جلہو
نوشت : مہر میر | مَٹ: عتیق آسکوہ بلوچ
دی بلوچستان پوسٹ
دیگر نا پاس ایسر مننگ ئس، دے راستیکو پارہ نا مَش ئٹ ڈُب ہلیسہ گوہنی پِرا نا پاناد ءِ تارمئی تا کننگ ئس۔ گدان نا مُونا گڑگیس ئٹی ماہ گنج اِرغ بسنگ ئس۔ تافو نا شیف آن پیشن مروکا موڷ بڑزا جِک بش مننگ ئس، شینلو آ بسوکا اِرغ آتا دوست بروکا گند چارمہ کنڈ تالان مننگ ئس۔
بُزگل گدان نا چپ کنڈ ئنا تِکّہ غا خاچوک رومُست کننگ ئس، زہ پال کننگان گڈ لمہ نا تینا ایب کیب اٹ گوازی ٹی مشغول ئس۔ جلال خان گدان نا مُونا تالان آ ٹپّر آ تخوکا بالشت آ ٹیک تروک تولوک ئس، اونا چنکا مار کوہی خان تینا بابا تون گوازی کننگ ئس، بھلا مار سفر خان زرس مالو گوہنی پِرا نا دُون آن دیر ہتنگ آن گڈ گدان نا ایلو پارہ غا تخوکا پاٹ تے گڑگیس نا رہی آ ہتیسہ تخنگ ئس۔ چُپی اس ہر پارہ غا تالان ئس۔۔۔ گدان نا دے ٹِک ئٹ قطبی کنڈا ممائی لوپ، دے ٹک جہندمی پارہ غا نام پِرانا تنک، قطبی دے کہی ہلنگ پارہ غا پیہُن ٹِک نا مَشک ئسر۔ دے ئنا سبک خیسن ہڑسینگوکا روشنائی ڈھڈر نا مَش نا ٹیڑ آتے رخصت کننگ ئسر۔ ہر پارہ چُپی ئٹ میڷک رومست کریرہ گڑا چڑینگ آتا زیبدار آتوار ہر پارہ تالان مسکہ۔
دُرناز توار تس؛ ماہ گنج اِرغ آتے زو اس بس باوہ نا دے تمنگ تون اِرغ کنو، اُرے مس تو غُر ایتو ننے۔ دُرناز بانٹیفر نا رہی آ تولوک خوا آن دیر ارفنگ ئس پارے؛ اِرغ آک بسنگانو، کُننگ نا تیاری مننگے۔
انداڑتون بزگل ئٹ ہربشی ئس تالان مس، میلک دانگ اینگ دُدینگ ءِ بناء کریر۔ بڈو و نراز پنی آ کچک آک غوکنگ آ لگار۔ جلال خان اسہ دَم تون جِک سلیس و ہکّل تس؛ ’’سفر خان ہمت، خرما بزگل ٹی تمانے۔‘‘ جلال خان تینٹ نت شپاد بزگل نا پارہ غا دُدینگا، منہ گام اِننگان گڈ چَک ءِ ہڑسا واپس ہکّل تس دُرناز توفک ءِ زو اس کش۔ دُرناز اسہ دو ئٹ گُد ءِ ہلیسہ گدان نا پارہ غا دُدینگا او وخت اسکان جلال خان ہم گدان آ سرمس۔ توفک گدان نا گندار تون تنگوک ئس۔ جلال خان توفک ءِ ارفے تو دُرناز اونا دوٹی امیل ءِ تس و سفر خان گروک نا ترندی تون مَش آ دُدینگا ئٹ اِننگ ئس، او دوٹی پیرامپ ارفوک خرما تیا جلہو کننگ ئس۔۔۔ جلال خان خنا کہ اسہ خرما اس مَش نا ٹیڑ آن ایمون مننگ ءِ، اوڑا نشان ءِ ہلک و فیر کرے ولے او وخت اسکان خرما ایمون مسوسُس۔۔۔ جلال خان‘ سفر خان ءِ توار خلیسہ: سفر او سفر۔۔۔ خرما تا رندے یلہ کر میڷ تے سنبھال تارمئی مس تو خُلوکا میڷک دُو تفرور، و خرما اوفتیا اسیکہ وا جلہو کرو۔۔۔
جلال خان و سفر ہڑتوماک میڷ تے اسہ جاہ کریسہ گدان نا رہی آ ایسر‘ و حساب کننگے بناء کریر۔ سفر خان پارے بابا ’سیبوز‘ و ’مورک آ کُچین‘ افس۔۔۔ سفر ہمت کہ اندن گمان مننگے خرما ایلو پارہ غان جلہو کریسہ درینے تا، جلال خان پارے۔
