شھید ماسٹر ازگر جان تو نمیران ئےِ – بابا جی آر بلوچ

شھید ماسٹر ازگر جان تو نمیران ئےِ

نبشتہ کار:- بابا جی آر بلوچ

دی بلوچستان پوسٹ

شھید ازگر جان تئی زند پہ من ءَ سرجمیں کتابے من ءَ مروچی ھمے گُمان بُوَگ ءَ اِنت گُش ئے من ءُ تو پد ءَ ھم دیوان ءُ ھم مجلس ایں۔ ھما مَچانی بُن ءِ ساھِگ، ھما جھل بیگاھانی وھد ءَ گَز ءِ بُن ءِ نندگ ، تئی کندگ ءُ ٹھک، جُگر ءِ شیپ ءِ گْراستگیں زپتیں چاہ ، نھنگ ءِ لمب ءِ دْرستیں یات انگت دل ءِ سر ءَ نکش اَنت۔

ما شما کلیں ھمبل کہ کُور ءِ گِیپتگیں ماھیگ روت کُرت اَنت ءُ پتک اَنت ءُ روچ ءَ وتی راہ ءِ سے بھر جتگ ات ءُ گُڈّی بھر ءَ چو کہ کاسد ءَ پہ گُشادی ءُ زیتّ کُٹّینَگ ءِ جھد ءَ اَت ءُ روچ ءِ سوچوکیں برانزانی آسناکیں لِوار ءَ سر پہ ایر بیگاہ ءِ سارتی ءَ داتگ اَت ءُ روچ ءِ برانز کم بیت ءُ وھد شپ ءِ نزیک ءَ رست ءُ تھاری ءَ مانشانت، ھر دیم ءَ چار اِت گْوش ئے شپ ءِ لُنج اِنت۔۔بلے مئے دیوان بیمناکیں شپ ءَ ھم برجاہ اِت اَنت ءُ مئے ھال گوں شھید ماسٹر اسگر داد ءَ بُوگ ءَ ات ءُ شھید ءَ دْراھینت شما چو اوں زان اِت پاکستانی لشکر شپانی وھد چو جاتوئیں سھدار ءَ دور کنت ءُ جَنگ ءُ پْروشگ، سوچگ ءُ مال ءُ مڈیانی پُلگ ءَ ھچ مھتل نہ بیت.

سنگتے ءَ چہ شھید ءَ جُست گپت کہ مئے گناہ ءُ میار چی اِنت کہ پاکستانی لشکر مئے مدام گساں دْور کنت ءُ مارا لَٹ ءُ شاپ کنت ءُ بار ت؟

شھید ماسٹر اسگر داد ءَ پسّو دات ءُ گُشت ئےِ ما یک سرڈگارے ءِ واھْند اِیں ءُ مئے سرڈگار چہ اچما پُلگ بیتگ، ما ھمے وتی سرڈگار ءِ پَچ گِرگ ءِ واستا جھد کنگ ءَ اِیں ءُ ما سیر ءُ ازگاریں ڈگارے ءِ ھدابندیں بلے ما مرچی چو پنڈوک ءَ شدیک ءُ دِرتہ پُچ اِیں، بے لوگ ءُ جاگہ اِیں۔

کمے ھاموشی ءَ رند پد ءَ دْراھینت ئےِ سرڈگار، زبان، دود ءُ ربیدگ راجانی پجّار اَنت. اے دْرست مارا چہ پُلگ بیتگ اَنت۔ مئے ڈیھ دْری راجانی کرّ ءَ لیلام ءَ بھا کنگ بیتگ.ما نیلیں زِرے ءِ ھدابندیں، بلے ھما زِر مرچاں چہ مئے دست ءَ روان اِنت.

من جست گِپت ما چون پد ءَ وتی ھک ءَ پَچ گِپت کن اِیں؟

گشت ئےِ جھد، تپاکی، تچ ءُ تاگ وتی سرانی نَدّر کنگ وتی مال ءُ مڈیانی اوں نَدّر کنگ ھمے مارا وتی مِنزل ءَ سر کرت کن اَنت ءُ مئے مِنزل مئے آجوئی اِنت۔!!

