بلوچی لبزانکءِ پینل گوں شھید چیئرمین گلام مھمد بلوچءَ گندءُ نِند، یار جان بادینی او مبارک علی بلوچ
پولکار: ظہور فضل ءُ اصغر وفا
اولی بھر
ماہتاک بلوچی لبزانک .. رمس نومبر 1992
ورناھانی کِردءُ حیثیتءَرا ( کدا ) ایر جَنگ مَبیت
واجہ گلام مھمد بلوچءَ 1959 ءِ سالءَ بلوچی زبانءِ نمیرانیں شائر شھ لچہ کار ملا پازلءِ شہر مسکیں مندءَ واجہ ایوبءِ گسءَ ودی بیت آئیءَ وتی بنداتی وانگ چہ ھمدا ونت 1970ءِ سالءَ میٹرک ءِ چکاس پاس کتءُ گیشین وانگءِ واستا کراچیءَ شت ادا آئیءَ چہ ایس ایم کالجءَ بی اے پاس کت ءُ پدا چہ بلوچستان یونیورسٹیءَ ماں بلوچیءَ ایم اے کت۔
واجہ گلام مھمدءِ گُشگءِ پدا آ 1974ءِ سالءَ گوں شہید پدا اھمد بلوچءَ نندءُ نیادءُ گپءُ ترانءِ آسرءَ بی ایس اوءِ باسک جوڑ بیت ھمے سالءَ مند زونءِ جنرل سکریٹری گچین کنگ بیت ماں کراچیءَ وانگءِ درگتءَ 1982ءِ سالءَ کراچی زونءِ جنرل سکریٹری جوڑ بیتءُ پدا 1984ءِ سالءَ سوبہ سندھءِ جنرل سکریٹری گچین کنگ بیت چدءُ پد یک کجگیں جھدءُ مھنتءِ آسرءَ آئیءَرا 1986ءِ سالءَ جونیئر وائس چیئرمین ءُ 1988ءِ سالءَ مرکزی سکریٹری جنرل ءِ اگدہءِ واستا گچین کنگ بیت چریشی ءَ پد آئیءَ را 1990ءِ سالءَ بی ایس اوءِ سرکماش ءِ ازتی دادءُ گران بہاہیں اگدہ رست ءُ چہ ھما وھدا آ ھمے اگدہے سرا اَت۔
واجہ گلام مھمد ءَ سیاسی ءُ تعلیمی کاراں ابید بلوچی لبزانکءَ گوں مزنیں ھبءُ واھگءِ است اَت آئیءَ ماں بلوچی ءَ بازیں جوانیں شئر ءُ لچہ نویستگ کہ چریشاں بازینےشنگ بیتگ ءُ دگہ لہتءِ ماں نَوارءُ پیت بنداں ماں یاداشت بیتگاں بلوچی ءِ نامدارتریں شائر ملا پازلءِ شہرءِ نندوک بیئگءِ سوبءَ آئیءِ زبان سک وش ءُ تامدار ءُ لبز ڈولدارءُ پُر مانا اَنت زگریں بلوچی لبزانی کارمرزیءُ وشءُ تامداریں زبانءِ سوبءَ آئی گشتانک سک اسر مند ءُ دل گیر اَنتءُ پرے واستا آ ورناہیں وانندھاں ابید ماں ایدگہ ٹکاں ہم سک دوستناک اِنت۔
سیاسی سروکاں گوں گندءُ نند ءُ گپءُ ترانءِ سلسلہ ءَ مے ماہتاک بلوچی لبزانکءِ نمائندھاں گوستگیں روچاں گوں واجہ گلام مھمد ءَ گندءُ نند کت چرائیءَ ورناہیں وانندھانی سیاسی کار بلوچستانءِ سیاسی جیڑہءُ ایدگہ بازیں سیاھگانی بابتءَ جُستءُ پرس کت کہ ایشانی پسو پہ شما ندر اَنت اے گندءُ نند ماں کوئٹہءَ بیتگ اَت …. شونکار
لبزانک .. واجہ گلام مھمد 1984ءِ سالءَ وھدے دو بی ایس او ھور بیتنت تہ بلوچ اولسءِ تہا مزنیں وشیءُ دل ایمنی ءِ چاگردے ودی بوت بلے ھنچو گندگ بیت کہ اے ھوری ءُ یکجاہی وھدی ھبرے اَت ءُ ھنوں پدا شمے تہا پرشتءُ پروش ءُ جتائی ءِ چور چور اِنت شمے ھیالءَ ورناہیں وانندھانی تہا اے پرشتءُ پروش ءُ بے بھئینانی بنیادی سوب چے اِنت .
