مات یاسمین ءُ گہار عائشہ منی پگرانی رھشون
شاھبیگ بلوچ
دی بلوچستان پوسٹ
گُشنت بلوچ ئے لوگءَ اگں مھمانءِ بئیت ءُ اگں مردیں آدم لوگءَ مہ بیت گُڑا جنین آدم مردینانی جاہ ءَ دیما کئیت ءُ مھمانءَ گوں بلوچ دود ءُ ربیدگاں وش آتک کنت ءُ آئی ءَ نادین اِیت آپ ءُ نان دنت ۔ اے گپ بلوچ دودانی یک چیزے گیشین اِیت کہ بلوچ جنین آدم ءُ مردین چہ یک دومیگءَ کم لیکگ نہ بنت۔ اگں جاگہ ءِ مردین یک کارے کُت نہ کنت ءُ کارءَ بلوچ جنین ءِ کُت کنت آئیءَ ھچبر دارگ نہ بیتگ۔ بلئے نوکیں وھد ءَ مذہبی دوداں چاگرد باز اثر مند کُتگ ھمک مردم چہ وتی دوداں گیش مذہبی دوداں پیلو کنت ءُ پمے ھاترہ باز جاہ ءَ جنین آدماں آیانی بنکی حق ھم نہ رسنت ۔
بلئے مرچیگیں پُر آشوبیں جاوراں بلوچ راج مات اماں یاسمین ءُ بلوچ راجے دلیریں گہار عائشہ بلوچ ءَ اے گپ پدر کُتگ کہ ما چہ وتی راجے مردیں آدمءَ ھچ وڑ کم نہ اِنت ءُ ماں مدام وتی راجے پگرانی رھشونیءَ کنیں۔ مات یاسمین ءِ جزبگ ءُ ایمان اولی بر ءَ بلوچ راجءَ ھما وھدءَ دِست اَنت وھدے آ پھلیں ریحان جان ءَ بلوچستان ءِ بیرک ءَ سرا دنت ءُ پہ نمیران بوھگءَ روان دنت۔ ھما روچءَ زانگ بیت کہ نہ تہنا بلوچ راج کماش جنرل اسلم دلیری ءُ بہادری ئے چیدگ اِنت بلکیں مات یاسمین ءُ گہار عائشہ ھم چوں بولان ءِ کوہءَ اوشتوک اَنت ءُ پہ سرڈگار ءِ ھاترہ ھمک رنگیں قربانی دیگءَ تیار اَنت۔
ریحان جانءِ شھادت ءَ بلوچ راج ءُ چاگرد ءِ تہا یک مزنیں بدلی ئے آورت دلپروشی ءِ ماحول پدا یقین ءُ محکمیءِ نیمگءَ جُنزگ ءَ بندات کُت۔ تحریک ءَ گُشے نوکیں دروشم ءِ رست ۔ ریحان جان ءِ شہادت ءَ پد مات یاسمین ءُ گہار عائشہ ءَ ھم راجے رھشونی ھمے رنگءَ بندات کُت کہ یک ماتیں وتی زھگاں سرپدی دنت ءُ آیاں راستیں راہءَ پیش داریت ۔ گہار عائشہءَ وتی نبشتانکانی دروشمءَ راج ءَ را آشوب ءُ آجوئی ءِ راستیں راہ پیش داشت۔ وھد گوزان اَت ءُ یکروچیں یک سکیں بدیں ھالیں اَتک کس باور کنگءَ تیار نہ اَت کس ءَ اے گپ گمان نہ بیت کہ مئے جنرل، مئے کماش، مئے سروک، بلوچ راج واجہ اسلم بلوچ گوں وتی دگہ پنچ سنگتاں نمیران بیتگ۔ وھدے اے ھال مئے دیما اَتک ما پریشان بیتاں نوں چے بیت چون ما دیما جنزین کجام رنگءَ ءُ کئے مئے پگرانی رھشونیءَ کنت ۔ یک تُرسیں، یک بے چینی ایں، یک دلپروشی ئے پدا ودی بوھگءَ لگیت پرچہ کہ اُستاد ءَ انگت باز کار کنگی اَت ھمے جیڑگ ءَ مردم دلرنج کُت۔
بلئے ھمے نیامءَ وھدے ما کل دلرنج، حیران ءُ پریشان اتیں ھمے وھدءَ مات یاسمین ءَ پہ بلوچ راج ءَ وتی ویڈیو کلہوہ ئے دیم دات ءُ گُشت کہ اے جنگ پہ یک جنرل ءِ روگءَ نہ اوشتیت یک جنرل ئے شُتگ ہزار ودی بیت ھنچو کہ یک ریحان جان ئے پد دگہ ریحان جان پاد اتکگ ھمے رنگءَ اُستاد ءَ پد ھم دگہ اُستاد کئیت۔ آوتی کلہوہ ءِ تہا بلوچ راجے ورناہاں سرمچاراں سیاسی سنگتاں درستاں گُشیت من داں استاں بلوچ راج مات ئے وڑءَ شمئے ھمراہاں شمئے رھشونیءَ کناں۔ ما وتی دشمنءَ پہ آرامءَ نئیل ایں ۔ دشمن سرپد بیت ایشانی مستر شُت اے جنگ ھلاس بلے اے جنگ ءَ ما کُل دیما بریں گوں وتی اُستاد ءِ جزبگ ءُ تعلیماں۔ مات یاسمین ءِ کلہوہ ءُ گہار عائشہ ءِ نبشتانک ءُ اے رنگیں بہادری ءُ دلیری کہ چُشیں گرانیں ساھتاں ھم وھدے مردم وتءَ چہ بے سماہ بیت آ بلوچ راجءَ سکین دئیگ ءَ اَنت ءُ راستیں راہ ءَ پیش دارگ ءَ اَنت، بائد اِنت بلوچ راج وتی پگرانی رھشونانی گُشتنانی سرا عمل بہ کنت ءُ آجوئیءِ جُنزءَ دیما بہ جُنزین اِیت داں مئے سرڈگار زوت آجوہ بہ بیت۔
دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔
