آس ءَ دارُکے پِر کن
زِرگْوات بلوچ
دی بلوچستان پوسٹ
پہ گوھریں لالانی پولگ ءَ جِناوریں اَھد ءِ گُنگدام اِیں سردست ءِ گِس دْپ ءَ زِمستان ءِ سارتی ءَ آس ءِ کش ءَ نِشتگ اِیں مات ءُ گھار، تِپلّیں زھگانی ھکس آں گوں چمّاں ڈیک دات تہ باتن ءَ دردانی سیکارچ ءَ سر کش اِت ءُ تاموریں شپ ءِ مانا چراگ ءِ گیوار ءَ چو پُلّ ءَ سْرپتگ اَت کہ زُبان ءَ اَلوتے اِیر اَتک ءُ ھمے گْوشت ئے آس ءَ دارُکے پِر کن.
مرچی اے ھکسانی پُژدد ءَ اَجب رنگیں کِسّو دل ءُ دیدگاں بھا زُور اِیت ءُ وتئی کنت کہ من نویسّگ لوٹ آں. بَلئے کئے اِنت کہ اے کِسّواں نَد ءِ جابِل ءَ گْوپیت ءُ گیدی یے نگاھانی اَمبار ءَ اِیر کنت کہ من ءَ بِہ وان……
ھما نَد پہ اے کِسّہ ئے نویسگ ءَ زنگ کَپتگ کہ لبّانی دْھیناں بْرھنگ اِنت، ھما اِھوالکارے زُبان گُنگ بیتگ ءُ کیمرہ ءَ کُدام بَستگ کہ اَرسانی میچّلیں ھکسانی کماھگ ءَ مُلمہ بِہ بیت. ھما راجدربَر پہ دو روچی ھیش ءُ وشینانی باپُشت ءَ وتا بَبا داتگ ءُ چو بے اَرواہ اِیں کُنٹ
ءَ واجھے دانکانی مُھتاجی اَنت. بِہ گْوش پَہ کئے ءَ اُوستانی بیرک ءَ بُرز دارے؟
چیاکہ! اے گُنگدامانی شھر ءُ اِدا کورانی سر کماشی اِنت ،گِلگ پَہ کئے ءَ؟
پمشکہ گْوش اَنت کہ ھَکّ ءُ اِنساپ چہ واجھے گِس دْپ ءِ باھوٹی ءُ دستانی بَندگ، سرے جَھل کنئگ ءَ نَہ رَس اِیت. بلکیں پَہ زُور ءُ تاکت پُلگ لوٹ اِیت.
چیاکہ گیدی ءِ ھرچاریں کُنڈ ءُ آتراپاں چوش اِیں دَروَرے گِندگ نَہ بیت کہ اِیردست اِیں راجاں وتئی ھَکّ ءُ مُز چہ دُژمن ءِ دَر ءَ پَہ دست بَندی ءُ سر جَھل کنئگ ءَ گِپتگ.
اَو! اے ھَبر پہ ھماھاں بَژنی ھَبرے کہ آ وتا اِنسانی ھَکّانی بیرکدار ءُ پَد جَن گْوش اَنت.،بَلئے بلوچ ءَ مُدام راست گْوشتگ کہ اُوست پہ وتئی باسکاں. اگاں دِگرے اُوست ءَ دل ماں رھسراں شھار دات گُڈ ءَ جَزم بزان کہ تھاریں شپ کدی بانگْواہ ءِ دْرنگ ءَ پَنگ نَہ گْوپیت.
من گوں وتئی اے چاریں دانکاں راستے کہ کوہ نہ ڈیرینتگ بَلئے اے ھبر ءَ پہ سِتک گْوش آں کہ مارا چہ دگرے گس دْپ ءِ پانگی ءَ گیش ءَ گیش وتئی کروتکگیں گِدان چِنّگ ءُ نزّارگی اِنت .اگاں ما وتئی گِدان ءِ پَلگارگ ءَ سوبین بیت اِیں گُڈ ءَ اَلّم گیدی ءِ کرّیں گوش بُج اَنت ءُ گُنگیں زُبان واز اِیت.
دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
