بیست ءُ ہشت مئی 1998 ءَ پد ھر روچ مارا یاد پِرّین اِیت
نبشتانک: بابا جی آر بلوچ
دی بلوچستان پوسٹ
دنیا ءِ تہا سرجمیں راج وتی سر ءَ بوتگیں زُلم ءُ زوراکیانی ءُ سیاہ ءُ تہاریں روچاں دار اَنت ءُ ما بلوچ هم وتی سر ءَ بوتگیں زُلم ءُ زوراکیانی ءُ سیاھیں روچانی بستار ءَ یاد کن ایں، آ بِرٹش سامراج ءِ اِیردستی بہ بیت یا بِرٹش سامراج ءِ جوڑ کتگیں مُلک پاکستان ءِ ایردستی ءِ داستان بہ بنت…!!
وھدیکہ پاکستان نوک جوڑ بیت ءُ مئے سر ءَ ھم سیاہ ءُ تہاریں جمبر مانشان اَنت ءُ مئے سر زمین پہ بلوچ راج ءَ نَز آرگ بیت ءُ مئے سر ءَ زالمانی زلم ءُ زوراکی ھما روچ ءَ بِنا بنت کہ پاکستان مئے سر ءَ کوزہ کنت ءُ مئے ڈیھ ءِ نرمزار ھان آگا ابدلکریم ھم پد نہ کنز اِیت آ ھم پہ بلوچ راج ءَ جُنز ءِ بُن ھِشت ءَ ایر کنت ءُ وت واجھی ءِ جھد ءَ بِنا کنت ءُ وتی سر ءَ پہ ڈیھ ءَ ندر کنت ءُ ھمے وڑ ءَ مئے سر ءَ زوراک ءِ ھُنر ءُ ھیلہ گیش بواں بنت…!!!””
او وھد کنزان بیت مئے سر ءَ تہاری گیشتر مانشاناں بنت ءُ مئے سرزمین ءُ بلوچ سر ڈگار پہ راج ءَ گیشتِر تنگ آرگ بیت ءُ وھد نوزدہ سد ءُ پنجاہ ءُ ھشت ءَ سر بیت ءُ مئے سرزمین ءِ پھازگ ءِ واستا دگہ یک ملمزارے چو نواب نوروز ھان ءِ پیم ءَ ودی بیت ءُ راج ءِ سرا بوتگیں زلم ءَ مار اِیت ءُ دیم پہ کوہ ءَ رھادگ بیت ءُ چیزے وھد ءَ دشمن ءَ گوں جنگ دنت ءُ دشمن پہ رپک و ہُنر قرآن ءِ سوگند ءَ کوہ ءَ چہ ایر گیج اِیت ئِے ءُ پد ءَ زندان ءَ بند کنت ئِے تا آہی سنگت پدا پاھو دیگ بنت و آ تاں عمبر ءِ گڈی روچاں بندیگ بیت…!!!
او پدا واجہ ھیر بکش ءُ جنرل شیرو جنز ءَ بندات کن اَنت ءُ ھپتاد ءُ دو ءَ پد، پدا اے کاروان نرمی ءِ آماچ بیت ءُ دژمن نی سوب کنت ءُ دژمن ءِ تہ ءَ یک کدیر ھان ءِ ودی بیت ءُ زہریں شورو جوڑ کنت ءُ بمباں مئے سرزمین راسکوہ ءِ دلبند ءَ چکاس اِیت ءُ چو سیاہ گوات ءَ ءُ اشکر ءَ مئے زمین ءَ سیاہ دیم کنت ءُ پیلّوش اِیت ءُ مئے دمگ ءِ درچک ءُ داراں چو سیاہ دار ءَ ھُشک کنت ءُ راسکوہ ءِ کش ءُ گوْر ءِ بلوچ زھگ ءُ زالبولاں نادراھی وتی امبازاں کنت ءُ وڑ وڑیں نادراہ جوڑ کنت لھتیں شومک ءُ لھتیں گِرمپوک نادراھی ءِ آماچ بیت لھتیں دگہ دگہ……..!!!
اے زمانگ 28 مئی 1998 ءِ نیم روچ ءِ ساھت ءِ 3:16 ءَ چہ پد بندات بیت ءُ پہ بلوچ راج ءَ اے ھما شُمیں ساھت اَت کہ اے ساھت ءَ بلوچ ءِ ایردستی وتی جاہ ءَ بلوچ ءِ دلبند ءَ زھر ءُ تھلیں شورواں گوں تَل دیگ بیت ءُ اے ایٹم بمب پہ آیوکیں وھد ءَ چو کسھے ءِ دروشم ءَ مان اِیت….!!!
بلے راستی ایش اِنت کہ 28 مئی 1998 بگر تا روچ مروچی من ءَ ھر روچ سیاہ ءُ تھاریں روچانی یات ءَ پِرین اِیت ءُ اے روچ ءَ پَد ھر روچ مئے واستا یوم ءِ آس روک اِنت…
بلوچ ءُ بلوچستان سر سبز ءُ میزران بات….
دی بلوچستان پوسٹ: اس مضمون میں پیش کیئے گئے خیالات اور آراء لکھاری کے ذاتی ہیں، ضروری نہیں ان سے دی بلوچستان پوسٹ میڈیا نیٹورک متفق ہے یا یہ خیالات ادارے کے پالیسیوں کا اظہار ہیں۔
