سیزدہ نومبر ءُ بلوچ جنز
نبشتہ کار: بیزن بلوچ
دی بلوچستان پوسٹ
13نومبر بلوچ سیاسی راجدپترے تہا یک ہما اہمیں روچے کہ اے روچ ءَ راج وتی ہما نرمزاراں یاد کنت کہ آیان جہد آجوئی ءِ سیاسی ءُ سلاہ بندیں محازاں وتی نگراہیں ساہ پہ وتی راجی اجتماعی مفاداں ندر کتگ۔
اے اجتماعی مفادانی تہا راجی آجوئی، دنیا ءِ تہا راج ءِ جداہیں پجار، چاگردی ءُ اقتصادی وشحالی سرفہرست انت۔
مئے شہید بوتگیں نرمزار کرز انت کہ راج آیانی قربانیاں عزت ءُ احترام ءِ نگاہاں بچارات ءُ آیاں یاد بکن اَنت۔
شہید بوتگیں راجی جہدکاراں پہ یک امیت ءُ مقصدے ءَ وتی ساہ ندر کتگ۔ شہدانی آ امیت انوگیں جہد ءَ وتی منزل ءَ سر کنگ انت۔ بزاں یک آزادیں بلوچ ڈگارے ءِ واھند ءُ وت واجہ بوھگ انت۔
باہد وا ش انت کہ 13نومبر ءَ بلوچ لس مہلوک ءُ درا سیاسی جہد کار ءُ سرمچار جنز ءَ بہر زرتگیں سیاسی ماس پارٹی ، وانندہ گل ءُ سلاہ بندیں گلاں اے جست بکن انت کہ شہیدانی ہمے آخری امیت ءِ دست گرگ ءِ واستہ شمئے اَدّا پہ دگہ سے یا پنچ سالہ چے چے پروگرام است۔
دومی جست اے بہ بیت کہ شمئے گوست ءِ سے سالی یا پنچ سالہ پالیسیاں مجموعی حوالہ ءَ جنر چے نپ ءُ تاوان داتگ۔
باہدیں 13نومبرھساب کتاب روچے بہ بیت۔ شہیدانی ھون ءِ ھساب بہ بیت۔ ٹپ ءُ ٹولیئیں جونانی ھساب بہ بیت۔راجی گل ءُ رہشون جست کنگ بہ بنت کہ گوست ءَ زرتگیں فیصلہ پہ بلوچ آزادیں ریاست ءَ گامگیج بوتگ انت یا راج ءَ چہ قومی جنزءَ دل پروش کنگ ءِ عمل۔
باہد وا اش انت کہ13نومبر ءَ راجی گل پہ آزادی دست گرگ ءِ وتی سمتانی سرا چمشانکے بدئے انت کہ مئے جنزگ ءِ سمت شر انت اگاں نہ آئی تہا کمے مٹ ءُ بدلی آرگ لوٹ ات۔پرچہ کہ ہما سفر کہ آئی سمت شر نہ انت یا انگہ ٹہینگ نہ بوتگ، گڑا اے وا پکہ انت کہ مسافر وتی منزل ءَ سر نہ بنت۔
13نومبر ءَ انوگیں جنز ءِ وسعت ءِ سرا یک چمشانکے دیگ بوتیں کہ آیا راجی آجوئی جنز ءِ انگوگیں وسعت پہ عمل ءَ کافی انت اگہ نہ۔ پرچہ کہ مرچی باز ہند ءُ دمگ است انت کہ اود ءَ انگہ جہد ءِ پیغام سر نہ انت۔ باہد وا ش انت کہ جہد ءِ پیغام بلوچ ءِ لوگ لوگاں سر بوتین ات۔ پرچہ کہ داں بلوچ لس مرد م مزنیں کساسے ءَ جنز ءِ بہر مبنت، گڑا جنز پہ منزل ءَ سر بوہگ ءَ سک باز وہد زور اِت۔
باہد وا اش انت کہ 13 نومبر ءَ راجی جنز ءِ رفتار ءِ سرا یک چمشانکے دیگ بوتیں ات ءُ وتی دیما اے جست ایر بکتیں ات کہ جنز ءِ انوگیں رفتار تحریک ءِ حق ءَ انت اگاں نہ۔ پرچہ کہ راج ءِ اَدّا انو وھدءِ سک کمی انت، دژمن گوں تیزی ءُ پہ عقل ءُ ہوش راجی نسل کشی ءَ کنگ ءَ انت۔
13نومبر ءَ جنز ءِ مقصد دست گرگ ءِ 21می کرن ءِ وھدی طریقہ کارانی سرا گپ ءُ تران بوتیں ات ءُ زیر استعمال طریقہ کارانی نپ ءُ تاوانانی سرا تران بوتیں ات۔اے روچ پہ جنز ءَ یک پراہ ءُ شاہیگانیں آدینکے بوتیں ات کہ آئی تہا ما جنز جوانیں وڈے ءَ بدستین ات ءُ ما اندازہ کت بکتیں کہ آیا اے ہمے جنز انت کہ آئی ضرورت پہ بلوچ ءِ غلامی ءِ ھلاس کنگ ءُ پہ آجوئی ءِ دستگرگ ءَ انت۔
اے روچ ءَ ما وتی شہیدانی یاد کنگ ءِ ہمراہی ءَ آیانی آخری امیت ءِ دست گرگ ءِ انوگیں زمانگءِ ہما ضرورتانی سرا گپ ءُ تران بکوتیں کہ جنز ءِ تہا آیانی کمی چون پورا بوتین ات انت۔
اے روچ ءَ ما عہد بکوتیں ات ءُ ہمے کمی ءُ نزوریانی ھلاس کنگ ءِ فیصلہ بکوتین ات۔
اگاں سال پہ سال ما وتی بجا بگریں ءُ ہمے وڈا ھساب داد بکن ایں گڑا اے مئے ایمان انت کہ جنز گو جوانی ءَ وتی منزل ءَ الم سر بیت۔
دی بلوچستان پوسٹ : اے نبشتانک ءِ تہا درشتان کُتگیں ھیال ءُ لیکہ نبشتہ کار ۓ جندءِ گنت، الم نہ اِنت کہ دی بلوچستان پوسٹ رسانک نیٹورک ایشانی منوک بہ بیت یا اگں اے گل ءِ پالیسیانی درشانی اِنت۔