من چہ شھید ءَ جُست کرت آجوئی چی ءَ گش اَنت؟

شھید ءَ وتی جلواناکیں دیدگ چِست کُرت اَنت ءُ منی جُست ءِ پسّو یک جْوانیں دْروشمے ءَ دات ءُ گُشت ئےِ آجوئی یک سمبھیتگیں ڈگارے کہ آئی ءِ تہ ءَ ھر پیمیں دْرچک ءُ وشبوئیں پُل کِشّگ بیتگ ،آجوئی یک ھیالےِ کہ آئی ءَ بنزہ است،بَلے آئی ءَ گُڈ سر نیست ءُ آئی ءَ تو ھر داب ءَ ڈولدار کرت کن ئے، ھما وڑ گیش ڈولدار کن ئے ءُ آ گیش جلواہ دنت ۔۔آجوئی ھما اِنت کس ترا لوگ ءَ چہ پاد نہ کنت ءُ تئی چمّاں نہ بند اِیت ءُ ترا گار ءُ بیگواہ نہ کنت۔۔

آجوئی ترا بے لوگ ءُ جاگہ نہ کنت۔۔ شد ءُ درتہ پچ نہ کنت۔۔ تو وتی کل شیانی مالک وت بہ ئے۔۔

آجوئی ءِ بزانت گلامی ءِ مُھر بستگیں سانکل ءُِ زمزیلانی سِندَگ اِنت ۔!!

من ءَ گُشت ئےِ آجوئی راجانی دیمروی ءِ مانزمان اِنت، آجوئی مئے سرجمیں راج ءِ لوٹ اِنت ءُ مئے وشھالی گوں آجوئی ءَ بندوک اِنت ءُ آجوئی مئے زند ءِ مستریں لوٹ اِنت.

شھید انچو گپ کنان اَت من گوشداران اتاں شھید ءِ گپ ءُ تراناں من ءَ دگہ دنیایے ءَ بران اتاں۔۔ منی تہ ءَ زانت ءُ سرپدی ءِ چمگ ردان اَت ءُ کندیلے بلان ات۔۔

من گشت اسگر جان نِی شپ ءَ وتی گیشتریں بھر جتگ دیم پہ بام ءَ جنزگ ءَ اِنت بریں وپس اِیں۔

شھید ءَ دْراھینت ھو زلم ءُ زوراکی ءِ تھاریں شپ ھم جنزان اِنت پہ رژنائیں سباھے ءِ نیمگ ءَ۔۔ بریں وپس اِیں کہ باندا سھب ءَ مھلہ من ءَ پہ کارے ءَ شھر ءَ روگی اِنت۔۔ھمے وڑ ءَ شپ ھلاس بیت ءُ روچ ءِ ٹک ءَ گوں شھید شھر ءَ شت پد ءَ واتر نہ بوت۔

یک تاکشان(دسمبر) 2013 ء َڈی بلوچ کیچ ءَ کْوزہ (کبزہ) کنوکیں لشکر ءِ دست ءَ آوار جَنَگ بوت ءُ یک سالے پنچ ماہ ءُ سیزدہ روچ زندان ءِ ازاب جاہ ءَ بندیگ بیت ءُ پد ءَ 13کرَّا ( اپریل) 2015 ءَ پاکستانی زوراکیں لشکر یک دْروگیں دیم پہ دیمی جنگے ءِ نام ءَ چار پُلگدیں سالونکانی ھمراھی ءَ شھید ئےِ کنت ءُ آئی ءِ ژانگولیں جون ءَ ماں گیبُن ءَ جگل دنت.

شھید اسگر داد ءَ شھید گلام مھمد، شھید لالا منیر، شھید شیر مھمد ءُ ایدگہ شھیدانی رَند پد زُرت اَنت ءُ گوں مھکمیں پگرے ءَ جُنزان اَنت ءُ وت ءَ را راجی شھیدانی لڑ ءَ ھَوار ئےِ کرت.

ھمے روچ چہ شھید ماسٹر اسگر داد ءِ ابدمانیں زند بندات بیت ءُ راج دپتر ءَ وتی نام ئےِ نَکش کَرتگ ءُ تاں جھان است شھید ماسٹر اسگر داد نمیران اِنت ءُ وتی نام ئےِ پہ شھیدی اِیر کُت۔