ناکو گزّی – بھار زھری

ناکو گزّی

نبشتہ کار: بھار زھری

دی بلوچستان پوسٹ

من کُلندری ءِ ساھَگ ءَ نشتگ ءُ ربّڑانی بندوکاں ٹیٹ کنگ ءَ اِتاں درنگیب ءَ چے جِنگُلے اتک ءُ کُنر ءِ جھلیں شاھے ءِ سر ءَ نِشت.
من گُشت شکار ھمیشیں ربّڑ ءَ ڈوکے مان کت بسم اللہ کش اِت چَپّیں چم نَز کت جِنگُل ءَ پِرداشت ءُ جت اڑے کمو بَچ ات گِندئے ھمے شا دیم ءَ مبوتیں….

گّزُک ءَ چہ کاپر ءِ چیر ءَ توار دات بَچ ءَ چونیں ترا واجہ گزیر ءَ ووٹ نہ دئے مدئے سنگ ءِ وَ مجن. مئے بازار ءِ واجہ اِنت، شمئے جیڑھاں گیشین اِیت. اے گزیر مرچی گزُّک کاپر ءِ چیر ءَ چوں اتکگ من جیڑاں بوتاں شتاں دیم پہ کاپر ءَ واجہ گزیر بلکیں سِنگ ترا لگ اِتگ، پَھِل کن، من وَ جِنگُلے ءَ را جتگ، زاناں سر کش اتگ.

گزیر ءِ اسپیتیں کاٹناں سورَگ بستگ ءَ۔ من ءَ پہ نا دلکشّی جست ئِے کت کہ تو کئی چُک ئے؟ گزّک پاگ ءَ پیچ دیان ءَ گُشت ئِے، اے گونڈو ھیبتان ءِ چُک اِنت، ھیبتان ء شمبے. گزیر ءِ دل تُشے اوں وش نبوت ءُ گشت ئِے، ھَو ھَو ھیبوک ءَ وَ کمبھت ءَ پجار کارت ءِ جند ءِ نیست.

گڑا گزّک تو چہ من بے ھیال مبو، من انو رواں گزُّک ءَ تَچک ءَ گُشت واجہ ترا ھُدا بے ھیال مکن۔

مئے گریبانی گِزدپ پہ ھرکس ءَ پچ انت بَلے چہ من ووٹ ءِ امیت ءَ مہ کَش ھاں شَنکے ڈنگرے دار ءُ کرزے ءِ کار بیت نپرے رادئے ووٹ من کس ءَ دات نہ کناں .
گزیر ءَ دیم تھار کت راہ گِپت.

من گُشت گَزّک! نگھبتیں مرد تئی چُک ھوتُک بند اِنت، تو بُگشتیں ترا ووٹ دئے آں، بِلّے ھوتک در کناھینتگ اَت.گزّک وتی رِشّ ءُ بروتاں سماران ءَ گُشت ئِے منی چُک اے رند ءَ ھُوتک سک شُدیک بوتگ پمیشکہ لشکر جتگ ءُ پُل اتگ ئِے ءُ من زاناں اگاں ھوتک دربئیت، پد ءَ لشکر ءَ جَنت ءُ پُلیت، پد ءَ وت ءَ گراھین اِیت. من درانچ ءَ گزیر ءِ پاداں بہ کپاں شھیدیں چُک ءُ نماسگانی دیم ءَ منی چم جھل بنت، اگاں ھوتک ءِ جند سرپد بہ بیت دار چینیں گزُک ءَ پہ ھوتک ءِ درکناھینگ ءَ گزیر ءَ ووٹ داتگ وتی ترک اتگیں لنکک سیاھی جتگ انت، آ گنتر دلگران بیت.

من نو پیر آں سری وت ءَ بھا کت نہ کناں. ھرچی ھُدا ءَ آؤرتگ.

منی دپ پَچ اَت، ھیران اِتاں ،منی چمّانی دیم ءَ مئے بازار ءِ گریب تِریں مردم، درتہ پُچیں گزّک چہ میر گزیر ءَ مھکم تِر اَت. چہ ھمے روچ ءَ پد منی دل ءَ گُشت گزّک ءَ نو مُدام ناکو گزّی بگش.