شھید گلام مھمد آئی ءِ سنگتانی شھیدی پہ پاکستان ءَ ترندیں شاھمات ءِ بیت۔
اکیل مراد
دی بلوچستان پوسٹ
بامرد زندگ مان اَنت بامردانی نشان جھان ءِ تہ ءَ نَکش بنت لیبیا ءِ مزن نامیں جنگول اُمر مکتار ھژدہ سد ءُ شَشت ءُ دو ءَ جنزور نامی ئیں میتگے آں چَم ءِ پَچ کرتگ اَنت نوزدہ سد ءُ دوازدہ ءَ لیبیا ءَ اٹلی ءِ زورگری ءِ بگیری ءَ جنگ بندات کرتگ بیست سال ءَ داں اُمر مکتار ءَ جنگ داتگ۔
نوزدہ سد ءُ یازدہ ءَ اکتوبر ءِ ماہ ءَ اٹلی ءِ آپی جھاز ءِ لیبیا ءِ زِر ءَ سر بیتگ اَت اٹلی ءِ آپی جھاز ءِ سروک پاراپیلی ءَ لوٹ کرتگ اَت کہ لیبیا ءِ سپاھیگ سلاھاں چگل بہ دئے اَنت اگاں ناں گڑا سرجمیں شھر ءَ ٹوپ ءُ بمبانی آس ءَ جمبور کن آں۔
بَلے لیبیا ءِ جھمننداں شھر ءَ چہ لڈیت بَلے زوراکیں اٹلی ءَ ھر وڑ ءَ اُرش کنگی اَت آئی ءَ سَے روچ ءَ داں ترابلس ءِ سر ءَ بمباری کُرت ءُ آئی ءَ ترابلس گپت چریشی ءَ چہ پد اٹلی ءِ لشکر ءُ اُمر مکتار ءِ داشتگیں جنگولانی جنگ بندات بیت ۔
چیر جنگی ءَ اُمر مکتار سک بَلد اَت ءُ اُمر مکتار ءِ دل ءُ لاپاں پاک تاک مان اَت ءُ چیر جنگی ءِ جنگ کنگ ءَ الکاپ ءَ سوھویں مردے اَت آئی ءَ دمگی ھالرساناں چہ سرپدی ءِ واست ءَ اٹلی ءِ لشکر ءِ بگیری ءَ کارمرد کُرت ۔
آئی ءَ ھروھد ءَ کسان کسانیں ٹولیانی ھمراھی ءَ اُرشکاری کرتگ اَت کمے مردمانی ھمراھی ءَ شپ جنگی ءُ چیر جنگی کرتگ اَت ءُ پد ءَ ھروھد ءَ گار بیتگ اَت ءُ اٹلی ءِ لشکر ءِ چوکی ءُ لشکری کاروانانی سر ءَ اُرشکاری کرتگ اِت ءُ ھال بروکیں ءُ دمگی سیم ءُ تاراں بُران اَت۔
بیست سالی ئیں جد ءُ جھد ءَ پد اُمر مکتار ھپتاد سال ءِ امر ءَ گرگ بیت ءُ نوزدہ سد ءُ سِی ءُ یک ءَ شانزدہ ستمبر ءَ اٹلی ءِ آمدگس ءِ ھکم ءِ پد ءَ پاھو دیگ بیت۔
اگاں راج گار بِیتین ءَ گڑ ءَ مروچی اُمر مکتار ءَ ھوار دنیا ءِ ایندگہ راجی بامرد گار بیتگ اِت اَنت راج پہ مرگ ءُ کشگ ءُ زندانی کنگ ءَ گار ءُ بیگواہ نہ بیت راج ھما وھدی ءَ مِر اَنت ءُ گار بنت کہ آ راج ءِ وتی دیم ءِ پدریچ ءِ سماہ ءَ مہ کنت ۔
مروچی بلوچانی سر ءَ زورگری ءَ ھم کسانیں وھدے نہ اِنت بلوچ ءِ جھد ءَ ھم کسانیں وھدے نہ انت کہ بلوچ جد ءُ جھد سرانی دیمھونیاں دیان اِنت۔
وھدیکہ لشکری بنجلانی سر ءَ اُرش بیت گڑا لشکری بازاراں جاک ءُ سلوات کن اَنت کہ مار ءَ کئے اِنت جنگ ءَ ایں ؟ گڑا ھمے میان ءَ راجی رھشون ءُ بامردیں سر شھید واجہ گلام مھمد کہ زرمبش ءِ تہ ءَ جوانیں کردانی واجہ اِنت دلبند ءَ پیسر کنت ءُ چماں لشکریانی چمانی دیم ءَ کنت ءُ گْوش اِت من شمے چوکی ءِ سر ءَ اُرش کرتگ شمارا اگاں بامردی ءِ ھستیں وتی بامردی ءَ پیشدراھی بہ کن اِت ۔
