مَزن شلوار ۔ شہاب رحمت

مَزن شلوار

شہاب رحمت

دی بلوچستان پوسٹ 

(بلوچ نودربر ءُ پنجاب ءِ پروفیسر ءِ میان ءِ تْران)

کج ئیگ ءِ تو-؟
واجہ، کیچ ءِ نِندوک آں-
کیچ کُجا اِنت-؟
کیچ واجہ، مکران ءَ اِنت-
گُڑا مکران نی کجا اِنت-؟
واجہ، بلوچستان ءَ-
اچا، بلوچے ئے تو بزاں-!!
جی ھَو واجہ، بلوچے آں-
پنجاب ءَ چے کَنگ ءَ ئے گُڑا-؟
سَر، وانگ ءَ اَتکگاں-
ھاھاھا بِل بِل بِل، ما سرپدیں شُما ادا چیا کائیت-!!
جی واجہ، من پوہ نہ بوتاں-؟
شُما ادا وانگ ءِ نام ءَ دہشتگردی ءَ کائیت، بڑواہ-!!
جی اِناں واجہ، ما وانگ اتکگیں، دہشتگردی چہ مئے وَس ءُ مجگاں، ھردویناں ڈن اِنت-
ناں، دروگ مہ بند، شُمئے مَزنیں شلوار اے گواہی ءَ دینت، شُما دہشتگرد اِت، مرچاں ھمے مزن شلوار ءُ مزنیں شلوار ءِ نفسیات ءَ سندھی، پشتون اوں وتئی ھَرجاں جتگنت ءُ دہشتگرد جوڈ بوھگ اَنت، سرکار ءِ ھلاپ ءَ گَپ جنّگ اَنت، مارا شُمئے دروستانی ھال گون اِنت-

اناں واجہ، مئے چے ھال گون اِنت، واجہ؟-

ھمے کہ شُما اودا، کوہ ءَ سرکار ءِ ھلاپ ءَ جَنگ اِت، ادا کائیت نی نام ءَ وانگ ءِ کن ات، ءُ اے دگہ قوم ءُ راجاں سرکار ءِ ھلاپ ءَ

جَنگ کَنگ ءِ درس ءَ دئیت-!!
اناں واجہ، ما پہ اسل ءَ وانگ ءَ اَتکگیں ادا-
دروگ مہ بند، پرچہ شُما بلوچستان ءَ نہ وان اِت، ادا چیا کائیت پہ وانگ ءَ-!!
واجہ اودا وانگ نیست، پمشکہ ما ادا کائیں-
پدا دروگ!! ملکانی یونیورسٹی سرکار ءَ شُمارا بستگ ءُ داتگ، بلے ناں، شُمارا وانگی نہ اِنت، دہشتگردی کنگی اِنت ناں-!!
اناں واجہ، ما دہشتگرد نہ ایں، اوشکیں یونیورسٹیانی بلڈینگ مِکّ اَنت بلے وانگ نیست اودا-
چوں وانگ نیست!! شُمئے مات، پِت شمارا ادا زور دیم دینت کہ برو اِت، دہشتگردی بکن اِت!! شَرم بکن اِت-!!
ناں واجہ، مئے پت، مات مِسکین اَنت، آ مارا شَریں وانگ جاہاں دیم دینت کہ بندا پہ ما آیانی تہارگاہاں چراگے ءِ کار ءَ بیائیں، آیانی لوٹ ھمش اِنت، کہ ما چہ آیاں شَرتِریں زندگی ءِ واھند بہ بئیں، پمشکہ آ مارا ادا دیم دینت-
گُڑا کے شُمارا دہشتگردی کنگ ءِ سوج ءَ دنت-؟
واجہ، ما دہشگرد نہ ایں، مارا کس سوج نہ دنت-
گُڑا اے مردم سرکار ءَ تئی دل ءَ پوکی ءَ گار بیگواہ کُتگ اَنت-؟
جی واجہ، اے دراہ بے گناہ اَنت-
بے گناہ اَنت!! اے ادا سرکار ءِ ھِلاپ لکچر دینت، اے ادا سمینار کن اَنت، اے بے گناہ اَنت-؟
واجہ، لیکچر دیگ، وتئی زانت ءَ دومی ءِ تھ ءَ transfer کنگ ءِ scientific method ے-
ناں ناں ناں، اے لکچر دینت کہ سرکار پلان اِنت، سرکار چوش کنّگ ءَ اِنت، سرکار مئے حق ءَ جنّگ ءَ اِنت، سرکار مارا کُشّگ اِنت، سرکار مئے نسل ءَ تباہ کنگ ءَ اِنت، سمینار کن اَنت، ادا مھلوک brainwash کنگ لوٹنت، کہ سرکار ھِلاپ ببئے، دہشتگردی بکن اِت، ھمش اِنت شُمے وانگ-!!

واجہ، سمینار co-curricular activity یے، educational activity یے، دہشتگردی یے نئے، ما دہشتگرد نہ ایں-
ناں!! شُمارا پنجاب ءِ پاکیں سرزمین ءِ سرا، دہشتگردی کناینگ ءِ واستہ، کے زَر دنت، کے شُمئے کَمک ءَ کنگ ءَ اِنت-؟
واجہ، ما دہشتگرد نہ ایں، ما نودربریں، کس مارا مالی کمک نہ کنگ ءَ اِنت، مئے بزگیں مات پبت وام شام کن اَنت، مارا وانینگ ءَ اَنت، پہ ھُدا ءِ دوستی چوش مہ گُش، ما دہشتگرد نہ ایں-

بَس کن او مَزن شلوار، بزگیں ماتیں ءِ دہشتگردیں چُک، یک گپے اوں گیشیں نہ جن ئے، ناکہ-!!!!