اے منی جون اِنت، بے کَس نہ اِنت
نبشتکار۔ لطیف بلوچ
رجانک ۔ حنیف بلوچ
دی بلوچستان پوسٹ
ماں چاگرد ءُ چاپ کاریں رَسانکدراں چہ مدام اے ھبر پہ وانگءَ دیمءَ کئیت کہ گُلامیں (مقبوضہ)بلوچستان ئے پِلاں دمگءَ چہ یک جونے دست کپتگ، جون ماں نادراہ جاہ ءَ برگ بوتگ کہ آئیءَ سرءَ، دلبندءَ یا کہ ماں بالادءِ دگہ جاھےءَ تیر جتگءُ کشتگ، ءُ لہتے روچانی گوزگءَ پد پدا ماں رسانکدرءَ اے ھال کئیت کہ ایدھی ئے واکداراں بلوچستان ءِ جتائیں دمگانی دست کپتگیں بے کَسانی جون کلّ ءُ کَسارت کتگ اَنت۔ جیڑگی گپے کہ اے جون چے پیم ءَ بے کس بوت اَنت؟ اے کئےءَ گُشتگ کہ اے جوناں پہ کسے نیست اِنت؟ اشاں هنچو پہ دیم یک گورستانےءَ کَسارت بہ کن اِت۔
چے اے دست کپتگیں جُونانی بابتءَ یک ھالتاکےءَ جارے چیزے پرّینگ بوت؟ ھما دمگاں کہ اے جون دست کپت اَنت چے پہ آھانی پجارگءَ آؤدئے بیگواهیں ورناھانی مہلوک ئے کہول لوٹائینگ بوت انت؟ اگاں دست کپتگیں جونءِ مردم چہ آ دمگءَ در کپت اَنت کہ جون دست کپتگ گڑا چے بلوچستانءِ دگہ دمگاں چہ بیگواھیں مہلوکانی کہول پہ آھانی پجارگءَ لوٹائینگ بنت؟ چے پہ جون ئے زانگ ئے ھاترا ڈی این اے یا دگہ آسراتیانی سرا ٹپّاسگ ئے جہد کنگ بوت؟ چے جون ئے اکس ماں چاگردی رسانکدر ءُ چاپکار ءُ الیکٹرانک رسانکدر ءَ دیگ بنت؟
جنوکءَ جتءُ آئیءِ جون چگل دات، سپاھیگاں(پولیس) جون درگِپت ءُ نادراہ جاہءَ سرکت ءُ ھال رسانےءَ چہ وتءَ ھال شنگ کت، چاپکاریں رسانکدرءَ وتی ھالتاکے یک کنجے ءَ ھمے گُشتگیں ھبر چاپ کت کہ یک جونے دست کپتگ، ھر یکےءَ وتی وتی زمہ واری پیلو کُت اَنت۔
بلے اے یک جونے نئے، اے یک کہولے ئے ارمان اِنت، واھشت اِنت، زندمان ءُ وشی اِنت، دست کپتگیں جون بس یک جونے نئے بگندئے کسے ئے برات، کسے ئے چُک، کسے ئے پت ءُ کسے ءِ لوگ واجہ اِنت، اے جونءَ گوں یک ماتے ئے وشی، گوھارے ئے واھشت، براتے ئے اوست، جنینے ئے زندمان ءُ چکّانی وشیانی واھشت پلگ بنت۔
مات، گوھار، جنین بے کس بنت ءُ چک چورہ کنگ بنت ،یک سرجمیں کہولے ئے واھشت، ارمان ءُ وشی کُشگ بنت۔
راجانی یکجہتی گل(اقوام متحدہ) انسانی ھکّانی میان اُستمانیں گَل، انسان دوستیں مہذب ملک بلوچستان چہ درکپتگیں دُراھیں جونانی سرا گامگیج بہ زور اَنت ءُ دراھیں کل کرتیں جونانی ڈی این اے ئے سراچار ءُ ٹپّاسءَ بکن اَنت۔ چیریں اداراھانی دستءَ بازیں بلوچ ورنا ءُ پیرمرد ماں ازیتانی وھدءَ شہید بوتگ اَنت، کہ آھانی جونانءَ بے کسے ءِ نام داتگ ءُ کل کتگ اَنت۔
2014ءَ پہ انسانیتءَ شرمندگیں وئیلے دیمءَ اتک، وھدے کہ بلوچستان ئے دمگ توتکءَ چہ 187 جون یکجاہ چہ یک مانشے ءَ دست کپت، بلے ابید ئے چار ءُ بچارءُ ڈی این اے ءَ جون پدا بار دیگ بوت اَنت، بلوچستان ئے سرڈگار دگہ وسائلانی ھوارےءَ جون ھم ودیگ کنت۔
بلوچستان ءِ مردم گوْستگیں ھپتاد سالاں چہ دردناکیں بزّگی ءُ درد ءُ رنجانی جاوراں گوں گوزگءَ انت۔ ازیت سگگءَ اَنت، چہ بلوچستانءَ ھزارانی کساسءَ مردم گارءُ بیگواہ اَنت،ھمک گس گمیگ ءُ پرسیگ اَنت، چہ کجا کہ جونے کہ دست کپیت اے گسانی تہا مہشر پاد کئیت۔
