بانُک مھرجان – زِرگْوات بلوچ

بانُک مھرجان

زِرگْوات بلوچ

دی بلوچستان پوسٹ 

اے ھبر نوک نہ اِنت بَلے درد چَکّاریں ھبرے کہ ھرروچ بلوچ ءِ لجّ ءُ ننگ کْوزہ گیریں پاکستانی لشکر ءِ دست ءَ لگتمال بُوّگ ءَ اِنت ۔ زی ھمے ھبر منی دیم ءَ گْوست کہ چہ کسوئی زامُران ءَ پاکستانی لشکر ءَ بانُک مھرجان گوں وتی بْراس ءَ چِست کُتگ ءُ یک شپ ئِے وتی زُوراکی ءُ چہ انسانیت ءَ دَر ناشرکاریانی دیمپان کُتگ پدا دست پْروشتگ ءُ یل داتگ بْراس انگت بیگْواہ اِنت ۔

وھدے اے داب اِیں پاکستانی لشکر ءِ کارپد دیم ءَ کیت گُڑا من پہ جزم گْوش آں مئے راجی رھشُون بِہ جیڑ اَنت کہ مارا پَہ دُژمِن ءِ بگیر ءَ چتؤریں پیش گام ءُ توجیلّ سازینگی اِنت داں دُژمِن ءِ اے رستری کارپد دُگنیا ءِ دیم ءَ آشکار بِہ بنت ءُ پہ بلوچ ءَ گپّے بِہ جنت ۔

اے ھاتر ءَ پمّے رھشُوناں مَستریں توجیلّ وتی تاکت اِنت کہ دُژمِن ءَ چتؤر بے تاھیر کنت داں آ بے سوب بِہ بیت ۔ بَہ کَول ءِ راجی بامرد جنرل اُستاد اسلم بلوچ کہ وتی گوھریں دانکانی تَہءَ گْوش اِیت” چہ چین ءُ پاکستان ءَ رکّگ ءِ ھاتر ءَ گہگیری ءُمزاھمت ءِ تہ ءَ تْرندی ءُ شِدّت آرگ وھد ءِ شرتر ءُ مستریں لوٹ ءُ زلورت اِنت ، چین اور پاکستان سے نمٹنے کےلیے مزاحمت میں شدت وقت کی اہم ضرورت ہے ”

اے راستی یے کہ پاکستان یکبرے پدا ماں بلوچ ءِ سرڈگار ءَ بنگال ءِ دْپتر ءَ ساچگ ءَاِنت داں بلوچ راجی جُنز ءَ پْروش بِہ دئے آں ،بلے بنگالی راج ءِ جُھد ءُ کُربانی ،مُھکمیں پیش بندیانی دیم ءَ لاچار ءُ بے مُزّ بوت ۔

پمشکا پہ بلوچ لیڈر شِپ ءَ اے سکّیں ساھت ءُگْرانیں نوبت ھمے لوٹ ءَ کنگ ءَ اِنت کہ گوں جُھد ءُ کُربانی آں ھَوار مُھکمیں پیش بندی آں دیم ءَ دَرکپگی اِنت داں چارموٹیں دُژمِن ءِ دیم دارگ بِہ بیت ءُ دُگنیا ءَ را وتی لیکّہ ءِ رِد ءَ منّارینگ ءَ سوبین بِہ بَہ اِیں ۔چیاکہ بے واگیں وھد کسّی ودار ءَ نہ کنت ۔پمشکا مارا وت پہ وتی آکبت ءَ مُھکمیں پیش بندی ٹھینگی اِنت داں وھد ءِ ھمبرائی ءَ پشت مہ کپ اِیں ءُ گام پہ دیم ءِ جُنزگ ءَ مھتل مہ بنت۔

اگاں مبادا ما اے ھبر وھد ءِ کوپگاں لڈّ اِت گُڑا دیمتِر ءَ ھزاراں مھرجان چو زرینہ مری۔۔۔۔۔۔۔ھنیپہ بگٹی۔۔۔۔۔۔۔۔۔ماس نورملک ءِ وڑ ءَ گوں وتی کہول ءَ پاکستانی لشکر ءِ درندگیں زُلمانی کھرّیں زِندان ءِ وڈالاں بیت ۔پمشکا پہ بلوچ لیڈر شِپ ءَ روچ پہ روچ چکّاس گیش بُوھان اَنت ، بلے اے کُلانی گیش ءُ گیوار گوں آئی دانش ءُ اِلم ،مُھکمیں پیش بندی ءُ ھم پَتّی ءَھمگرنچ اِنت کہ سر ءَ پہ کُجام دَگ ءَکشّ اِیت۔

ھمے داب ءَ اے ھبر ءَ کُل بلوچ راج بِہ زانت کہ مھرجان تھنا ابدلکریم ءِ جِنکّ نہ اِنت بلکیں سرجمیں بلوچ راج جِنکّ اِنت ۔اگاں ما ھور ءُ یکمُشتی ءَ پاد نیاتکیں گُڑا اے درد چَکّاریں ھبر تھنا اَبدلکریم ءِ گس ءِ پیشگاہ ءَ باھوٹ نہ بیت بلکیں مارا کُلاں مانپائیت ءُ ھمے اَندوھانی دیمپان کنت۔پمشکا بلوچی ءَ گْوش اَنت “آس کہ کپ اِیت تر ءُ ھُشک نہ زانت ۔

