بچیگ منی من سردراں
اکیل مراد
دی بلوچستان پوسٹ
بچیگ منی بچیگ منی رکین من ءَ من سر دراں دُز ءُ ھونواریں ھُکاں انگیر کتگ
انسان ھما وھد ءَ زندگ مان اِت کہ وتی چاگرد ءِ کَش ءُ گورانی بوھوکیں دراھیں اڑ ءُ جنجالاں پھمت بہ کنت ءُ آیانی ھرچ وڑیں نیزوریانی گرگ ءَ وتی وس ءُ واک ءَ بہ کنت “زوراوریں وھد” “دری دشمن ” چاگرد ءِ سر ءَ کپتگیں اسر ” ءُ لس مھلوک ءِ زندمان “۔
بلوچ راجدپتر ءُ پَٹ ءُ پول کن ئے گڑا بلوچ راجدپتر ھمے گپ ءَ ھم کنت کہ بلوچ راج ءَ مدام وتی گیرت ءِ ھمراھی ءَ دگرانی گیرت ھم پھازیتگ ءُ وتی سر بباہ کرتگ اَنت بلے! وتی گیرت ھچ بر بھا نہ کرتگ وت ءَ کوشارینتگ جنگ ءُ چوپ کرتگ وتی زالبول ءُ چک پھازیتگ اَنت ۔
مروچی ھمے راجدپتر ھنچش تورینگ ءَ ایں کہ بلوچ ءِ ننگ ءُ ناموس ءَ دری دشمن ءِ بلوچ ءِ پر مھریں زمین ءِ سر ءَ لگتمال کنگ ءَ ایں بلوچ مات ءُ گھارانی سر ءَ زُلم ءُ زوراکی، درندگی، انسانی کوش ءُ دراھیں تکاں بندوکیں سلکاری بوھگ ءَ اَنت ۔
ھپتاد ءِ دیھک ءَ پاکستان ءِ درندگیں لشکر ءَ بنگلہ دیش ءَ باریں چنت کساس ءَ بنگلیانی لاپریں جنینانی چک پہ زور ءُ سر دؤر داتگ اَنت چنت جنین نیم مرگی کَل کنگ بیتگاں، ھمے لڑ ءَ چنت کسانوکیں چک کہ ماتانی لاپاں نوکی لگوشتگ اَنت ءُ ھاکانی چیر ءَ بار گپتگ اَنت بَلے! بامردیں بنگلیاں اے پروش پہ وتی نام ءَ نہ کرت ۔آیاں ھمے جیڑ اِت کہ اگاں مروچی ما اے گیرت ءَ ھمے وڑ ءَ نیم بندگی ءَ یلہ بہ کن ایں گڑا مئے گیرت ھروھدے ءَ ھمے ھُک ءُ لدیگانی دست ءَ لگتمال بیتیں مروچی بنگلہ دیش دنیا ءِ دیم ءَ جاڑیگیں ملک ءِ آئی ءِ وتی راہ ءُرھبند جوڑیتگ اَنت ۔
بلوچ چہ کرناں پیداکیں یک ازت مند ءُ گیرت مندیں راج ءِ بلوچ ءِ دود ءُ ربیدگ بلوچ ءِ گیرت بلوچ جزبگ دنیا ءِ راجاں چہ جتائیں بلوچ وتی اندر ءَ مزنیں گیرت ءِ داریتیں۔
زورگر ءَ کہ بلوچ ءِ زمین ءِ سر ءَ اُرش کرتگ ھمے داب ءَ زورگر ءَ بلوچ ءِ ننگ ءُ ناموس ھم پامال کرتگ ھمے وڑ ءَ بلوچ ءِ بامرد ءُ شھیدیں رھشون نواب اکبر ھان بگٹی گْوش اِت کہ بلوچ ءِ ننگ ءُ ناموس پامال بوھگ ءَ ایں ما پرچا گڑا وتی دستاں بہ بندیں ءُ بہ نندیں ءُ وتی گیرت ءِ لگتمالی ءَ بہ چاریں؟ ھمے سبب ءَ نواب اکبر ھان ءَ گیرت ءِ رکینگ ءِ ھاتر ءَ پیراں سری پہ وت ءَ یک ازت ءُ شانیں مرگے وتی نام ءَ کرت ءُ پہ مڑاھے نمیران بیت ۔
شھید چیئرمین گلام مھمد گوش اِت کہ مات ءَ من ءَ شاگیں گوانزگ ءَ نازینتگ ءُ گوشتگ کہ مِرے پہ نَنگ ءَ بہ مِر پہ ناموس ءَ بہ مر پہ زمین بہ مر بلے! شھید واجہ گلام مھمد ءِ وڑیں سراں پہ وت ءَ ھنچیں نام راجدپتر ءَ نبشتگ کنائینت کہ آ ھمک وھد ءَ زندگ مانگ ءَ اَنت ءُ نَنگ ءُ ناموس پھازیت بلے سر وتی جھل نہ کرت۔
بلوچ ءِ سرءَ کپتگیں زور اے ھپتاد سال ءَ چہ گر داں انوگ ءَ یک وڑ ءَ برجاہ اَنت ءُ پاکستان ءِ لدیگ ءُ رستریں فوج ماں بلوچ میتگاں ھما ناروائیں ھرکتاں کنگ ءَ ایں ھرکسی دیم ءَ پدر اَنت گوستگیں روچاں واشک ءِ دمگاں پاکستان ءِ درندگیں فوج ءَ ھما مسال قائم کرتگ اَنت کہ ھپتاد ءِ زمانگ ءَ ماں بنگلہ دیش ءَ کنگ بیتگ اَنت پَلیت ءُ بے ھیائیں فوج ءَ لاپریں جنین ئے ءِ سر ءَ وتی اوست ءِ ھلاھوش ایر موش کرتگ ءُ بلوچ مات ءِ لاپ ءِ کسانوکیں چگل دؤر داتگ ءُ بلوچ مات شھید بیتگ۔اے وئیل پہ بلوچ راجدپتر ءَ یک نہ وشیں وئیل ءِ اشی ءِ سیاھکاری ھما کَچ ءَ بد اِنت کہ آئی ءِ رنگ دیم ءَ آرگ ھم نہ بنت ۔
بازیں وھداں چہ ھمے وڑیں سیاھکاری چہ پاکستان ءِ پَلیتیں فوج ءِ نیمگ ءَ جاری ءُ ساری اَنت گوستگیں چیزے ماہ ءَ پیش مشکے ءَ ھم پاکستان ءِ نیمگ ءَ داشتگیں ڈیتھ اسکواڈ ءَ ھمے وڑیں درندگے ءَ چہ یک بلوچ مات ءِ ھمے جاورانی آماچ کرتگ ءُ داں بلوچ مات ءَ وتی ساہ داتگ اَنت جاہ جَن اِت بیلاں کہ تی نَنگ بندیگ اِنت پہ ماھو ءَ پولنگی کوشارین اِت ۔
اے وئیل پہ بلوچ پدریچ ءَ ھما وھد ءَ پولنگ اَنت کہ گلامی اِنت تاں تی گلامی ءِ سنکل نہ سِداں تو ھمے وڑیں پولنگانی آماچ بیان بئے روے تو گار بیان بئے زوت کن وتی پولنگی ءَ دور کن ءُ وت ءَ ھما دگہ راجانی وڑ ءَ یک راجے ءِ رنگ ءَ بہ اوشتارین اِت۔
راج تپاک بات
دشمن نیست ءُ بابود بات اَنت
