گوادر کے علاقے پسنی میں پانی کی قلت اور بجلی بندش کیخلاف اہلِ علاقہ سراپا احتجاج
دی بلوچستان پوسٹ ویب ڈیسک کو موصول ہونے والی آمدہ اطلاعات کے مطابق بلوچستان کے ضلع گوادر کے علاقے پسنی چُربندن کے مکینوں کی جانب سے پانی کی قلت اور بجلی کی بندش کے خلاف احتجاج۔
ذرائع کے مطابق مظاہرین نے احتجاجاً مکران کوسٹل ہائی بند کردیا ہے، جس کے باعث کراچی سے گوادر اور ضلع کیچ جانے والی گاڑیاں پھنس گئیں ہیں۔
واضح رہے اس سے قبل بھی پسنی کے مختلف علاقوں میں پانی کی قلت اوربجلی کی عدم فراہمی کے خلاف احتجاجی مظاہرے کیئے گئے ہیں۔
ذرائع کے مطابق اس وقت بلوچستان کا ضلع گوادر اور گردو نواح کے علاقے شدید آبی قلت کا شکار ہیں، جہاں پینے کا پانی بھی میسر نہیں۔ جس کی وجہ سے اہلِ علاقہ آئے روز احتجاج پر مجبور ہورہے ہیں۔ بہت سے علاقوں میں لوگ انتہائی مہنگے داموں ٹینکروں سے گندلا پانی خریدنے پر مجبور ہیں۔
مقامی ذرائع کے مطابق ضلع گوادر اور گردو نواح میں پینے کے پانی کے چوری کے واقعات میں بھی اضافہ دیکھنے میں آیا ہے، جہاں شہری پینے کے دستیاب پانی کو گھروں کے اندر تالا لگانے پر مجبور ہیں۔
