شہید ھاسل قازی پنام ءِ قندیل بلوچ
نبشتہ.: سرباز وفا
دی بلوچستان پوسٹ
ھمت مردم ءَ سوب مند کنت ھمت مردم ءَ وشانام کنت بلوچی ءَ گشنت ھمت ءِ مرداں مدت ءِ ھدا ھمت کنوک ءَ واجہ ھُدا وت مدت کنت ۔ اے یک راستی ءِ دنیا ءِ تہا کجام کہ کار بہ بیت چہ ھمت ءَ کنگ بیت ھمت مردم ءَ بے ترس ءُ بہادر کنت سنچ ءُ زانت ءِ نیمگ ءَ رائی کنت ءُ بے ھمت ءَ ھچ بوت نہ کنت ۔ آجوئی ءِ جنگانی تہا نوجوانانی یک بلائیں کِرد ءِ گندگ بیت نوجوان راجانی باندات انت ۔ دشمن راج ءِ تبائی ءُ بربادی ءِ ھاترا گیش ءَ چہ گیش نوجواناں تباہ ءُ برباد کنت نشہ آماچ کنت تانکہ راج تباہ بہ بیت پرچہ کہ نوجوان تبکہ تباہ بیت گُڑا الم ءَ راج ءِ تبائی سد در سد بیت ۔
ھمے رنگ ءَ پاکستان بلوچ ورناہانی تبائی ءُ بربادی ءِ مدام پُشت ءَ کپتگ ءُ بلوچ ورناہاں تباہ ءُ برباد کنگ ءَ اِنت بلوچ نوجواناں ہر جاہ ءَ گار ءُ بیگواہ کنگ ءَ اِنت ءُ آہانی مسک کُرتگیں لاشاں دور دیگ ءَ انت بلوچ نوجواناں ٹارگٹ کلنگ ءَ بگر داں اگواہ ءُ بیگوائی ءَ دُرستیں نیمگ ءَ وتی زالمی ھملاں کار گراں پیداک انت ۔
شہید ھاسل قازی یک مھنتی ایں سنگت ءِ اَت ءُ آواران مشکے ءَ نندوک ات واجہ ارز مھمد ءِ زھگ ات واجہ ءِ مستریں زھگ پداجان ءَ چہ شالکوٹ ءَ پاکستانی پوج ءُ چیریں ادارہانی کارندہاں چست ءُ کُت لہتیں وھد ءَ بیگوائی ءَ چہ پد آھی ھمرائی ءَ چار بلوچ پُسگ مشکے آوران ءَ ہیلی کاپٹر ءِ سرا چہ دور دات اَنت ۔
شہیدهاسل ءِ براسءِ لاش ریاستی ءِ کارندہاں پمیشکہ دور دات تانکہ ھاسل چہ وتی کار ءَ دست کَش بہ بیت بلے چہ براس ءِ لاش ءِ کپگ ءَ ھاسل ءِ پادانی تہا ھچ رنگیں لرزگ ءِ نہ یتک بلکیں انگت ایمان ءِ مھکم ءُ توان ءَ بوت انگت روچ پہ روچ وتی کاران گوں ھمگرنچی ءَ دیما روان بوت ۔ منا ھاسل جان لہتیں کُرتگیں کار انگت یاد انت 2016 ات من دراج کور میتگ ءَ شُتاں بی این ایم ءِ لہتیں کار ءِ واستہ گُڑا ھاسل جان ءَ ھمودا من دیست سلام ءُ دروت ءَ پد نند ءُ نیاد کُت گُڑا ھاسل جان گُشت کہ سنگت من تو رواں مشکے منا بی ایس او ءَ لہتیں کار داتگ ھما کار کنگی انت تو ھم وتی بی این ایم ءِ سنگتان گندے ھال ءُ اھوال ءِ کن ءِ جوانتر انت ۔
ھاسل جان گُشت کہ منا مشکے بازار ءَ پمپلیٹ کنگی انت گُڑا من یک برے ھجکہ ءُ هیران بوتاں کہ مشکے بازار ءَ سجا پوجیاں وتی ھمگیر ءَ کُتگ تو چوںْ ؟ پمپلیٹ کُت کن ءِ ھاسل جان ءَ جواب تَرینت ءُ گُشت کہ ارادہ مھکم بِباں گُڑا ھرچیز بوت کنت ھچ مُشکل نہ انت ہرچیز بوت کنت بس ھمت ءُ توکل لوٹیت ھمت ءِ مرداں مدت ءِ ھُدا ۔
پدا مزاک ءِ کُت ءُ گُشت ءِ من وتی بی ایس او سنگتاں زوراں پمپلیٹ کناں پریشان مبو ترا نبراں ھاھاھاھاھاھا من گُشت من کایاں مسلہ نہ انت من گُشاں تئی واستہ شَر نہ انت پدا گُشیت منا کُربانی دئیگی انت پمپلیٹ ءِ بلائیں ارزشت ءِ پرچہ ماں وتی توار ءَ جائے ءَ پمپلیٹ ءِ زریعہ چہ سر کُت کناں مارا وتی توار لازم سر کنگی انت ۔ من گُشت من کایاں گوں گُشت ءِ میا من من رواں سنگت نشتگاں منی ودار ءَ ما رواں ھمے کاراں کناں من گُشت برو شمارا اللہ مدت بات ۔
ھاسل دومی روچ ءَ مئے مِلگ ءَ اتک ءُ گُشت ءِ من کار کُتگ من ایران بوتاں کارے ءُ ھچ رنگ ءَ وڈ نبوتگ تو چون کُت ؟ ھاسل جان ءَ گُشت من گوں دگہ دو سنگت ءَ گجر ءِ جنگل ءِ تہا شپ ءَ شُت ءُ داشت پدا گربام ءِ وھد دُریں بازار پمپلیٹ کُت ءُ بازیں جاہاں وال چاکنگ کُت ءُ بازیں راہ بدل کناں نی شمے کِرا اتکاں گُڑا من گُشت ترا آپرین انت ۔ ھاسل جان ءَ گُشت “منا سلام مکن ھما شہیداں ءُ گار ءُ بیگوائیں سنگتاں سلام کن کہ منا ھمے توکل ایش داتگ” ۔
ھمے رنگ ءَ وتی تنظیمی پروگراماں گوں دست گٹی ءَ شُت کولواہ ءَ 5 اکتوبر 2016 ءَ پاکستانی پوج یک بلائیں آپریشن ءِ بندات کُت ھاسل جان ءَ ھما آپریشن ءَ شہید کُت ۔ شہید ھاسل جان وتی دائمی واب ءَ کولواہ کُنہری گورستان ءَ واب انت ۔
قندیل جان ءِ پِکر ءِ رژنائی انگت بلان انت سیائیں شپاں رژنا کناں اِنت ، شہید ھاسل پنام قندیل جان ءَ سُہرچکیں دروت من پیش کناں ۔
دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