گھتر ھمیش اِنت کہ مرچی ما وتی ءُ دُژمِن ءِ پجّار ءَ بِہ زان اِیں داں باندا سر اپسوز ءُ ارمان ءِ دامُن ءَ سرشکُون مہ بیت ۔اے درگت ءَ اَپلاتون ( افلاطون)گْوش اِیت “زھگ چہ تھاری ءَ بُہ تْرس اَنت ھچ وڑیں ھبکّ ئی ءِ نہ اِنت ،بلے رُستگ ءُمزنیں مردم چہ رُژنائی ءَ بُہ تْرس اِیت گُڑا اے ھیرانگی ھبر ئِے بیت ، بچّے اندھیرے سے ڈریں تو کوئی تعجّب نہیں ،لیکن بالغ لوگ روشنی سے ڈرنے لگیں تو یہ حیرت کی بات ہوگی ”

اگاں تو مرچی دُژمِن ءِ بیمّ ءَ تْرس اِت چہ آجوئی ءِ بدل ءَ گُلامی منّ اِت گُڑا بِہ زان کہ پہ ترا ھچ نہ مان اِیت ۔چیاکہ دُژمِن الم تئی سر ءَ زُوراکی کنت داں ترا پہ تْرس ءُ بیمّ بِہ دار اِیت ءُ تئی راجی جُنز ءَ سِرین پْروش بِہ کنت ۔بلے پرانزپینن (فرانزفینن) چوش گْوش اِیت “نوآبادیاتی رھبند ءُ نزام گوں زُلم ءُجبر، زُوراکی ءَ برجم بوتّ ءَ ءُ ھمے وڑ ءَ پہ زُوراکی برجاہ اِنت ، ھمے پئیم پہ آئی ھلاسءُ ھتم کنگ ءَ ھم پسّو گوں زُوراکی ءَ دَیَگی اِنت ۔، نوآبادیاتی نظام تشدد کے ذریعے قائم ہوا اور تشدد کے ذریعے ہی قائم رہا اُس کو ختم بھی صرف جوابی تشدد کے ذریعے کیا جا سکتا ہے”

ھمے وڑ ءَ ہوچی من ھم جْوان گْوش اِیت “سامراج تو مئے دَہ مردم کُش ئے ءُ ما تئی یک مردمے کُش اِیں ۔آکر تو دم برے بلے ما ھلاس نہ بَہ اِیں ۔،سامراج تم ہمارے دس آدمیوں کو قتل کروگے اور ہم آپ کے ایک آدمی قتل کرینگے۔آخر میں آپ تھک جائینگے لیکن ہم ختم نہیں ہونگے”

پمشکا اے ھبر ءَ ھر بلوچ پُسّگ بِہ زانت کہ راج پہ کُشت ءُ کوش نہ، بلکیں پہ سر جھلی ھلاس ،گارءُبیگْواہ بنت۔اے پیسلہ چہ وھد ءِ بدل ءَ مئے دست ءَاِنت ،ما کُجام دَگ ءَ راھی بَہ اِیں وھد مارا ھما نام ءَ دنت ءُ گیر کار ایت ۔گُڑا ما رند ءَ نشتگ ءُ گوھارانی لجّ لِیلّام بیت، پدا اےگپّ بلوچ ءِ راجدپتر ءَ کدی نہ مان اِیت کہ دوداھاں پہ میار جلّی ءَسر باھینتگ اَنت بلے لجّانی پاسپانی کُتگ ۔

یکبرے پدا من گْوش آں وھد ھمیش اِنت رند ءِ اِٹ اڑے ھچ درد ءُ کولنجانی ملم نہ بیت کہ آراپپں زیمّاں بِہ تیمّار اِیت ۔اگاں ما سسّا ءُ سما کُت گُڑا مھرجان اِیں گوھارانی شیشاریں شار درآمدانی دست ءَکدی نہ شِنگ اِیت ، بلکیں پہ مُدامی چہ ایردستی ءِ کبسّ ءَ آجو ءُ ایمنیں زِند ءِ بیٹ سراں شاتمان بَہ اِیں ۔

اَو اگاں !ما انگت چہ وتی ھیش ءُ نوش اِیں زِندمان ءِ پدیانکاں جھل ایر نہ کپت اِیں گُڑا پہ سِتک گْوش آں اے رستر ءِ دست ءَ تھنا یک مھرجان ئِے نہ بیت ،ھزاراں مھرجان پت ءُبْراتانی چم ءِ کلّ ءَ دُژمِن ءِ انگرّیں ھوسّ ءِ آس ءَ سُچّ اِیت ءُ پُر بیت ۔

کئے جھان ءَ را پسّوے نی بِہ دَنت
ما کہ چو گُنگدام ھاموشیں

در لگوش زات ءِ جامگ ءَ ساھؔر
بیا بلوچی ءِ چادر ءَ پوشیں

شاھر:ناکو مراد ساھؔر