شال ءِ ارس ءُ پارلیمنٹ ءِ دپارواریں مُلا
اکیل مراد
دی بلوچستان پوسٹ
دوستیگیں مردم بیگواہ اَنت لوگانی دیمپان بیگواہ اَنت چُکانی پِت بیگواہ اَنت زالانی اَدلس بیگواہ اَنت درست ھَنچش بیگواہ اَنت کہ آیانی ھال ءَ کَس ءِ ھم کنگ ءَ نہ اِنت۔
اے دَہ سال ءَ گیش اِنت کہ ماما ءَ شال ءِ سارتیں دامن داشتگ ءُ بیگواھیں مردمانی اکس بَڈ ءَ اَنت ءُ بَرے اے اِنساپکار ءِ دیم ءَ بَرے آ انساپ کار ءِ دیم ءَ وتی توار ءَ سَر کنان اِنت۔
ماما ءَ گوستگیں وھداں لھتے کسانوکیں جنکوکانی ھمراھی ءَ الی ھیدرءِ ھمراھی ءَ چُنت مِل پادانی ءَ گواز کُرتگ اَت۔
مروچی ھما پادانی تراول پد ءَ نوک بیان اَنت بَلے اے رندی تراولاں ارس ھم گون اِنت گوں ۔
اے ارس ایوک ءَ یک میتگے ءَ چہ نہ اِنت یک شھرے ءَ نہ اِنت اے ارس سیما، انسا، مھرنگ، زرینہ، دگہ بازیں کَچے ءَ اتکگیں کہولانی ارس اَنت اے ارسان ھنچُش گمیں دردانی لمب ایر داتگ اَنت ھمک نیمگ ءَ ایوک ءَ چیھالانی توار پیداک اِنت۔
ھمک نیمگ ءَ زھگانی سارتی ءِ باپ پیداک اِنت ھمک نیمگ ءَ ماتانی جیڑگی گپ پیداک ءَ اَنت ۔
ھمے ارساں شال ءِ پریس کلب مِسینتگ، شال ءِ دَگ مِسینتگ اَنت میتگانی ورناہ جنزیتگ اَنت۔
بَلے ھما مردم مروچی ھَنچش بے توار اَنت کہ گوشگ ءَ بلوچستان ءَ وتی زھگانی زمین ھَنچش دراج کرتگ کہ آیانی گریوْگ پَلستین ءَ شتگ اَنت ھنچش زمین پراہ ءُ شاھیگان کرتگ آئی ءِ زھگ کشمیر ءِ اِسپیتیں بَرپانی سر ءَ شتگ اَنت ۔
ھمے مُلا تبیں ھیالدار ءُ ایماندار ءُ اسلام ءِ پاک تاک ءِ وانوک وتی اِسپیت ءُ پاک دامنی ءِ رِیشاں کُنڈ ءُ کالاکولا تیل ءَ چَرپیش کن اَنت ءُ درستیں مردمانی دیم ءَ اوشت اَنت۔
ھَنچش پاک دامنی ءُ ایمانداری ءِ گپ کن اَنت ءُ ھمک چیز اسلام ءُ ھلال ءُ ھرام ءِ پَرک ءُ پیری ءَ الکاپ ءَ گشین اَنت ایندگہ ھَند ءُ دمگاں مگسے ءِ مَرگ ءِ ھال بیتیں۔
ھمے اسپیت ءُ پاک تاک ءِ وانوک دگانی سر ءَ دَرکپ اَنت ءُ لس گریب ءُ دو وھد ءِ لاپ شوھازکارانی گاڑی ءُ دکاناں بُن دیان اَنت ھَنچش ھمے سماہ بوھگ ءَ ایں ھمے پاک تاک وانوکانی ءُ اسلام ءِ ھرام ءُ ھلال ءِ گپ جنوکانی لوگ ءِ تہ ءَ اُرش کرتگ ءُ سرجمیں چُک ءُ جنین کُشتگ ءُ ٹکر ٹکر کرتگ
اَنت ۔
چُنت سال ءَ پیسر آسیہ نامے زالے ءِ دپ ءَ گپ ءِ لَگشتگ ءُ ھمے سر ءَ پاک تاک ءُ اسلام ءِ مھاپیزاں دگ ءُ دکان ءُ گاڑی پہ لس گریب ءُ نیزگاراں ھِچ پَش نہ گپت درست بُن دیان کُرت اَنت ۔
بَلے کَس ءَ ھم تُک ءُ نُک نہ کرت پرچا اے ماندارگ بوھگ ءَ اَنت پرچا اے وئیل بوھگ ءَ اَنت چی ءِ سبب ءَ بوھگ ءَ اَنت ھرکس ءَ وتی دل ءِ مئیل ءَ سوتک ءُ پروشت ءُ پروش کُرت لاپ سیری ءُ کرس چکاری کُرت ناکہ پاکستان ءِ پارلیمنٹ ءَ چہ ساہ ءِ کَشگ بیت ناکہ پِنڈی ءُ جی ایچ کیو ءَ پوجیانی تہ ءَ ترندے گامگیج زورگ بیت ھرکس ءَ وتی دل ءِ مئیل کُرت۔
پد ءَ ھمے گپ ھمے جاہ ءَ کئیت اوشتیت کہ ما بلوچ اِنت مئے نام بلوچی اِنت ما بلوچی زبان ءَ گپ جنگ لوٹ اِنت ما بلوچی ءَ بَرز کنگ لوٹ اِنت ۔
مئے ورناہ ءُ کماش ءُ زالبولاں وتی ھک ءِ لوٹ کرتگ کہ مروچی زندانی اَنت بلے پہ بلوچاں پاکستان ءِ عدالت ءُ پارلیمنٹاں چہ ھِچ انساپ ءِ پشت نہ کپتگ ۔
اگاں انساپ ءِ پہ بلوچاں پَشت کپتگ گڑا آ ایوک ءَ یا بیگواھی یا کوشت ءُ کوشی اِنت۔
مروچی شال ءَ سیما، انسا، مھرنگ، بازیں کساسے ءَ بیگواھیں مردمانی چک ءُ جنین ارس ءِ ھار ءَ گوارینگ ءَ اَنت آیانی لوٹ بس ھمیش اِنت کہ مئے دوستگیں مردم کُشتگ اَنت یا زندگ اَنت یا پُرس بہ داریں یا آیانی شوھاز ءَ در بہ کپ ایں۔
بَلے ھمے سیاہ چُتیں ملایانی زبان ءَ سیاہ زُمے بہ دجات کہ مروچی آ سیما، انسا، مھرنگ ءِ ارساں چہ بے توار اَنت ۔
دلگوش :- اے نبشتانک ءِ تہ ءَ ھما ملا ءُ ملانڈاں گوشگ ءَ اَنت کہ پارلیمنٹ ءِ تہ ءَ نیشتگ اَنت ءُ وت ءَ بے سماہ کرتگے۔
دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