پاکستان ءِ پلیتیں لشکر زانت کہ گلام مھمد سیاسی مردمے بَلے آئی ءِ بیم چہ سلاہ ءَ دیم ءَ تِر اِنت لشکری ھشکیں دستاں واتر بیتاں شت اَنت پاکستان ءِ پلیتیں لیزگواراں راجی جنز ءِ ھلاس کنگ ءِ ھلاس کنگ ءِ ھاترہ واجہ گلام مھمد گوں سنگتاں شھید کُرت بلوچ راج ءِ دلانی تہ ءَ یک مزنیں درد ءِ ودینت راج پرسیگ بیت بَلے راج ءَ واجہ گلام مھمد ءُ آئی ءِ سنگتانی شھیدی ءِ سر ءَ پُرس ءِ پَتر پَچ نہ کُرت بلکیں واجہ گلام مھمد ءُ آئی ءِ سنگتانی پِکر ءِ چادر زُرت ءُ دیم ءِ روگ بندات کُرت ھنچیں یک آس ءِ پہ پاکستان ءَ چِست بیت پاکستان ءِ سر ءِ ھوش سھورویں پُگانی پئیم ءَ چِست بیت۔
میتگ میتگ واجہ گلام مھمد ءُ آئی ءِ سنگتانی پکری سنگت جوڑ بیان بیت اَنت آیاں کاروان یک ھنچیں کِشکے ءِ واھند کُرت کہ آ کِشک نہ کُٹوکیں کشکے ءِ ھمسپر جوڑینت داں منزلی ءِ اھد کرت ۔
ھمک میتگاں پیر کماش، زالبول، چکانی دپ ءَ بس ھمے لبز ودیتگ اَت کہ پاکستان ءِ چیریں کارداراں گلام مھمد گون سنگتاں شھید کرتگ اے دردیگیں ھبر اَنت کہ ھمک بلوچ ءِ دپ ءَ ھمے لبز ودیتگ آیانی دلانی تہ ءَ پاکستان ءَ یک ھنچیں زھر ءِ ودیتگ کہ آ زھر ھچبر ھلاسی ءِ نام ءَ زانگ ءَ نہ اِنت۔
شھید واجہ ءِ پکری سنگت انگت ءَ نہ پُرشتگ اَنت انگت ءَ ھما کاروان ءِ سنگت اَنت آئی ءِ بندات شھید واجہ ءَ کرتگ مروچی اگاں بلوچ ءِ ڈیھ ءَ سیاست کنگ ارزانی جوڑ نہ بیتگ بَلے شھید واجہ سنگتاں وتی راہ مٹ نہ کرتگ آیاں پاکستان ءِ ترس لگت داتگ، آیاں دیمھونیانی درچ گیش کرتگ اَنت آیاں وتی جند ءِ نَپ دیم ءَ نہ بُرتگ بلکیں راجی کار دیم ءَ بُرتگ اَنت ۔
مروچی پاکستان اے لوٹ ءَ کنگ اِنت کہ بیا اِت منی دیم ءَ وتی سراں جھل بہ کن اِت ءُ پاکستان ءَ ھمگرنچی ءِ جار ءَ بہ جن اِت بامردیں سراں اے لوٹ ھنچش لگت جتگ ءُ پشت ءَ چگل داتگ کہ شھید واجہ گلام مھمد ءَ نہ منّیتگ اَت کجام رھشون ءُ باسک ءِ ھبراں دیم ءَ بیارے کجام سر اِنت پہ راجی جنز ءَ دیمھونی ءَ پشت ءَ گنزیتگ۔
شھید واجہ ءُ آئی ءِ سنگتانی شھیدی پہ پاکستان ءَ ترندیں شاھمات ءِ بیت مروچی ھمے ترندیں شاھمات جھان ءِ کُنڈ کُنڈ ءَ سر اِنت کہ بلوچ آجوئی لوٹگ ءَ ایں بلوچستان ءَ جیڑوے ھست بلوچ راج ءَ پاکستان ءِ سیمسرانی پروشگ ءِ جار پِرینتگ الم بلوچ وتی منزل ءَ وت ءَ رسینیت ءُ راج ءَ نوکیں باندات ءِ کلوہ ءَ دنت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