گلام مھمد بلوچ . بی ایس اوءِ بنیادی مکسد ھمیش اَت کہ بلوچستانءِ ورناہیں وانندھانءَ یکجاگہ بکنت آھاں کومی پکر ءُ شہورے بدنت . آ وھدءِ جاور ءُ جیڑھانی سوبءَ دو بی ایس او موجود اِتنت بلے ھرکسی لوٹ ھمیش اَت کہ بلوچستانءِ ورناہ ھور ءُ یکجا بہ بنت . بی ایس اوءِ ھوری ءِ کار باز جوانیں ءُ شریں پیمےءَ سرجم بوت بلے اے دیمروی ءِ تہا بازیں مردمانی نہ وشی ھم گون اَت کہ آھاں آ وھدی ھمے لوٹتگ اَت کہ اے کوتءِ بنیادءَ وتارا زندگ بدارنت ءُ رندا وتی داشتگیں منپی مکسدانی متابکءَ سلسلہ یے شُرو بکننت . بی ایس او ءَ پروشگ ءُ نزور کنگءِ زلورت کہ آھاں وتی زاتی مکسدءُ گرزانی واستا بی ایس او ءَرا کارمرز کنگءِ جہد کتگ ءُ ماں ایشیءَ بےسوب بیئگءَ پد آئی ءَرا پروشگ ءُ نزور کنگءِ جہد کتگ دومی نیمگا ریاستی کوتانی پندل ءُ مخالف گروہانی سازش ھم وتی جاگہءَ است اَنت کہ یک پیمءَ بی ایس اوءِ کوتءَرا نزور ءُ کم تاگت کنگءِ مکسدانی ھاترا کار کنگا اِنت سیمی مے سیاست بنیادی سورتءَ روایتی کوتانی گرِپتءَ بوتگ اے ھلکاں یک ھنچیں سیاستےکہ باشعوریں اندازےءَ گوں ردءُ بند ءُ ترتیب بہ بیت ءُ آئی ءِ تہا مہلوکءِ شرکت ءُ دانشورانی کیادت ھور بہ بیت ھر وھد ءَ پہ وت اڑ ءُ رکاوٹے زانتگ پرے ھاترا آہاں ھم اے وڑیں کوتے دیمءَ روگءِ راہءَ وڑ وڑیں رکاوٹ ایر کتگ پدا روایتی سیاست ءِ نتیجہءَ ورناہانی تہا ناپہتگی رندگیری ءُ زات پرستءِ مئیلءُ رجھان ھم بنت چہ اے وڑیں جاوراں وتا زوت آزات کنگ ممکن نہ اِنت اے پیمءَ پہ بازیں مردماں بی ایس اوءِ تہا اے وڑیں ناپہتہءُ نزانتکاریں مردمانی درگیجگ ءُ آہاں پہ وت کارمرز کنگ مشکل نہ بیتگ اے پیمءَ بی ایس او ءِ تہا پرشت ءُپروش ءُ ناتپاکی کہ پیدا بوتگ اَنت آ ڈنی دزمانگیجیءِ سوبءَ ھم بوتگ اَنت ءُ اندری نزوریانی سوبءَ ھم ۔
اے مسلہ کہ 1986ءَ پیدا بوتنت اے تھزیبی ءُ ھراب کاری ءِ مکسدءَ پہ بوتگ اَنت بلوچستان ءِ کومی جھد ءَرا نزورکنگءِ ھاترا ایشی ءِ بنیاد سیاسی ءُ پکری اختلاف نہ بوتگ آ مردماں کہ اے سلسلہ شُروع کتگ اَت آہانی کردار مروچی وتی اسلیں شکلءَ ھرکسی دیمءَ زاہر اِنت آہانی تھزیبی ءُ سازشی پکر ءُ کردار جوانیءَ پدر بوتگ آہاں بس وتارا نکسان داتگ بی ایس او مروچی ھم یک مھکمءُ مزبوتیں سورتےءَ وتی جاگہءَ است ءُ موجوداِنت ھرکس کہ مہلوکءِ مپادانی ھلاپءَ پہ یک سازشءُ پندلےءِ دیمءَ برگءِھاترا کار بکنت آ وتارا نکسان