عزت بلوچ گوں سنگتاں انگت بیگواہ اِنت – نوھان نور بلوچ

عزت بلوچ گوں سنگتاں انگت بیگواہ اِنت

نوھان نور بلوچ

دی بلوچستان پوسٹ

بلوچ راج ءِ سر ءَ پاکستان 27 مارچ 1948 چہ زُلم ءُ زوراکی کنگ ءَ اِنت ھما روچ ءَ کہ پاکستان بلوچ راج ءِ وت واجھیں سرڈگار ءِ سر ءَ کبزا کنت ھما روچ ءَ بلوچستان ءِ دلبند ھونیگ بیت. ھما روچ ءَ بگِر داں روچ ءِ مرچی پاکستان ءِ زوراکی برجاہ اِنت ءُ بلوچ راج ءَ کدی ھم اے زُلم ءُ زوراکیانی دیم ءَ سر جھل نہ کُرتگ بلکین ءَ مدام گوں دلیرّی ءَ چو کوہ ءَ دیم ءَ اُوشتاتگ اَنت ءُ بلوچ راج ءَ کدی وتی سر ءَ بوؤکیں زلم ءِ ھلاپ ءَ ھاموش نہ بوتگ اَنت بلکین ءَ ھر وھد ءَ وتی توار چِست کُرتگ گُڑا پاکستان پہ زور ءُ دغا بلوچ راجی جُنز وھدی تور ءَ ھتم کُرتگ بَلے سرجم ءَ ھتم کُرت ءِ نہ کُرتگ. ھنچوش کہ نواب نوروز ھان بلوچی راجی آجوئی ءِ واستہ کوہ روت گلامی ءِ ھلاپ ءَ جنگ کنت گُڑا پاکستان گوں وتی مکّر ءُ پِریباں نواب نوروز ھان ءَ پاکیں کُران ءَ دیم ءَ دار اِیت چہ کوہ ءَ جھل ءَ کار اِیت پد ءَ نواب شھید نوروز ھان ءَ گوں سنگتاں گِرپتار کنت ءُ پد ءَ شھید نواب نوروز ھان ءِ ھپت سنگت ءَ پاھو دنت ءُ نواب شھید نوروز ھان ءَ اُمر ءِ کید دنت شھید نواب نوروز ھان جیل ءِ تہ ءَ شھید بیت. بَلے بلوچ راج کدی ھاموش نہ بیت .شیرو مری ءُ آدگہ سنگت ھم جنگ کن اَنت.بَلے پاکستان ءَ پہ ایمنی نِندگ ءَ نئیل اَنت. لھتیں وھد ءَ پد جنگ بند بیت.

2000 ءِ دھک ء َیکبرے پد ءَ بلوچ راجے وانندھیں پُسگ گوں سائنسی بنیاد ءَ بلوچ ڈیھ ءِ آجوئی ءِ توار ءَ بُرز کن اَنت اے جنگ پردانی دست ءَ یل بیت ءُ گوں پارٹی ءُ تنظیمانی تہ ءَ بندات بیت . بلوچ پُسگ کسی زاتی سپاھی نہ بنت. بَلکین ءَ آ گُلزمین ءِ سپاھیگ بنت ءُ گوں وتی پارٹی ءُ تنظیمانی پابند بنت.
ھمے پارٹی ءُ تنظیمانی تہ ءَ یک بلوچ نودربرانی گلے ھم ھوار بیت. آ بی ایس او آزاد اِنت.

چوناھا بی ایس او 1960 ءَ بنگیج کنگ بیت. بَلے کدی بی ایس او پہ وت تچکیں راھے گپت نہ کنت. دوھزار دو ءَ واجہ داکتر اللہ نزر ءِ سروکی ءَ بی ایس او آزاد جوڑ کنگ بیت. اے بی ایس او آزاد ھما 1960 ءِ بی ایس او اِنت کہ مرچی بی ایس او آزاد ءِ نام دیگ بیت. آزاد پمیشکا ایر کنگ بیت کہ چِد ءُ پد بی ایس او آزاد کدی پاکستان ءِ کاسگ چٹّیں پارٹی ءُ ٹولیانی بھرے جوڑ نہ بیت. بَلکین ءَ یک آزادیں ءُ خودمختاریں نودربر گلے بیت .آ بلوچ نودربرانی تہ ءَ سنچ ءُ زانت پِیداک کنت ءُ آھاں بلوچ راجی زبان ءُ وت واجھی ءِ بابت سرپدی دنت ءُ گوں وانگ جاھاں بندوک بیت.

