شھیدانی رِتکگیں ھون گار نہ بنت
نبشتہ کار-فقیر بلوچ
دی بلوچستان پوسٹ
برے برے من نِنداں جیڑ آں کہ اے چونیں مھرے کہ مردم پہ وتی ساہ ءُ سرانی نَدر کنگ ءَ چَکّ ءُ پد ھم نہ بنت ءُ مدام پہ سرانی نَدر کنگ ءَ ساڑی اَنت، مھر یک ھنچیں چیزے کہ چہ مرگ ءَ دیما تِر اِنت ءُ مرگ ءَ یک کسانیں چیزے سرپد بیت۔
ھمے مھر ءِ برورد اِنت کہ مرچی ماتیں گلزمین ءِ پرزند وتی ڈیھ ءِ واستہ سرانی نَدر کنگ ءَ چک ءُ پد نہ بنت مرچی گلزمین ءِ ھزاراں پُسگ ءَ پہ وتی ماتّیں ڈیھ ءِ واستہ وتی سر اِش نَدر کُرتگ ءُ انگت ھم کنگ ءَ اَنت . مرچی ھزاراں پُسگاں وتی لانک پہ سرزمین ءِ آجوئی ءَ بستگ دژمن ءِ دیم ءَ چو کوھیں کلات ءَ مِک اَنت۔
مرچی 13 گْوپشان (نومبر) اِنت . ھمے روچ بلوچ راج ءَ پہ وتی شھیدانی یات ءَ گِچین کُرتگ پرچاکہ بلوچ راج ءِ شھید ھزارانی ھساب ءَ اَنت. مرچی ھزاراں بلوچ پرزند پہ وتی ڈیھ ءَ جان اِش نَدر کُرتگ ءُ ھزاراں ھنچیں شھید ھست اَنت. کہ آھانی بابت ءَ ما سرپد نہ اِیں ءُ اگاں ما یک روچے پہ شھیدانی بابت ءَ گچین مکن اِیں. گُڑا گوں شھیداں نا انساپی بیت ءُ یک سالے ئِے 366 روچ اَنت۔ بَلے بلوچ ڈیھ ءِ شھید ھزارانی ھساب ءَ اَنت.پمیشکا بی ایس او آزاد ءَ ھمے درد ماریتگ گُڑا دو ھزار دہ (۲۰۱۰) ءَ ھمے روچ گچین کُرتگ کہ ما وتی راجی شھیدانی واستہ یک روچے برجم دار اِیں . اے روچ پمیشکا بی ایس او آزاد ءَ گچین کُرتگ کہ ھمے روچ ءَ بِزاں ۱۳ گْوپشان(نومبر)۱۸۳۹ ءَ ماں انگریزانی ھلاپ ءَ ھان مھراب ھان گوں وتی سَے سد سنگت ءَ جنگ کنت ءُ انگریز ءِ بازیں مردمے مُردار بیت ءُ ھان مھراب ھاں گوں وتی ھمراھاں شھید بیت. بَلے وتی سر اِش جھل نہ کُرتگ. پمیشکا بی ایس او آزاد ھمے روچ ءَ را پہ ھما شھیدانی روچ ءِ درگت ءَ برجم دارگ ءِ جار ءَ جتگ کہ اگاں بلوچ ڈیھ ءِ پرزند شھید بنت گُڑا ما آھانی یات ءَ ھمے روچ ءَ برجم دار اِیں. گُڑا مرچی ھمے روچ ءَ بلوچ راج دگنیا ءِ کُنڈ مہ کُنڈ ءَ وتی شھیدانی یات ءَ دیوان برجم دار اَنت ءُ آھاناں یات کن اَنت۔
گُش اَنت دگنیا ءِ تہ ءَ ھما راج زندگ بنت کہ آ وتی شھیداں ءُ وتی گُلزمین ءَ بے ھیال نہ کن اَنت ءُ مدام پہ کُربانی ءَ ساڑی بنت گُڑا آ راج کدی گار ءُ بیگواہ نہ بیت. بیگواہ ھما راج بنت کہ نہ وت ءَ زان اَنت ءُ نہ وتی ڈیھ ءِ شھیداناں. گُڑا آ راجانی نام ءَ ڈس گار بیت۔
مرچی بلوچ راج ءِ ھزاراں پُسگاں وتی سر پہ وتی ڈیھ ءَ نَدر کُرتگ ءُ شھیدانی ھون اَلّم ءَ رنگ کار اَنت ءُ شھیدانی ھون ھاکانی تہءَ گار ءُ بیگواہ نہ بنت. ھونے پہ حقءَ ریچ اِیت ھاک ءِ تہءَ بیگواہ نہ بیت۔
مرچی اگاں ما وتی شھیدانی واستہ دو ساھت ءَ ھاموش بنت یا ھمے روچ ءَ شھیداں یات کن اِیں. گُڑا اَلّم مارا وتی شھیدانی لوٹ دیم ءَ برگی اِنت ءُ ھما ماتانی درد مارگی اِنت کہ آھانی تنگوھیں بچ پہ وتی گلزمین ءَ ندر بوتگ اَنت ءُ مارا وتی شھیدانی رتکگیں ھون اے گُلزمین ءِ تہ ءَ گار ءُ بیگواہ کنگی نہ اِیں. مارا شھیدانی ھونانی سوگِند ورگی اِیں کہ ما وتی ڈیھ ءُ وتی شھیدانی ھوناں ءُ وتی ڈیھ ءَ چہ بے ھیال نہ بِئیں ءُ شھیدانی ارماناں منزل ءَ سر کن اِیں. ھما منزل کہ پہ آئیءَ شھیداں وتی ھون رتکگ اَنت۔
بلوچ راجی شھیداناں سُھریں دروت
بلوچ راج زندگ بات
بلوچستان آجوہ بات
دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
