شہید کامریڈ فدا بلوچ
نوشت: محمد عمران لہڑی
دی بلوچستان پوسٹ
عظیم ہمو قوم آک مریرہ ہرا قوم تیٹی عظیم ءُ لیڈر ودی مریک. قوم ہمو تما دنیا ٹی تینا اسے جتا پن، نشان ئس جوڑ کیک ہرا وخت آ تینا اندا عظیم آ راہشون آتا پاروکا قول و نشان تروکا کسر اٹ کارہ. اسے حقیقی او لیڈر ئس قوم ئے شونداری نا پارہ غا دیک. اونا فعل و قوم، زند نا ہر جہد ڈیہہ، قوم و بولی نا سوگوئی کن مریک. اگہ اونا سیاست اٹ مفاد ئس ارے تو ہمو مفاد قوم نا شونداری نا مریک. سہی انگا لیڈر ہچ بر تینا ذاتی فائدہ کن گام خلپک بلکہ او ہر وخت، ہر ساعت تینے اسے زندہ ءُ قوم سینا لیڈر مننگ نا خاطر آن قوم ءِ زند نا حقیقی مسخت و دنیا ٹی زندہ سلنگ نا فلسفہ غان بلد کیک.
بلوچ قوم جہان ٹی اسے بخت والا قوم ئسے ہراٹی شہید کامریڈ فدا کونو لیڈر ودی مسونے. اینو اگہ بلوچ خوانندہ غاک تینا قومی ذمہ واری و جوزہ غان واخف ءُ تو اوٹی اسے بهلو کڑد ئس کامریڈ فدا بلوچ نا ہم ارے. شہید فدا بلوچ ورناتے سیوت نا سبخ تس. اودے معلوم ئس کہ جتائی ٹی بلوچ قوم ہچ تینا ڈیہی بولی و ثقافت ءِ سوگو کننگ کپک بلکہ سیوت و اسٹی ٹی قوم نا شونداری ڈکهوک ءِ کامریڈ فدا بلوچ ورنا تیٹی سیوت، جہد آخری فتح اسکان نا فلسفہ ءِ تالان کرے. سیوت و اسٹی ٹی طاغت، برکت ارے. جہان نا قوضہ گیر سامراج آتا اندا کوشست مسونے کہ اسے قوم سے محکوم کننگ کن اول اوتا نیام آن سیوت ءِ ایسر کر….. اوتے جتا جتا گل آتیٹی بشخہ. دا برطانیہ سامراج نا ڈول ئس Divide and role، قوم ءِ جتا جتا قبیلہ غاتیٹی بشخہ و اونا زی آ حکمرانی کر. شہید کامریڈ فدا بلوچ بلوچ نا تاریخ اٹ سیوت نا چیدہ ئس جوڑ مسونے. بلوچ خوانندہ غاتے سیوت و جہد نا درس تس.
بی ایس او نا تاریخ اٹ دا نوشت ءِ کہ بلوچ قوم اٹ گڑاس مفاد پرست ورنا تے بشخ و بانٹ کریر ولے کامریڈ فدا کونا لیڈر بی ایس او ءِ اسے جا کرے. اوتے سیوت اٹ جہد کننگ نا درس ءِ تس. اینو جہان ٹی بی ایس او نا اسے جتاؤ تاریخ ئسے، دانا مثال جہان ٹی بهاز کم ملیک، بی ایس او نا جہد و ورنا تا راہشونی ٹی کامریڈ فدا بلوچ نا جہد، فکر، سوچ و نظریہ ہمیشہ بلوچ قوم نا خوانندہ غاتا راہشونی ءِ کیک.
یخیناً بندغ تینا کڑد و بسُن انگا قول آتا سوب آن جہان ٹی زندہ سلیک. شہید فدا بلوچ اینو آن سی و یک (31) سال مست یعنی 2 فروری 1988ء اٹ بلوچ دشمن آتا دو آن شہادت نا مقام ئے دوئی کرے ولے اونا ہمو فکر، سوچ داسکان بلوچ ورنا تا سوچ آتیٹی اوڑدہ ئے، اوتا راہشونی ئے کننگ ءِ.
اینو بلوچ قوم نا خوانندہ غاک جہان نا اڑوجنجال آتیٹی اگہ تینا اندا لیڈر آتے است آن دریر گڑا بلکن بروکا وخت اٹ دا قوم ءِ غلامی و محکومی آن کس بچفنگ کپرو ءِ. اینو ننے دا اروئی ءِ کہ بلوچ قوم نا اخس ورنا تینا لیڈر شہید فدا بلوچ نا کڑد، قول و فعل آن واقف ءُ، اخس ورنا فدا بلوچ نا فکر ءِ دوئی کریسہ شعور تالان کننگ ءُ، بی ایس او نا باسک آک اینو بلوچ قوم نا ورنا تے اندا راہشون و لیڈر آتا کڑد آن واخف کیر. بی ایس او نا چراغ ءِ بلوچ قوم نا لیڈر آک تینا دتر تیٹی روشنائی کرینو. شہید کامریڈ فدا بلوچ، شہید حمید بلوچ، مجید بلوچ، اسلم بلوچ و پین کئی ورنا لیڈر آک بلوچ قوم ءِ اسے روشن ءُ بروکو وخت اسینا فلسفہ ءِ تریسہ قوم نا شونداری و جہان ٹی اسے جتا ءُ قوم ئس مننگ نا درس و جہد ہمت ءِ بلوچ ورنا تے تسر. او تینا کڑد آن ہمیشہ کن زندہ سلیسر.
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان میڈیا نیٹ ورک نا دا ہیت آتے مننگ الّمی اَف و نئے کن دا ادارہ نا پالیسی تا درشانی ءِ کیک۔