بی ایس او آزاد ءِ سنگت گل ءِ رھبند ءِ وڑ ءَ وتی کاراں دیم ءَ بران کن اَنت بلوچستان ءِ اِناں بلکین ءَ دگنیا ءِ کُنڈ مہ کُنڈ ءَ وتی توار ءَ سر کنت ءُ مرچی دگنیا ءِ بازیں ڈیھانی تہ ءَ بی ایس او آزاد سر بوتگ ءُ سربوگ ءَ اِنت.

پاکستان وھدے گِند اِیت کہ بلوچ نوجوان ھاص کر بلوچ نودربراناں بلوچ راجی جُنز ءِ تہ ءَ یک بلاھیں کِردے ھست. گُڑا پاکستان دوھزار نُھ ءَ بی ایس او آزاد ءِ سنگتانی چُست ءُ شھید کنگ بندات کنت.

مرچی بی ایس او آزاد ءِ بازیں سنگتے شھید ءُ بیگواہ کنگ بوتگ ءُ انگت بوگ ءَ اَنت آ بیگواھیں سنگتانی تہ ءَ بی ایس او آزاد ءِ گْوستگیں مستریں کُمک کماش زاکر مجید، کماش زاھد بلوچ، بنجائی شِنگکار شبیر بلوچ،کبیر بلوچ، التاپ بلوچ ءُ آدگہ بازیں سنگتے مرچی پاکستان ءِ تھاریں زندانانی تہ ءَ بندیگ اَنت ءُ دگہ بازیں سنگتے شھید بوتگ. آ شھید بوتگیں سنگت بی ایس او آزاد ءِ گوستگیں کارگُشاد شھید رضا جھانگیر، شفیع بلوچ، کمبر چاکر، الیاس نزر، کمال بلوچ ءُ دگہ بازیں سنگتے ءَ پہ وتی ماتیں گلزمین ءَ ھون رتکگ انگت ھم پہ کُربانی ءَ ساڑی اَنت.

15 مارچ 2013 ءَ پاکستان چہ کلم ءُ کتاب ءِ تُرس ءَ بی ایس او آزاد ءِ سر ءَ بندش جنت بَلے بی ایس او آزاد اے بندش ءَ مان نیاریت ءُ اِیت ءُ وتی کاراں گیشتر تُرند کنت.

پاکستان چار اِیت کہ من بی ایس او آزاد ءِ بازیں سنگتے شھید ءُ بیگواہ کُرتگ. بَلے انگت بی ایس او آزاد ءَ وتی کار نہ داشتگ اَنت بلکن ءَ گیشتِر تُرند کُرتگ اَنت۔ گُڑا پاکستان یکبرے پد ءَ 15 نومبر 2017 ءَ بی ایس او آزاد ءِ سر ءَ یک بلاھیں اُرشے کنت . بی ایس او آزاد ءِ کارگشاد عزت بلوچ، بنجائی باسک نصیر بلوچ، بنجائی باسک حسام بلوچ ءُ بی این ایم ءِ باسک رفیق بلوچ ءَ کراچی ءَ موسمیات ءَ چہ بیگواھیں نصیر بلوچ ءِ لوگ ءَ چہ بیگواہ کنت تاں روچ ءِ مرچی بیگواہ اَنت.

مرچی نصیر بلوچ ءِ زھگ ماہ رنگ ءُ آدگہ بیگواھیں مردمانی کئول ءِ مردم پریس کلب ءَ شُد ھرتالی ءَ نشتگ اَنت. مرچی ھزاراں بلوچ پُسگ چو عزت بلوچ ءُ اے دگہ سنگتانی وڑ ءَ بندیگ اَنت. بَلے دنیا مرچی تماشاھی جوڑ بوتگ .مرچی دنیا ھاموش اِنت ءُ ھمے ھاموشی ءِ سبب ءَ مرچی بلوچ راج ءِ سر ءَ پاکستان زُلم کنگ ءَ اِنت. مرچی مئے ماس ءُ گھار ماں دگّانی سر ءَ وتی دیدوکانی شوھاز ءَ اَنت. مرچی بلوچستان ءِ تہ ءَ پاکستان ءَ زُلم ءُ زوراکی یے یک جنگجاھے جوڑ کُرتگ۔ مرچی بلوچ گلزمین ءِ دلبند ھونیگ اِنت . باید اِنت دنیا بلوچ راج ءِ سر ءَ بوؤکیں زُلم ءِ ھلاپ ءَ گامگیج بُزور اِیت ءُ بلوچ راج ءَ چہ اے زُلم ءُ زوراکیاں آجوہ بکنت۔ دانکہ بلوچ راج ھم چو آدگہ راجانی وڑ ءَ وتی زند ءَ پہ وشھالی بگْوازین اِیت ۔

بلوچ راج آجو بات

بلوچستان زندگ بات