شھید رازک جان نمیران اِنت
نبشتہ: ھلیل بلوچ
دی بلوچستان پوسٹ
من مُدام چہ وتی مستریں مردماں ھمے اِشکُتگ کہ مرگ ءِ لِزّت سکّ تَہل اِنت… تھنا ھمے نا من بازیں جاگہہ ءَ ساہدار ءُ دَلوت دیستگ اَنت کہ بازیں وھد ءَ تُرس ءِ آماچ بوتگ اَنت… من مُدام وتی ناکو ءِ بُز ءُ پس دیستگ اَنت کہ کور ءَ آ دیم بوھگ ءِ وھد ءَ وتی پاد اِش داشتگ اَنت گُڑا من زانتگ کہ مَرگ ءِ تُرس ءَ آپ ءِ تہا دور کنگ ءَ نہ اَنت… وھدے من بنی آدم ءِ باروا ھیال کُتگ گُڑا من مُدام دیستگ کہ انسان ھم چہ مَرگ ءَ تَچگ ءِ کوشست ءَ اِنت، من ھم چہ مَرگ ءَ تُرس اِتگ آں… بلے وھدے من گوں راجی جُنز ءَ ھوار بیتگاں گُڑا ھمے تُرس ھتم بوھاں بوتگ پرچا کہ من وتی بامردیں سنگت شہید بوھگ ءَ دیستگ اَنت کہ کندان ءَ وتی جان اِش داتگ… سنگتانی کُربانی ءَ پد من ھمے پہم اِتگ کہ برے برے رُژن ءِ چراگ ءِ روک کنگ ءِ ھاترا وتا سوچگ لوٹیت، یک دائمی زِندے ءِ ھاترا وتارا ندر کنگ لوٹیت.
انچو کہ پہ وشبو ءِ تالانی ءِ ھاترا پُل سندگ لوٹیت.چُشیں کُربانیانی کِسّہ راجدَپتر ءِ توکا سکّ باز دزکپیت بلے چو بالوانی پَئیما کَندیل ءِ اِشک ءَ وت وَتا ندر کنگ پِگر ءُ زانت ءِ گُڈّی سیمسرانی نشانیگ اِنت اے وڑیں کُربانی تھنا گُل زمین ءِ سرپدیں پُسّگ دات کَن اَنت…
اے کار مئے وڑیں مُناپِکانی گُمان ءَ چِہ ھم ڈنّ ءَ اِنت پرچا کہ ما وتی زِند ءِ ھر چیز ءِ سرا جیڑاں بلے مَرگ ءِ وھد ءَ ما یک نیام ءِ راہ یے شوھاز کناں.
مروچی بلوچ راج پَہر بَندیت کہ بلوچ راج ءَ ھم چُشیں زانشتی ایں بامرد اَست کہ وتی مادریں ڈیھہ ءِ رَکھینگ ءِ ھاترا دُژمن ءِ دِلبند ءَ اُرش کَن اَنت ءُ وَت وَتا کُربان کَن اَنت…
بلوچ راجی جُنز ءِ پِدائی شہید مجید، شہید درویش، شہید ریھان، شہید وسیم، شہید اَزل ءُ شہید رازک رازی بلوچ راجی چیدَگ اَنت کہ وتی رُژن اِش بلوچ سرزمین ءِ سرا تالان کُتگ.
منی وش بھتی اِنت کہ ھمے راجی چیدگانی تہا یک چیدگے شہید رازک رازی پنام جلال دَر کسانی ءَ گوں منا یکجا بوتگ ءُ چہ وتی رُژن ءَ منا پِگری رُدومے داتگ.
شہید رازک منی کسانی ءِ سنگت بوتگ… اسکول ءِ وھد ءَ من گوں رازک ءَ دُچار کپت آں… پدا آ بوتگ من بیتگاں کہ زِند ءِ ھر پِڑ ءَ ھوار بیتگیں… وھد ءُ ھالت بدل بوھان بوتگ اَنت، گُڑا ما ھم تچان ءَ ھوار بوتگیں… برے رازک دیم ءَ بوتگ، برے مَن ءُ برے وھد…
زہنی رُدوم ءَ پَد گُلامی ءِ مارِشتاں منا وتی امبازاں زُرت ءُ من بلوچ راجی جُنز ءَ ھمگرنچ بیتاں گُڑا ھما وھد ءَ ھم من وتی کَش ءَ رازک دیست…
میتگ ءِ تہا ھرچ وڑیں تنظیمی کارے بہ بوتیں گُڑا رازک چہ دُراھیناں پیسر ساڑی اَت، پمیشکا باز زُوت دُژمن ءِ چمّانی کُنٹگ جوڑ بوت ءُ وھد ءِ بدنامیں کُشندہ ٹولی ءِ جارکَش “غازی خان” ءَ بیھار دات کہ “راجی جُہد ءَ یلا بکن اگاں نا گُڑا مَرگ ءِ ھاترا تیار بئے.” بلے پہ چُشیں بامرداں مَرگ ءِ بیھار ھِچ مانا نہ داریت… گُڑا شہید رازک ھما وھد ءَ گوں بلوچ راجی لشکر “بلوچ لبریشن آرمی” ءَ ھمگرنچ بوت.
گُڑا ھمے دَور ءَ یک مزنیں بے مانائیں دوری یے بُوت پرچا کہ من گوں “بلوچستان لبریشن پرنٹ” ءَ ھمگرنچ بوتاں… گُڑا آ وھد ءَ دوئیں گَلانی نیام ءَ یک دوری یے است اَت، یکّیں ھَند ءُ دمَگ ءَ مئے کیمپ اِت اَنت بلیں پدا ھم تاں دو سال ءَ یک ءُ دومی ءِ کِرّا رَوگ ءُ گِند ءُ نِند کنگ نہ بُوت… ھر وھد منی یک واھگ یے است اَت کہ رازک ءَ بہ گِنداں.
پدا وھد ءِ زوراکی بگُش ئے یا سنگتانی کُربانی مئے گَلاں وت ماں وتا یکجاہ کیمپ کُت گُڑا پدا مئے سنگتی اَت کَندگ ءُ ٹاک اَت، بازیں وھد ءَ بازیں چیزانی سرا اختلاف ھم بُوتگ بلیں مرچی آئی ءَ وتارا پدّر کُت کہ آ چی یے ءُ چے کُت کنت.
شھیدانی کُربانی راجاں زِندگ کن اَنت ءُ شھیدانی رِتکگیں ھون پُلّ رودیننت ءُ چاگرد ءِ سرا وشبو یے تالان کن اَنت.
شھید رازک جان نمیران اِنت گوں وتی ھمبلاں.
دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
