زانت ءِ چیدگ چیئرمین گُلام مھمد بلوچ
نبشتہ: ھلیل بلوچ
دی بلوچستان پوسٹ
من ھما کندیل ءِ پیم ءَ رُژن بالینتگ وتی
بالواں چاگِرد ءِ چہ من راہ سازینتگ وتی
شہید گلام مھمد بلوچ
زمین زندگیں راجانی نشانیگ اِنت۔ بلوچ راج بلوچ سرزمین ءِ وارس اِنت ءُ اے سرزمین ءِ پہازگ ءِ ھاترا منی راج ءِ ھیسی ایں سر نْدر بوتگ اَنت۔
بلوچ سرزمین ھر وھد زوراکانی چمّانی چیر ءَ بوتگ، ھر وھد ءَ زوراکانی ھمے جہد بوتگ کہ آ بلوچستان ءَ راج بکنت۔ ایشی ءِ مزنیں سَوَب بلوچ سرزمین ءِ چیریں مڈّی، بلوچ ءِ زِر (کہ تیوگیں سال ءَ آپ یے گرم اِنت ءُ کاروبار ءِ ھاترا تیوگیں سال ءَ کارآمد اِنت) ءُ بلوچستان ءِ ڈیموگرافک ءُ جغرافیائی ارزشت بوتگ۔ بلے بلوچ راج ھر وھد زوراکانی ھلاپ ءَ اوشتاتگ۔
ھمے وڑ ءَ پاکستان ءِ کبزہ ءِ ھلاپ ءَ ھم بلوچ ءَ جہد کُتگ ءُ بلوچ ءِ نرمزاریں چُکّاں وتی سر داتگ ءُ دَیگ ءَ اَنت، بلے پاکستان ءِ گُلامی اِش قبول نہ کُرتگ۔ پہ بلوچ راج ءُ بلوچ ڈیھ ءَ نْدر بوتگیں سرمچنڈانی لڑ سکّ دْراج اِنت کہ ایشی تہا ڈاکٹر، ماسٹر، پروفیسر، نودربر، سیاسی کارکن ءُ کیڈرانی ھواری ءَ منی راج ءِ رھشون ھم ھوار اَنت۔
مروچی 9 اپریل اِنت ءُ مُرگاپ ءِ شہیدانی دہمی برسی اِنت۔ مرچی ءَ چہ دہ سال پیش 3 اپریل 2009 ءَ پاکستان ءِ چیریں ادارہ آں چیرمین گلام مھمد ءَ گوں لالامنیر ءُ شیر مھمد ءِ ھواری ءَ چہ تربت ءَ آوار جت ءُ 9 اپریل 2009 ءَ شہید یے کُت اَنت ءُ مُرگاپ ءَ لاش ئِے دَور دات اَنت۔
راجی رھشون، رُژن ءِ کندیل، زانت ءِ چیدگ منی پارٹی بی این ایم ءِ بانی سرکماش واجہ گلام مھمد ءِ کِرد پہ بلوچ راج ءَ چو کوہ ء البُرز ئیگ ءَ مِک اِنت۔ شہید چیئرمین گلام مھمد پہ بلوچ راج ءَ ھما ھستی بوتگ کہ آئی ءَ بلوچ ءِ درد پَھم اِتگ، بلوچ ءِ بُنی جیڑہ ءَ سرپد بوتگ ءُ آئی ءَ بلوچ راجی جُنز ءَ را پارٹی دْروشمے بکشاتگ۔
منی چُشیں بِستارے نہ اِنت کہ من شہید چیرمین گلام مھمد ءِ کِرد ءَ کیل ءُ کساس بہ کن آں بلے تھنا ھمنچو سرپد آں کہ چیرمین گلام مھمد ءِ وڑیں رھشون پدا مشکل اِنت اے دَیار ءَ ودی بہ بیت۔
شہید گلام مھمد ءِ پگر چو رُژنائیں استالے ءَ پدّر اَت ءُ پدّر اِنت۔ ھما وھداں کہ ریاست ءِ تھنک ٹینک بلوچ راجی جُنز ءِ کاؤنٹر کنگ ءِ ھاترا پندل سازگ ءَ اِت اَنت، ھما وھد ءَ چیرمین گلام مھمد بلوچستان ءِ ھر کُنڈ ءَ ھر میتگ ءُ بازار ءَ پہ ھوشام زدگیں بلوچ راج ءَ ساڑی اَت ءُ وتی راج ءَ زانت ءُ سرپدی دَیگ ءَ اَت۔ آئی ءَ چہ زنگ بستگیں دریگ ءَ بلوچ راج ءِ رُژنائیں باندات ءِ راہ مارا شون دات۔
شہید چیرمین گلام مھمد اے ھم سرپد اَت کہ ریاست مئے راجی جُنز ءَ ھتم کنگ ءِ ھاترا ھر وڑیں سیمسراں چہ گْوزیت، بلے پدا ھم آئی ءَ وتی مھلوک تھنا یلا نہ دات بلوچ مھلوک ءِ تہا آئی ءَ زِند گْوازینت۔ پرچا کہ چیرمین گلام مھمد سرپد اَت کہ مئے مرگ بلوچ راجی جُنز ءَ گیشتر مُھکم ءُ توانا کنت۔ چوکہ چیرمین گلام مھمد یک جاگہہ یے گْوش ایت کہ: “آجوئی ءِ روچ ءِ گِندگ ءِ ھاترا باریں چہ ما کسّے زِندگ بہ مانیت یا مہ مانیت، پرچا کہ ما یک انچیں آسُودگیں باندات یے ءِ نیمگ ءَ رَوَگ ءَ ایں کہ ایشی سوب گوں مئے مَرگ ءَ بندوک اِنت۔”
3 اپریل 2009 ءَ پاکستان ءِ چیریں ادارہ آں بلوچ نیشنل موومنٹ ءِ بانی چیرمین گلام مھمد بلوچ، لالا منیر بلوچ ءُ شیر مھمد بلوچ چہ ایڈوکیٹ کچکول بلوچ ءِ کارگس تُربت ءَ آوار جت ءُ 9 اپریل 2009 ءَ چیرمین گلام مھمد بلوچ، لالا منیر بلوچ ءُ شیر مھمد بلوچ ءِ لاش چہ مُرگاپ ءَ دست کپت اَنت۔
چیرمین گلام مھمد جسمانی چہ ما گِستا بوت بلے آئی ءِ پِگر مُدام بلوچ راج ءُ بلوچ راجی جُنز ءِ رھشونی ءَ کنت۔
نوں اے مئے سرا اِنت کہ ما چنچو چیرمین گلام مھمد ءِ پگر ءِ پاسداری ءَ کنیں ءُ وتی راجی جُنز ءَ چے وڑ دیم ءَ براں کنیں۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
