کمبرو!
زروان بلوچ
دی بلوچستان پوسٹ
کمبر من اوّلی رند ءَ شال ءَ دیستگ اَت چِدو ساری نہ من کمبر دیستگ اَت نہ من کمبر ءِ نام اِش کُتگ اَت. من اَتاں کمبر ءَ ءُ دیوان ءِ مردُم اَتاں. کساس ما چاردہ سنگت اِتاں چمے سنگتانی توک ءَ کست کستریں من اَتاں منا چہ رند کمبر ءُ دیوان ءِ توک ءَ چُشین سنگت ھم است اَت کہ چہ مئے پِت ءِ ھمر ءَ مستر اَتاں دُرست تُک ءُ نُک اَتاں بس کمبر گَپ کنگا اَت. گَپ آشوب چہ بِندات بوتاں ءُ آسر ھم چہ آشوب ءَ بوتاں.
وہدیں مئے دیوان پُرشت باز سنگت دیم پہ بی ایم سی ءَ شُتاں لستیں دیم پہ بلوچستان یونیورسٹی ءَ چُش کہ من شال ءَ سنگت ءِ مہمان اَتاں من ھما سنگت ءِ ھمراھی ءَ سنگت ءِ لوگ ءَ شُتاں. بلے منی ھیال ءَ بس ھمے یکیں گپ گردگا اَت کہ ہمے لاگر بنّدیں ورنہ کئے اَت؟
وہدیں ما لوگ ءَ سر بوتاں من وتی سنگت جُست کُت ھما دیوان ءِ لاگریں ورنہ کئے اَت؟ کئ چُک اِنت؟ کُجا نِشتگ؟
سنگت ءَ چُش پسو دات۔۔
کمبر ءَ چاکر ءِ چُک اِنت لوگ مرچی ءُ باند ءَ تُربت ءَ آں.
وہد دیم ءَ جُنزان بوت من واتر بوتاں وتی ھند ءَ۔
یک روچ ءِ منا پدا ھما شال ءِ سنگت ءَ فون کُت ھمائی ءِ کہ من لوگ ءَ مہمانی شُتگ تاں. کساس وہد ءُ پاس سہب ءِ ھَشت بج ءَ سلام ءُ علیک ءَ رند گُشتے ترا یاد بیت کہ ھما دیوان ءَ کہ من تو شُتاں ھمودا لاگریں سنگت ءَ تران کُت؟
ھما سنگت مروچی پاکستانی چیریں ادارہانی کارندہاں چِست کُتگ گوں وت بُرتگ.
من ھُشک ءُ ھیران بوتاں چون؟ چہ کُجا؟ کدی؟۔۔
سنگت: مروچی شپ ءِ سئے بج ءَ لوگ ءَ ارشاد ناصر ءِ ھمرائی ءَ.
پدا فون بند بوت۔
من اَتاں ءُ منی ابیتکی گُشے آزمان منی سرا کَپتگ اَت ھمُک نیمگ ءَ تہارونکی اَت. بس منی گوشاں کمبرو ءِ ھما دیوان ءِ توار کپگاتاں بلّے منا کمبرو ءِ ھُمک گَپ گیِر آیگ ءَ اَتاں.
کمبرو:ھما انسان کہ درد مارِت کُت مہ کنت ھا انسان ءِ نہ اِنت۔۔۔
کمبرو: ھما کہ پہ وت زندگاں ھا زندگی ءِ نہ اِنت۔۔۔
کمبرو پنچ نومبر ۲۰۱۰ ءَ آوار جنگ بوت.
پدا پنچ جنوری ۲۰۱۱ ءَ گوں شہید الیاس نزر ءِھمرائی ءَ بندیگ جاھاں شہید کُت انت ءُ تیر سُپتگیں کُنٹ ماں مُرگاپ ءِ ویرانگاں چگل دیّگ بوت.
کمبرو شون دیّگ ءِ نام اَت کمبر ءَ مُدامی وتی راج ءِ رہشونی کُت ءُ مُدام ھرچ پیمیں آشوبی کار بوت شر یا کہ چاگِردی کُجام ھم کار ءِ بوت اوّلی صرپ ءَ گِندگ بوت.
کمبرو ءَ نہ گرمی سماہ کُت نہ سارتی نہ شَپ چارِت نہ روچ بس جہد کنگا اَت ھرکس ءَ کہ کمبر دیستگ اَت گُڈا مُدامی آئی ءِ دست ءَ کِتاب اتاں ھا یک کِتابی گنوک اَت باز رند ءَ سنگتاں گنوک ءِ نام ءَ توار پِر جَت پرچہ کہ سکیں وانوکیں ءُ علم زانتیں مردُم اَت ءُ سکیں مزنین ٹوھیں بار ءِ بڈّا زُرتگ اَت ریاست پاکستان ءُ آئی ءِ زر بہا زُرتگین کاسگ چَٹ بے کرار اَتاں آیاں زانت کہ کسان ءُ لاگریں مرد ءَ چُش مان بستگ مئے سِرین ءَ پُروش دنت۔
کمبرو ءَ ھم زانتگ اَت کہ اِش دشمن کس ءَ ماپ نہ کنت نہ آئی ءَ زاکر جان گوں دِگہ دسنگتاں ھِشتگ نہ دین محمد نہ چُشیں بلوچ دوستیں ءِ نہ کہ اِدا انسان دوست ءِ پشت کپتگ ریاست ءُ آئی ءِ زر بہا بوتگین پوج منا ہم ماپ نہ کنت بلّے آ انگت پاکستان ءِ دیم ءَ چوں بولان ءِ کوہ ءَ مِک بوت ءُ سابت کُت ءِ کہ گلامی زندمان ءَ چہ اِزت ءِ مرگ گِہتر اِنت.
کمبرو ءِ واھگ سرجم بوتاں کمبرو پہ وتَن سالونک بوت.
دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