جلال خان و مار اوار ایلو پارہ غا نَلی نا مَش نا کنڈا دُدینگار، اسہ گھٹ اسے آن ایمون مننگان گڈ خنار کہ اسہ ہیٹ ئسے نا دِتک و جُون تموک ءِ و ایلو ہیت دیخہ مُر تموک ءِ ہرانا نیمہ آن زیات ءِ خرما کنگوسُس۔ سفر خان پارے بابا دانا مطلب دادے خرما اسٹ اَلو بلکہ زیات ئسر۔ جلال خان کاٹم ءِ آہو ئٹ سریفسہ پارے خرما تا گواچن جلہو ایلو پارہ غان ئس نن سرپد مننگ کتون و او تینا شکار ءِ کریسہ ہنار۔۔۔ ساعت اس دان اینگ اوننگ آن گد جلال خان پارے مار واپس کان۔ سفر خان ہیٹ نا جُون ئنا رہی آ تموک چڑینگ ءِ ارفے و رادہ مسر۔۔۔
ہڑتوماک واپس گدان نا پارہ غا ہننگ ئسر۔ جلال خان کڑمبو سوچ اسیٹی ڈُب ہلنگ آن گڈ سلیس و آسمان اٹ قطب اٹ دے کہی ہلنگوک پارہ غا اُرا۔ سفر خان تینا بابا نا رہی آ سلوک اودے خوڑتی تون اوننگ ئس۔ جلال خان سہیل نا مُد ءِ بھلو وختس مسونے بسونے داسہ ننے مَش تیان شیف پارہ غا لڈ و ہنپ کروئی تمو، داڑے مننگ داسہ بزگل کن جُوان اَف۔۔۔ خرما داسہ ہردے جلہو کرو ہرافتے توننگ ننا وَس اٹ مفرو۔ دا پاریسہ جلال خان سر ہلک۔ منہ گام ہننگ آن گڈ سفر خان تینا باوہ آن سوج کرے؛ بابا مَش تیٹ دائسکان میڷ تا کُننگ کن بہہ و بوچ بھازے، پِر نہ مننگ نا سوب آن پٹ آتیٹ سختیک زیات مرور۔ انت نن خرما تیان میڷ تے رکہنگ کن بست و بند اس کننگ کپنہ؟ خرماک داخہ در طاقتور ءُ؟
جلال خان کوپہ غا شاغوکا توفک ءِ اسہ دو ئٹ سنبھالسہ ایلو دوئٹ لَٹ اس ارفوک مَش آن دڑنگ ئس پارے؛ سفر ، خرما تا دا ہفت دے ئٹ ارٹمیکو جلہو ءِ۔ مالو نا وار اوفک سرسوب متور ولے داوار اوفک اِرا ہیٹ دریر۔ سفر دا ہیت ءِ یات تخس خرما طاقت آن آخہ دانائی تون جلہو کیک، کم طاقت آن گچین وڑ اٹ کاریم ہلنگے چائک، شام نا پاس آ جلہو کیک ہراڑان گڈ نن نا تارمئی زیات مننگ نا سوب اوفتا رند ءِ ہلنگ سخت مریک، جلہو جتا کنڈ آتیان کیک ہراڑان بندغ نا ہزبہ غاک کاریم ءِ یلہ کیرہ، خلق آ جلہو کننگان اونا بیم و رُعب زیات مریک۔۔۔ جلال خان مَش تیا خنتے پیرہ تریسہ ساعت اس اوننگان پد پارے؛ دا سنگلاخ آ مَش تا خاک آن ودی مسونو اوفک، فطرت ہم اوفتیتون کمک کیک، ننا و اوفتا مِڑ تس دا جاگہ نا فطرت ءِ و اوفک دا مَش تا شان ءُ ۔
اوفک خلق ءِ خڑک شاغار۔ گدان تیان منہ گام مُر جلال سلیس و پد آ چَک ہڑسیسہ نلی نا گھٹ ہنا پارہ غا اُریسہ بشخندہ کرے و کڑمبو دَم اس سینہ ٹی چکیسہ پارے؛ ’’و اوفک اینو سرسوبی ءِ ننے آن پلیسہ ہنار۔‘‘
دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان میڈیا نیٹ ورک نا دا ہیت آتے مننگ الّمی اَف و نئے کن دا ادارہ نا پالیسی تا درشانی ءِ کیک۔