ھماهانی کہ جگرئے کپ بیگواہ اَنت آھاں زندمان ئے دراھیں وشیانی رنگ شموشتگ اَنت، آشپ ءُ روچ بس ھمے وداریگ اَنت کہ آھانی ساہ ءُ نپس کجام وھداں سلامت ءَ واتر کئیت یا جونے بیت ءُ لوگءَ کئیت۔آ مردم ھم وتءَ وش بہت سرپد بنت کہ آھانی چُکانی جون دست کپتگ اَنت، بلے ھما مردم یا کہول ھمک ساھتاں نیم مردگ اَنت کہ آھانی چُکانی ھچ ھال ءُ سوجے نیست اِنت باریں زندگ اَنت کہ کشگ بوتگ اَنت؟ ودارئے ھمک دمان پہ آھاں درد ءُ ازیتاں چہ کم نہ اِنت بلے پما دست کپتگیں جون یک بے کسےءِ جون بیت۔
جون چے پیم بے کس بوت کنت؟ آ الم ھمے سرڈگارءِ یک زہگے، بد کسمتیں ماتے ءِ جگرءِ ٹُکّر بیت، کہ آئیءَ ماں زوراکی ئے وھداں، دگ، شہرءُ میتگےءَ چہ ھون واریں رستراں آوار جتگ، بے نامیں تہاریں کوٹی ءَ ازیت داتگ، چیلّینتگ ءُ کُشتگ، پدا یک گیابانےءَ بے کسےءِ نامءَ چگل داتگ ءُ ایدھی والہانی میار کتگ۔
جون وتی شکمءَ چہ وت وتی پجارءَ، وتی دمگ، راج ءُ ٹکے ءِ نشانءَ دنت، بلے وکشی ءُ ھون واریں رستراں اے کہولانءَ گیش دردیگ کنگءَ چہ وشی کئیت۔ جنوک ءَ جون ءِ پجارآئیءِ دمگءُ کہول ءِ سرپدی الم بیت اِنت، بلے آ وتی رستریءِ پیش دارگ ءِ ھاترا اے پیمیں گیر انسانی زمین جُمبیں کار کنت، ھچ بنی آدم، ھچ جون بے کس نہ اِنت، آ همے سرڑگارءِ بچ اِنت، آیک بلوچے ئے یاکہ پشتون ءُ سندھی ءِ جون اِنت کہ آھانءَ زوراک بے دردیءَ چہ کشیت ءُ بے کسے ءِ نام ئے دنت۔
او ڈُنڑواراں،او وکشیءُ ھون واریں رستراں شما یک زندگیں مردمے آوار جت، تہاریں کوٹی یے ءِ تہا آئیءِ شکم ئے گوشت چُنڑ چُنڑ کت اَنت، دردناکیں ازیت دات ءُ کشت انگت شمے زہر ھلاس نہ بوت اَنت۔ زانگولیں جون ماں گیابانےءَ چگل داتءُ آئی ءَ بے کسےءِ نام دات۔
چے ھمے پیم وتی کینگ ءُ زوراکی ءِ سوْب ءَ چہ بلوچستانءِ مردمانی دلانی تہا بیم پیداک کن اِت؟ آھانءَ بے توار کن اِت ءُ وتی ایردستیءَ منّارین اِت، ھچ پیمءَ کت نہ کن اِت۔
تو ھمے سرپد بئے کہ جونانی چگل دیگ ءَ پہ مردم چہ آجوئی ءِ لوٹءَ دست کش بنت۔ بلے اے گپ ءَ یات بِدار کہ ھمک جون بلوچانءَ آھانی مِنزلءَ داں نزدیک تِر کنان اِنت۔ تو پہ ترسینگءِ جہدئے بنگالیانی بازیں لاش دور دات بلے لاگریں بنگالی چہ ترا وتی آجوئی ئے گرگءَ پہ سوبین بوت اَنت۔ مرچی آ آجوئیءِ سارتیں ساھگءَ دم کشگءَ اَنت،بلوچ ھم وتی آجوئی ءَ چہ تو پہ زور گیپت۔
ءُ ھؤ دلگوش ۔اے بے کسیں جونے نئے اے منی جون اِنت، منءَ جن ئے ءُ بے کسے ءِ نامءَ کل کن ئے، بلے منی جونءَ چہ منی پجارءَ دور کت نہ کن ئے، منءَ چہ منی پیداگ کتگیں ماتءَ سِندئے ءُ کجا کہ کل کن ئے، من ھر کُجا وتی مات ءِ امبازاں آسودگے ءَ گوں ھاک باں، چےءَ کہ اے زمین منی ماتیں وتن اِنت، اے زمین منی مات اِنت۔
دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
