٹ ءَ دوبر پیداک کناں واتر بکن ءُ همنپس بے ترا ما ابیتکیں ).۔۔۔
پاکستان یک مردُمے کُشت کنّت بلے پِگر ءُ لیکہ آ هِچبر کُشت نہ کنّت ءُ ساوڑ یک پِگرے همُکیں بلوچی پُسگے مروچی ساوڑ اِنت ءُ ما درُست ساوڑ ءِ پِگرے منوک اَنت .
ساوڑ ءَ پاکستان نہ منّیت ءُ آئی گُلامی کنگ ءُ وت ءَ را باجو نہ کُرتے آ را گُشگ بوت کہ پاکستان ءَ بہ منّ اگاں نا ما ترا شھید کن ایں۔ بابا کازیؔ گُشیت ۔۔
“هما کہ آھاں گوں گُلزمینءَ دگا نہ کُرتگ هما شھید اَنت”
ساوڑ هم همے شهیداں گوں هوار اِنت کہ وت ءَ را کُربان ئے کُت بلّے گُلامی یے نہ منّ اِت .
بائد اِنت مروچی کُل بلوچ ساوڑ دْروشُم ءَ بہ بنت ءُ ما را ساوڑ ءِ هما سرامدیں کار کہ ساوڑ ءَ سرجم کُرت نہ کُت ھمائی ما سرجم بکن اِیں اے مئے راجی ڈبا یے ، هما ساوڑ ءِ پِگر ءُ لیکہ ءَ دیما بہ بر ایں دُژمن ءَ پروش دیاں بہ بَہ ایں روان بہ بہَ اِیں پہ وتی گُلزمین ءَ
یک برے پدا جُست کنگ لوٹ آں هما ساوڑ شُمار یات بیت “نوں اُمیت کناں شُمارا یات بیت ”
تئ شپ نکاه ئے اتکگ ءُ مئے زِندگی نہ جلّ ایت تو سرپد ئے اُو بانڈی سراج گوں وتی (ماکج) مُھبت ءَ موال بوتگ بلّے گنوکیں ساوڑے پہ گُلزمین ءَ آشک اَت تو واهگانی کِلّہ پہ دابے سمبئینتگ تئ دست ءُ پاداں دزگُهاراں پہ دابے هِنیّ رَجنّت تئ مهپراں زباد مالنت کوه ءُ کهچر آں تَچنّت بهاری ساهتاں بلّے سِراج گون نہ بیت …..
ساوڑ جان تو نمیران ئے تو اَبدمان ئے
“داں شائِرے شئِرے گُشیت تو زندگ ئے”
“داں کوچّگاں آسے بلیت تو زندگ ئے”
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