دنت راجی تھریک چرے عملاں ھتم نہ بیت سیاسی عملءِ دیمءَ وکتی رکاوٹ ءُ مشکلات کاینت بلے آ دائمی نہ بنت ءُ اگن سیاسی جہد کنگ بہ بیت تہ زوت ھتم بنت مروچی پندل سازیں ٹولی ءِ ھوالہءَ بی ایس او ءِ تہا ھرچے بوتگ اَت آئیءِ نشان ھم زاہر نہ اِنت چیا کہ اے ٹولی ءَ وتا سیاسی مکسد نیست اَت بلکیں آہاں پہ زاتی گرز ءُ مکسدانی واستا کارکت ءُ زاتی گرزءُ مکسدانی یک ھدے ءَ اوشت اَنت دیمءَ نہ رونت۔
نوں اے ھبر کہ آکبت ءَ دگہ پرشتءُ پروشے بیت یا ناں من سرپد باں کہ بی ایس اوءِ زلورت بلوچستانءِ مہلوکءَ است اِنت پہ بلوچ کومءِ جہدءِسوب مندیءِ واستا ایشی ءِ وجودءُ استھکام المی اِنت ھرکس کہ دگرانی واستا کارمرز بہ بیت وت سیاسی تجزیہ مکنت ءُ دگرانی ھبرانی سرا بروت وتی زمہ واریانی اھساس ئے مہ بیت بی ایس او ءِ وڑیں تنظیم یے ءِ تہا انتشار ءُ اھتلاپ پیدا بکنت منی ھیالءَ آئیءِ انجامءُ آسر ھم ھماہانی وڑا بیت کہ ساریءَ ھنچیں عمل اِش کتگ یک عملے کہ بوگا اِنت آئیءِ تہا بازینے دم بارت بازینے اوشتیت بازینے وتی زاتی مپادانی ھوالہءَ ھمراہداری کت نہ کنت اے وڑیں ھالات کائینت نوں اگن کسے آکبتءَ چہ بی ایس اوءَ جتا بوگ لوٹیت یا ایشیءَرا نزور کنگ لوٹیت تہ آ وتارا چہ بلوچستانءِ اولسءَ گستا کنت آ کومءِ نپءُ پائدگان ءَ ھچ وڑا ھتم کت نہ کنت
ات پیمیں مردم ماں راجدپترءَ سرخرو نہ بنت بلکیں گناہ کار زانگ بنت۔
ھچ گَل نہ لوٹیت کہ آئی ءِ سنگت چرائیءَ دربیاینت ما زانیں کہ گلءِ مزبوتی وھدءِ مستریں زلورت اِنت بلے کسے کہ بی ایس اوءِ بنیادی مکسد ایشی بنیادی پکر ءُ لوٹ بلوچ کومی جہدءِ بنیادی ھدپءِ دیمءَ رکاوٹ بیت آدگرانی لوٹ ءُ گزرانی واستا کارمرز بیت یا وتی زاتی واھگءُ مارشتانی دزبوج بیت اے وڑیں مردمے نہ بی ایس اوءَ پکار اِنت ءُ نہ بلوچ کومءَ،
چرائیءِ عملءَ کہ اجتماعی ءُ کومی جہدءَ پائدہ نہ رسیت تہ گہترایش اِنت کہ چہ کشاں بوگءِ بدلءَ آ وتارا گستا بکنت من اے ھبرءَ پدرکنگ لوٹاں کہ مروچاں ھمے جہد بوگا اِنت کہ بی ایس او چہ وتی رھبندءُ مکسدانی دست بردار بہ بیت ءُ دگرانی دز ڈلگءُ دزبوج جوڑ بہ بیت بلے تامے دستاں کوتءِ است ما اے مکسدءَ سوب مند بوگا نیلیں بی ایس او وتی رھبندءُ اسولانی متابکءَ دیمءَ روت آ وتی جندءِ پیدا وارکہ بی این ایم ءِ سورتءَ استیں گوں ھمائی کمکاری کنت ءُ ھمیشی ءَ را یک مھکمیں اولسی کوتےءِ سورتءَ دیمءَ برگءِ جہدءَ کنت .
