کوھسار ءِ وتن
زِرگْوات بلوچ
دی بلوچستان پوسٹ
کئے بِہ زانت زِندمان وتی سَپر ءِ گُڈّی روچ ءَ چَہ کُجا آسر کنت ءُ واتر پَہ مُجّتی ھَنکین ءَ رؤت، بَلے لھتے اَنچیں سَر اَنت کہ بالاد اِش چو پُلّ ءَ سْرپیت ءُ چَمّا گِسر کپ اَنت…….. پگرانی جھان ءَ مُدام زِندگ ءُ نمیران اَنت. رستریں زمانگ ءُ بے رِیائیں وھد آھاں کدی شَموشت ءُ بے ھال کُت نَہ کنت.
ھماھانی تَہ ءَ یک بے دَروَریں نامّے نمیرانیں واجہ ڈاکٹر منان بلوچ اِنت کہ سی ءُ یَک بھاران دو ھَزار شانزدہ (31جنوری2016)ءِ نَہ وشیں سُھب ءِ سَر ءَ ماں مستونگ ءِ زیبائیں ھَند ءُ دْمگ کلی دتو ءَ گوں سنگتاں پاکستانی اَلگرد ءَ شھید کُت. مرچی سئے سال سرجم بوتگ کہ واجہ منان گوں سنگتاں شھید کنئگ بیتگ، بَلے اَنگت زِندگ ءُ نمیران اِنت. چیاکہ لسّھیں پِگرانی ھُدا بُند کدی نَہ مِر اَنت.
اَو اے ھَبر راستے کہ واجہ ڈاکٹر منان شھید بیتگ بَلے آئی مھلبیں ھُونانی رِتکگّیں ھَر تْرمپ اے گپّ ءِ شاھد اِنت کہ من زِندگاں. مرچی اے گپّ ءَ ھَر یَکّے زانت ءُ سَرپَد اِنت کہ گیدی ءِ دْمکاں بابا آدم ءَ بِگر داں مرچی بے ھِساب سْرندگ ودی بوتگ بَلے پَہ نام کہ کسّے مَنتگ ودی بوتگینانی چارِکے ھم نَہ بنت. چیاکہ اے گیدی ءَ ھَمُک پَہ دیم کس گیر آرَگ ءُ یات کنئگ نَہ بیت، بَلکیں ھَرکس گوں وتی گوھر ءُ کاملیں کارکِرد ءَ پَہ وت نامّے وَدی کنت ءُ پَہ دائمی یات کنئگ بیت.
مرچی اگاں کسّے واجہ ڈاکٹر منان ءَ زانت ءُ گیر کار اِیت اے آئی ءِ داتگیں کُربانیانی بے مُلّیں کِردگار اِنت کہ چو چَموک ءُ دْرپشناکیں اِستال ءَ دْرپشگ ءَ اِنت. پمشکا زانتکار ءُ کْواس اے ھَبر ءَ گْوش اَنت کہ زِندگ بُوّگ ءِ مکسد ءَ بِہ زان کہ من کئے آں، اگاں کسّے ءَ پَھم اِت کہ من کئے آں گُڑا وھد ءِ بے رَمیں دْنز ءُ گُبار آئی ءَ پَہ بَلگ ءَ داشت نَہ کن اَنت. مرچی ڈاکٹر منان بلوچ ھما روکیں ڈیوا اِنت کہ وھد ءِ ھِچّ وڑیں شَرتگ ءُ توپان آھگی اِیر گْوات ءَ سر بوت نَہ کنت. داں بلوچ ءِ اے کاروان دیم پَہ منزل ءَ رھادگ اِنت مُدام تھارُونکیں شپاں رُژنائی ءِ سِکین ءَ دَنت کہ پَہ آجوئی ءِ ھاترا مارا کُنٹگیں رھسراں گوں سَبر ءُ تھمبل ءَ پَند بُرّگی اِنت داں راجی آکبت شیر گْواریں زِند ءِ وشّی آں شاتکام بِہ بیت.
مرچی اے ھَبر بلوچ ءِ ھر زھگ ءَ را پَھمگی اِنت کہ ڈاکٹر منان، واجہ گُلام مھمد، جنرل اسلم، شیرمھمد، لالامنیر، کماش سَدو مری ءُ دِگہ ھَزاراں پیر ءُ ورناھاں اے نْدر ءُ کُربان بُوّگ ءِ راہ پَہ وت پرچہ گِچین کُرتگ اَت، پمے ھاترا کہ راجی زِندمان چَہ گُلامی ءُ ایردستی ءِ گَرداباں آجو بِہ بیت بلوچ وتی ڈیھ ءُ نیلیں زِرّ، جنگل، دشت ءُ کوچگ، گْراں کیمتیں مال ءُ مڈّیانی وتواجہ بِہ بیت کہ مرچی دَرآمدیں باروٹیاں دَست مانجتگ ءُ وتی واھشانی کیلو ءَ سر کیل کنئگ ءَ اَنت. اگاں اے چارموٹانی دیم دارگ نَہ بوت گُڑا اے ھَبر کدی دروگ نَہ بیت کہ مئے آکبت چو ریڈانڈینز ءُ آبارجینزانی داب ءَ پَہ اَبد تھار دیم بیت.
