مزاحمت زند ءِ
’’ای، ہمو ہراکہ جہانی امن ئنا ٹیکی ءِ دوئی کرینٹ، مونجائی تون انداسرپد مریوہ کہ بیدس تشدد آن لاطینی امریکہ نا ویل تاایسری کن پین ہچو کسر اس اَف‘‘۔
جوزے ڈی کاسترو
تیوہ غا تیان الّمی آ سوج دا ودی مریک کہ ادب انت ئسے،ادب نا گچینی انت ئسے دا سوج ہمو سوج آن بھاز جتاءِ کہ ادب ءِ انتس مروئی ءِ یا امر مروئی ءِ۔
بھازا بندغاک ادب ء فارم(ہیّت)تون گنڈرہ بھازاک داٹی معنی و مسخت نا پول ءِ کیرہ اندن بھازا بندہ غاک ادب ءِ ابدیت(ہمیش مروک)نا دروشم اٹ اُریرہ و بھازاک بے توار آ بندغاتا توار مننگ نا عمل ءِ ادب تون گوندرہ ولے دا تیوہ غاتیٹ اسہ گڑاس اسٹ ءِ کہ ادب لاشعور نا تروک ئسے و لاشعور نا ودشت اسہ واقعہ ئسے آن مفک بلکن وخت اونا ودشت ءِ کریسہ کاہک،لاشعور وخت نا سانچہ ٹی تمیسہ کاہک و اندا لاشعور ادب نا تشکیل نا سوب مریسہ تینا درشانی ءِ وارس باگل و آہنگ نا دروشم اٹ کیک وارس نثر اٹ مزاحمت نا چیدہ ئس مریسہ مونا بریک۔ داسہ اگاں دا رِد اٹ مزاحمتی ادب ءِ اوننگے تو بلوچ قوم آ ہرا بے دادی بھاز آ کرن آتیان برجاءِ دا ہمو بیدادی نا مہروانیءِ ہرا نا سوب آن لاشعور اٹ مزاحمتی ادب نا ودشت مننگے اندالا شعور نا حالیت اٹ تینا اظہارِمزاحمت ءِ دڑد و کرب نا دروشم اٹ ،باگل و آہنگ نا دروشم اٹ کننگ ءِ ۔مزاحمت ہمو ہرا محکوم آ بندغ آتے غلامی نا گندہ آ تارمئی تیان کشیسہ بندغی نا آسمان آ سر کے، دڑد ہمو بے وسی نا ہرا ننا خن ملنگ آن صد آ سالاتیان مُست تینا رندآتے رغ رغٹ ہلانے۔ اندا راجی آ دڑد و ڈُکھ آک ہراتم کنا شعور و لاشعور آ تینا خیسُنا شالءِ شاغار تو منہ دڑدی و خیال، منہ ساہ کنوکو چرکاؤ، منہ چہیانٹ، منہ پریات و منہ چلتنی آ ہکّل آتے بولانی آ یخین نا سیخا ٹی دُوی رسینگا۔ بقول ساحر لدھیانوی کہ حادثہ غاتا دروشم اٹ کنے انتس کہ رسینگسہ ءِ تجربہ غاتا دروشم اٹ ای دا تیوی غاتے واپس تننگٹ۔
ای شاعری نا بِناءِ 1997 اٹ کریٹ، شعر دیچا پاننگ کیو کپر تا بس نثری دروشم اٹ منہ پنوکو خیال ئسرہ 2002 اٹ اولیکو وار ڈیہہ ئنا بے وسی تے زبان تروکو اسے مہروان ءُ خواجہ سے آن شاعری نا اولیکوسبخ ءِ ہلکٹ۔سال ہمو ئس کہ بخت ءِ بے بختی تما ای آرمی ٹی ہناٹ2002 آن ہلیس 2010اسکان تانکہ ای آرمی ٹی ئسوٹ شاعری کننگ کتوٹ، خیالاک کنے آن خرکریسر‘و ای تینا جند آن۔2010 اٹ ای عمل نا میدان ئٹ فکری آ سنگت آتو اوار تماٹ تو ہمو خیالاک کہ دم تسوسُرک اسیکہ ولدا کاٹم ارفنگ ءِ بنا کریر ولے دا وار ئسے جتاؤ دروشم اسیٹی جھمر آتو یاری ٹی زلف ،رخسار، یار نا قصہ غاک بے وسی نا دتر تیٹی مین ہلیسہ ڈُب ہلکر،زند ئنا دا جہد ئٹی پندآتا بال اٹ وختس کہ جارات کننگ نا ساعت اس دو بسکہ تو ای شہید امیر الملک ،شہید نثار صباء و منہ پین ہنینو سنگت اسٹ ایلوءِ تینا شئر آتے بنیفنہ اسٹ ایلو نا اصلاح ءِ کرینہ، شہید امیرشاعری نابنماسی آ گڑاتے پُہہ مسکہ وننے پاریسہ کریکہ کاروان مُستی ہنیسہ کرے اوکان گُڈشرفدار آ استاد عمر راہی بلوچ کنا چیچکول ئٹ ہلیسہ کنے عروض ناشیفی برزی تیان بلد کریفے کن کونا گنگ دماغ کے اوناخواری تا سیخا نا خیدآتا گند جہانی آ مسک عنبر و عود آن بھاز برزاءِ۔اندا نُو(9)سال ئنا وخت ئٹ بھاز آ شئرآک خیال ئنا نزوری نا گواچی مسر، بھازاک جلہو تیٹی ہشنگار، بھازاک چکل آتا ہیناری نا بشخ مسر ، اخس کہ سلیسر او نما مون ئٹی ءُ ۔دا شعر آک جتاوخت اٹ جتا آ کیفیت آتیٹ نوشتہ کننگانو، جاء ئس جند ئنا نزوری تیا، جاء ئس دشمن آتا چم بازی ومکر آ تا زی آ ،جاء ئس لکھ مرادآ یارآتا جتائی نا دڑداٹ ،جاء ئس تینا حانل آ وطن نا بالاد ئنا صفت اٹ و جاء ئس رُژنا غا آجوئی نا عشقٹ مَست و گنوکی نا حالیت اٹ،کنا دا بے لغام آ خیالاک شاعری نا پاک آ اصول آتیا اخس دڑیرہ یا دڑپسہ داسہ دا فیصلہ نما دوٹی ءِ۔
شہید علی شیر کرد، شہید ثنا سنگت ،شہید امیر الملک و شہید نثار صبا نا” رخصت اف ” نا کلہو آن ہلیس پھل آ ریحان جان و رازق جان نا ساندہ سلوکا فلسفہ (اوارُن) اسکان ای تینا ٹپی آ گال آ تونمتو بندغی نا معراج ئنا پارہ غا ہنوکا گام آتیٹی ہر ساعت و دَم اوارئسوٹہ، اریٹ و مُستی ہم مروٹ۔
بیرہ نما
مریدؔ
براہوئی زبان نا پنی آ شاعر مرید بلوچ نا کتاب “رخصت اف” دی بلوچستان پوسٹ آ شینک مسونے، کتاب ء خواننگ کن تروکا لنک آ کلک کبو:
رخصت اف – مرید بلوچ