لبزانک.. واجہ شما دمانے ءَ ساری گشت کہ بی ایس او ءِ تہا پرشت ءُ پروش ءِ یک سوبے ڈنی دزمانگیجی اِنت چریشی ءَ شمے مکسد چے اِنت ڈنی ملکانی یا ڈنی کوتانی دزمانگیجی .
گلام مھمد بلوچ .. دوہیں، گوستگیں دورءَ ھما پرشت ءُ پروش کہ بوتگ اَت آئیءِ تہا افغانستانءِ ھاسیں کردارے بوتگ افغانستانءِ ھاکمانی ھروھد ءَ پالیسی ھمے بوتگ کہ بلوچ کومی جہدمھکم مہ بیت۔
بلکیں آہاں ھروھد ءَ بلوچستانءِ سرا یک گیر ھکیکی داواہ یے کتگ ءُ ھر وھدءَ ھمے جہد کتگ کہ بلوچستان ءِ کومی جہد دگرانی اسرءِ چیرا بہ بیت ءُ وت ردوم مہ زوریت ھما وھدی کہ پندلانی سلسلہ شُرو بوتگ اَت منی جند افغان کونسلیٹ ءَ شتگ اَت آئیءَ منا را گشت کہ ما اے این پیءَ را جوڑ کنگا اِنت ءُ بی ایس او ءِ مردم آئیءَ را سرجمیءَ کمک دینت من گشت بلے بی ایس او ءِ کیادت ءَ چشیں پیسلہ یے نہ کتگ آئیءَ ھمے تاسر دات کہ جالب ءَ اے پیلسہ کتگ اے پیمءَ یک منسوبہ یے ءِ پدا بی ایس او ءِ تہا اے لائن آرگ بوت کہ آ اے این پیءِ رندگیریءَ بکنت چریشیءَ ابید ماں بلوچستانءَ پیپلز ڈیموکریٹک پارٹی ءِ ھوالہءَ ممبرسازی ءُ تنظیم کاری ءِ عملے ھم شُرو کنگ بوتگ اَت حفیظ اللہ امین ءِ دورءَ اے عمل سک دیمءَ اَت
اے ھبر ءَ ھرکس زانت کہ ما گوں افغان آشوبءَرا چنچوکمک کاری کت ما افغان مسلہ ءَرا ھنچو دیمءَ برت کہ ما وتی جند بیہال کت بلے ایشی ءِ بدل آہاں مارا ھمے دات کہ مے تنظیم ءَرا پرشتءُ پروش ءِ آماچ کنگ ءِ جہد کت ءُ ایشی ءِ تہا سک باز دزمانگیجی کت . چریشی ءَ ابید بازیں کوت ھم است اِتنت کہ آ بلوچ کومی تھریکءِ ھلاپ اِتنت ءُ آہاں بی ایس اوءِ دیمروی وش نہ بوت وت ریاستءَ کومی جہد ءِ نزورکنگءَ واستا ھما دراہیں کوتان ءَ نشانہ جوڑ کت کہ آ ایشیءِ دیمءَ بروک اَتنت اے ھمے دری ءُ اندری کوتانی پندلانی آسر اَت کہ فدا اھمد ءَ را شہید کنگ بوت فدا ءِ نشانہ کنگ یک ٹوھیں پندلے ءِ آسر بوت اے یک کسانیں ءُ وسریں ھبرے نہ اَت ایشی ءِ مکسد مے کوتءَ را شنگ ءُ شانگ ءُ مے کیادتءَرا نزور ءُ بد دل کنگ اَت بلے بی ایس او ءِ کوت شنگ شانگ نہ بوت .
روان اِنت