اگاں مرچی تو چو وتی بامَردیں سَرانی وڑا نْدر ءُ کُربان بُوّگ ءِ تِچکیں راہ ءَ وتی کن ئے، وتی ڈیھ ءُ آپبندانی دیمپانی ءَ دَر کپ ئے گُڑا نوں باندات پَہ ترا چو ٹھل ءُ نوک سوریں بانور ءَ سمبّھیت ءُ مُرادانی مِسک ءُ زَبادیں وشبو شِنگ ءُ آتار بنت. چو مَہ بیت…… کہ چیپ اِسٹیل ءِ گْوشتگیں دانک مَنتگ اَنت بَلے تی دانک ھم مہ مان اَنت؟
چیاکہ دُگنیا ءِ ھَر تْرندیں نِگاہ پَہ تی ڈگار ءِ دِلبند ءَ سَک اَنت. ھرکس گوں ھمے واھش ءُ اَرماناں چِن ءُ لانچ اِنت کہ من وتی چاگل ءَ آپ بِکن آں، بَلے چَہ کُلّاں گیش تی وتی جُھد ءُ جَپّاہ، کِردانی اَرزشت ستاہ کَرز اِیت کہ پہ وتی ڈیھ ءُ راجی زِندمان ءَ گوں چونیں پیش بَندی آں دیم ءَ کائے، چیاکہ وھد اَنچو پَہ دیم ءِ جُنزگ ءَ اِشتاپ اِنت بَلے مارا ھمگام بُوّگی اِنت. اگاں ما وھد ءِ ھمبرائی ءَ پَشت کپت اِیں گُڑا پَہ جَزم بِہ زان کہ ما ساپیں روگن وتی بَروتاں نَہ موشیں ءُ دَست پَہ ریشاں نَہ مَرزیں، بَلکیں پَھرانی روچ جَھل کپ اِیت ءُ دیگر ءِ رولّھیں شینکانی کُلوہ گورگیں بام ءِ بَدل ءَ تھاریں شپ ءِ اَرجان بیت. پَد ءَ ھیر واھے نَستگیں نَسیب کہ دِگہ ھِچّ نَہ بیت. پمشکا وھد ھمیش اِنت کہ مارا وتی شھیدانی کَول ءُ اَرمان، راجی لوٹ ءُ گَزر پیلہ کنئگی اَنت داں باندا اے تَھل ءُ تْرپشیں، زھر ءُ کُچلّیں شِگان جَھانی راجدپتر ءَ بَلوچ ءِ کوپگاں مَہ بیت کہ ھَمّل جئیند ءِ پَرزنداں نیلّیں زِرّ، بَلوچ ھان ءِ مَلّیں کُنگراں وتی گْواش ءُ کھچرانی، دودائیں بَچّاں وتی ننگ ءُ لَجّانی پاسپانی کُرت نَہ کُتگ ءُ بالاچ اِیں یَلانی کمان ءَ پَہ بیرگیری ءَ آس نَہ بُرتگ. پمشکا مارا مرچی اے ھَبر جیڑگ ءُ پَھمگی اِنت کہ ڈاکٹر منان، واجہ گُلام مھمد، جنرل اسلم بلوچ ءُ اے دِگہ بلوچ ءِ ھزاراں مَلّیں پُسّگ نْدر بیتگ ءُ بَندی جاہ ءِ تھاریانی دیمپان اَنت پرچہ؟
اگاں ما مار اِت کہ باندا مئے راج چَہ وتی ھَکّیں بُندر ءَ سربتگ ،دَرآمد ءُ سَلیول مَہ بیت گُڑا اے گْرانیں بار نوں مئے کوپگان ایر اِنت کہ وتی آؤکیں پَدریچّ ءَ کُجام دَگ ءُ رھسراں گِندگ لوٹ اِیں…….؟
بِل کہ ایردستی ءِ پَلارچینیں جَنگل ءَ ویل ءُ اَنگّریں آساں سُچ اِیت یا آجوئی ءِ بھار سنجّیں نوبتانی بام ٹِکّ بِہ دَنت ءُ شادِھانی منگیر تالان بِہ بیت ……. گوں سرگْوات ءِ شیکّگاں راجی بیرک گُلزمین ءِ دِلبند ءَ چَنڈگ ءَ بِہ بیت.
اے مئے توکل ءُ ھاٹیگ ءِ چَکّاس اِنت کہ وت ءَ… ءُ وتی راج ءَ کُجام نام ءَ بِہ دَئیں…….. مَہ جیڑ……. گاماں دیم ءَ شَھار بَہ دَئے کہ وھد پَہ رَوگ اِشتاپ اِنت……..وھد پَہ رَوگ اِشتاپ اِنت.
زِندگ اَرواہ بنت رَند چَہ مَرگ ءَ
ھون شھیدانی پُلّ رودین آں
دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
