تپاک ءُ ھوار بوگ ءِ بلائیں ارزشت اِنت
سرباز وفا
دی بلوچستان پوسٹ
اگاں ما دگنیائے تہا پچاراں کجام راج وت ما وت ءَ تپاک بوتگ آں چنکہ وشحالاں اگاں کجام تپاک نیاں چنکہ بزگاں۔ بلوچیءَ یک گپ ءِ کن انت بینگ مکسک تپاک ءُ ھوار انت وردن ءِ شهدیں اے یک راستی ءِ ما کُل گندگ ءَ یاں بینگ دیست ءَ وارت ءَ بینگ ءِ وشی مکسکانی ھوارکاری ءِ برورد انت۔
من مدام پیریں مردمانی دیوان ءَ شتاں گپ گوش داشت یک روچ ءِ یک پیریں مردے ءَ کسہ ءِ کُت بوتگ یک بادشاه ءِ اے بادشاه ء سئے بچ بوتگاں بادشاه یک روچ ءِ گوں وتی بچاں نشت ءَ دیوان ءِ کرُت ءَ بادشاه ءَ گشت ءَ بچاں من مرچی شمے تاکت ءَ چاریں باریں شمارا چنکہ تاکت هست؟ پیریں مرد ءَ باکس ءِ ڈیل ءِ مثال دات بادشاه ءَ وتی ہر سئیں بچاناں یک یک ڈیل ءِ داتگ بزوریں ڈیل ءَ بپروشیں بچاں هندت ءَ گشت ءَ ما چو کمزور نیاں اے ڈیل ءَ پُروشت مکن آں هرکس ءَ وتی ڈیل پُروشتگاں۔ بادشاه ءَ گِت ءَ باکس ءِ درائیں ڈیل یک سرا کُرتگاں وتی بچاں ءَ داتگاں ءُ گشتگی نوں گون وتی دستاں اے ڈیلاں پروش اِت۔ نوں هرکجام زهگ زوریت ءُ زورجنت ڈیل نہ پرُشاں بادشاه ءَگُشت ءَ اے هما ڈیل انت شما یک یک ءَ پروشت آں نوں شما پُروشت نہ کنیں؟ زهگاں همئے پسہ دات ابا اے ڈیل باز انت بادشاه ءَ گُشت اگاں شما یک یک بوت ایں شمارا هرکس پرُوش دات کنت، بلئے شما اگں ھوار بوت ءِ هروڑیں تاکت ءِ بہ بیت شمارا پُروش دات نہ کنت ۔
راجانی تبائی جوپہ ، لالچ ، هسد ، کینگ ، یک ءِ دومی ءَ چہ پرک کشگ ، وتی مزن لیکگ ءُ بے برداشتی وڑیں کاراں چہ بندات بیت۔ اگں راجانی تہا اے وڑیں کار بوان کناں آودا راج تبائی ءِ نیمگ ءَ روانت۔ قبضہ گیر اے وڑیں راجاں پہ ارزانی گلام جوڑ کننت راج ءِ چہ گلامی ءَ رکینگ ءِ ھاترا راجدوستیں مردم جیڑانت پہ وتی راج ءِ آجو کنگ ءِ هاترا جہُد ءُ کوشست کناں۔ اے هما مردم باں کہ آهاں ءَ گوں وتی راج ءَ گوں وتی وتن ءَ بلائیں مہر ءِ بیت راجانی تہا جہُدکار ءِ بلائیں ارزشت ءِ بیت۔
زانت ، سرپدی ، نیک نیتی ، ایمانداری ، حوصلہ ،همت ،سبر ، تہمبُل ءُ برداش جہدکار ءِ رهشونی ءَ کنت۔ جہدکار راج ءِ گلام انت همے هاترا جہدکار ءَ وتی زند ءِ هروشی پہ وتی راج ءَ کُربان کنگ لوٹیت۔ گلامیں راج داں وهدے ءَ باور نہ کنت گوں وتی راج ءَ مہروانی ءُ عاجزی پیش بوگی انت۔ یک سردارئے نہ انت کہ هرکس ءَ گوں تُرندی بکنت۔ جہُدکار همے هاترا راج ءِ گلام انت آئی مول ءُ مراد وتی راج ءِ چہ قبضہ گیر ءَ آجوہ کنگ اِنت وتی راج ءِ سرپدی ءُ تسلہ دیگ اِنت وتی راج ءِ رهشونی کنگ اِنت ۔ جہدکار ایوک ءَ وت ہچ کرت نہ کنت، جہدکار ءَ وتی راج ءِ تیار کنگ الّمی انت۔ بلوچی ءِ گپ ءِ یکے ءِ پترا گوات بارت، چاپ یکیں دست ءَ توار نہ کنت۔ جہدکار ءِ زمہ واری وتی راج ءِ سرپد کنگ اِنت دگنیائے تہا گران تریں کار مردمانی زهن ءِ جوڑ کنگ انت۔
پنچ لنکک برابر نہ انت اے گپ ءِ مول ءُ مُراد همیش انت پنچ براس بباں ماس ءُ پس ءَ یک بباں هرکسی زانت ءُ زانگ دگہ دگہ وڑ بنت۔ گس ءِ تہا چنکہ مردم بباں بلے اے گس ءِ تہا یک مردم ءِ نام کشیت ءُ زمہ وار بیت ۔ همے هاترا زمہ واریں مردم وتی مردمانی هرکسی تب ءَ زانت، هرکجام مردم ءَ یک وڑے دست ءَ داریت ۔ آئی هرکجام مردم آئی عزت ءَ کنت پہ نام ءُ عزت ءِ گرگ ءَ مردم ءَ بلائیں برداش ءِ لوٹیت ۔ راج ءِ رهشونی کنگ کسانیں گپ ءِ نہ انت گلامیں راج نابزانت بیت جہدکار ءَ هر وڑیں نام دیگ بیت۔ چُش کہ گنوک ، دیوانگ ، متلبی ، دُز ، لگور ، بے ایمان ءُ ٹگ جہُدکار ءَ اے وڑیں نام هما مردم دیاں کہ جہد ءِ بابت ءَ پوه نیاں۔ جہدکار ءِ گیشتریں پریشانی چہ وتی چاگرد ءَ بیت چاگرد ءِ تہا هواریں سنگت دژُمن نباں هرکسی زانت۔ حوصلہ ءُ همت دیگ، نزوریانی کشگ ءِ وڑ ءُ ڈول دگہ دگہ رنگ بنت۔ بازیں سنگت کساں کسانیں گپانی سرا هسد ءُ کینگ داریت یازهر بنت۔
گون پگری سنگت ءَ هسد ءُ کینگ دارگ زهر بوگ شری ءِ نہ انت ، چشیں سنگت ءَ چہ هما سنگت زهر بیت کہ آئی تہا زهنی پُختگی نیست چہ سنگت ءَ زهر بوگ یک نابزانتی اِنت۔ پہ بنی آدم ءَ ارزان تریں کار دومی ءِ شرگداری کنگ انت ۔ گران تریں کار وتی نزوریانی کشگ انت پہ جہدکار ءَ جیڑگ ءُ پہمگ الّمی انت زانتکار گُشان یک کدم ءِ دیم ءَ روے دو کدم پُشت ءَ پچار همے هاترا وتی گوستگیں نزوریانی پہمگ ءَ چہ پرتو دیم ءَ روگ ارزان بیت۔ چہ بنی آدم ءَ نزوری هر هال ءَ بیت مردم ءِ مستریں زانتکاری وتی نزوریانی گرگ انت۔
جہدکار ابید ءِ گَل ءَ (تنظیم ) وتی مقصد ءَ سر بوت نہ کنت گَل ءِ (تنظیم ) هر باسک آئی سرین گشگ بیت۔ چہ باسک ءَ بُنزه جوڑ بیت، چہ بُنزه ءَ هنکین، چہ هنکین ءَ دمگ، چہ دمگ ءَ بُنجاه جوڑ بیت۔ جہدکار ءِ بزانت جہد کنوک گَلانی مهکم کنگ هر جہدکار ءِ سرا فرض انت۔ جہدکار مُهکم باں گل مهکم بیت جہدکار ءِ مهکمی ءُ نابزانتی ءِ پدر بوگ همیش انت۔ مهکمیں جہُدکار هرگپ ، هروڑیں سکی ، نگیگیں جاورهال ، شرگداری ءُ تژن کلیں شئےآں برداشت کنت۔ هرگپ ءَ چہ سرپدی زوریت، هرسکی ءَ وتی صوبمندی سرپد بیت ۔ چہ نگیگیں جاوراں گیشتر وشحال بیت شرگداری ءَ پہ وت ءَ رهشونی ءِ لیکیت چہ تژن ءَ گیشتر جہد کنت اے وڑیں گپ ءَ چہ دربارت جہدکار ءِ نابزانتی همیش انت وتی مقصد ءِ هاترا نہ جیڑیت هر کار ءِ کہ وت ءِ کرتگ دائم هما گپاں دیم ءَ آراں کنت وت ءَ مزن لیکیت، وتا زانتکار ءِ سرپد بیت۔ پارٹی ءَ گیش وتی زات ءَ دیم ءَ کاریت وتی جند ءِ نزوریاں نزانت، وتی سنگتانی کسان کسانیں نزوریانی سرا هسد ءُ کینگ داریت۔اے گپ ءَ نزانت هسد ءُ کینگ مردم ءِ وت ما وتی مہر ءَ هلاس کنت۔
اگاں کس ءِ جہد ءِ بہر بوت ءَ پہ مہر اهت ءَ اے وڑیں جہدکار وتی کلیں کربانیاں مُپت کنت تبائی ءِ نیمگ ءَ روت۔ ایشی وجہ همیش انت چہ جیڑگ ءُ پہمگ ءَ دور بوت ءَ راجی جُنزانی تہا اے وڑیں کسہ باں داں مزنیں وهدے ءَ زانتکاریں جہُدکار وتی چاگرد ءِ تہا اے وڑیں کاراں چہ نا اُمید نہ بیت۔ زانت ءُ سرپدی مردم ءَ کرد ءِ دنت کرد مردم ءَ جہدکار جوڑکنت ، جُنز ءَ هوار کنت ، جُنز جہُدکار ءَ زندگ داریت ءُ راجی جُنز دیم ءَ رواں بنت ۔ هرکس وتی نزوریاں کشان کنت جہدکار بازیں کار ءَ چہ وهد ءُ حالات ءَ دربارت مردم بلوچ راجی جُنز ءَ چاریت باز چہ اے وڑیں گپ ءُ کسہ گوست ءَ نوں مئے بلوچ ءِ جہدکار ءُ رهشون جیڑگ ءَ اَنت۔ هرکس ھوار بوگ ءِ جہد ءَ کنگ ءَ انت چہ بازیں جیڑهاں پد ھوار بوگ ءِ جہد بندات اِنت۔ آه کہ نابزانت ءُ بے برداش بوتگاں، آهانی جہد تبائی ءِ شکار بوتگاں۔ ہرکجام کہ زانتکار ءُ پگری سنگتاں آه وتی گوستگیں وهد ءِ بابت ءَ جیڑگ ءَ انت ءُ وتا مهکم کنگ ءَ انت۔ وت ما وت تپاک ءُ ھوار بوگ ءِ جہدءَ کنگ ءَ انت بلوچ ءِ چنچو آجوئی لوٹوکیں گل است اَنت۔ آهانی ھوار ءُ تپاک بوگ ءِ اُمیت ءِ هست۔ بلوچ ءِ هر جہدکار ءَ ماراِتگ تپاکی ءِ بلائیں ارزشت این۔ اگں بلوچ وت ما وت تپاک ءُ ھوار بوت اَنت آہ روچ دور نہ انت بلوچ آجوہ بیت۔
