شھـید چیرمین گُـلام مھمد بلوچ – آھـوگ گُل

325

شھـید چیرمین گُـلام مھمد بلوچ

نبشتہ کار: آھـوگ گُل

دی بلوچستان پوسٹ : کالم

[ منی مرگ ءَ پد منی ٹَکّ ءِ ھچ مردم ءَ منی کُربانیانی ھاتر ءَ پہ ھچ رُتبہ ءُ شرپ دیگ مہ بیت، بلکیں ھما مردم کہ گیشتر جد ءُ جہد کنت شرپ ءُ رُتبہ ھماہی ءِ ھک اِنت
نِلسن منڈیلا ]

مرگ ءِ بیم ءَ چہ باج بَرگ وت یک زندگی ئے
من چیرمین شھـید گُـلام مھمد چو رھشونے ءِ وڑا دیستگ اَت، دانکہ همینچوک ءَ مناں ھوش کنت اے وھد ءَ شھـید گُـلام مھمد سیاست کنگ ءَ اَت اے گپ ءِ سرپدی مناں ھما روچ ءَ رست کہ من شھید گُـلام مھمد ءِ لوگ ءَ، شھید فـدا احمد ءِ عکس دیستگ اَت، شھید گُـلام مھمد ءِ زندگی کنگ ءِ رنگ چہ دُرستاں جتا اَت، آ سیاست، شائری، وانگ ءِ ھُب، راج دوستی، ھر پڑے ءَ کہ ھوار اَت آ گوں وتـی ھرچ اِزم ءَ زگر اَت، ایماندار اَت-
شھـید گُـلام مھمد ءِ گُشتانک بہ بنت یا دیوانانی تہا بـلوچی بـتل ءُ بـلوچی شائری ، آی ءَ وتی بزانت ءَ گیـشینان کُـت اَنت درور دیان کُت –
گوشـداروکاں شھـید ءِ گپـانی تہا آجوئی ءِ آزمـان چہ جُہد ءُ کُـربانیانی جـمبراں چی هما دیم گـندگ ءَ اتک –

مناں یاد اِنت وھدے چہ کراچی ءَ گوں شھید شیرمھمد ءَ ھوار شھید گِرگ ءُ بیگواہ کنگ بوت ، پدا بـاز وھد ءَ پد آ زاھر کَنگ ءَ رند کیـچ ءِ زنـدان ءَ آرگ بیت اَنت ، ما بـاز مردم شھـید ءِ چارگ ءَ کیچ ءِ زندان ءَ شُتیں، مارا شھـید ءِ تہا بس ھمے تپاوت گندگ ءَ اتک کہ آ سک لاگر اَت، بلے پگـری رنگ ءَ آ گیشتر مھـکم تِر اَت، آہی ءِ جزگ آہی ءِ ھبرانی تہا ما مار اِت کہ آ چہ دیر ءَ اتکگیں دیدار کنوک ءُ سیاسی سنگتاں ھمے مارشت ءَ دئیگ اَت کہ اے گِر ءُ بند ءُ شھید کَنگ، شھـید گُـلام مھمد ءَ ھوار سرجمیں راج ءَ پہ چکاس اَنت، اے چکاساں مارا گوزگ ءُ درکپگی اِنت –
وتی زبان، وتی راج منارینگی اَنت ءُ اے زمین آجو کنگی اِنت ـ
آجـوہی مئے منزل اِنت ءُ مارا وتارا منزل ءَ سرکنگی اِنت –
وھدے کہ شھید یل کنگ بوت ءُ لس مھلوک شھـید گُـلام مھمد ءِ دیم ءَ پہ آی ءِ وش اتکی ءَ شُت اَنت –
شھید گلام مھمد ءِ وش اتک ءَ پد چیزے روچ یا ہفتگے گوستگ اَت کہ چَندے مردم ءَ شھـید چیرمین گُـلام مھمد ءِ سرا ھمے بوتام جَنگ بندات کُت کہ شھید بھا بوتگ، شھید گوں دژمن ءَ ھوار اِنت
( اے ھبرانی گوشوک چندے مردم اِتاں بلے من آھانی نامانی نبشتہ کنگ ءَ ادا توجیل ئے سرپد نباں)
برے برے چُش ھم بوتگ اَتک کہ شھـید وھدے وتی یک پیشی ءِ سوّب ءَ تمپ ءَ روگ ءَ بیت ءُ لہتے مردم در کپیت ءُ آہی ءِ راہ ءِ سرا سِنگ ایر کن اَنت لوٹنت راہ ءَ بند بکن اَنت،شھـید ءِ سنگت، کہ شھید ءِ ھمراہ بنت چہ گـاڑی ءَ درکپنت کہ ما اِشاں جُست کنیں اے چیا اے وڑ کنگ ءَ اَنت بلے شھـید چیرمیـن گوں نرمیں توارے ءَ ھمے گوشیت اِشاں بل اِت ءُ شما دیم ءَ روان بکن اِت ـ
شھـید چیرمین گُـلام مھمد رنگ رنگ اِیں جیـڑھانی دیمپان بوتگ بلے آہی ءَ ھچبر پہ یک مردمے ءَ، پہ یک لوگے ءَ نہ جیڑ اِتگ، بلکیں شھیـد گُـلام مھمد ءَ سرجمیں راج ءَ پہ جیڑتگ تیوگیں بلوچستان ءَ پہ پگر کُتگ ـ

بلوچ ءِ راج دپتـر چہ بامـرداں سر چکار اِنت، وھدے تو راج دپـتر ءَ وان ءِ ترا یـوسف عزیز مگـسی، نصیـر خان نوری، نـواب خیر بخش مـری، بـالاچ مری، فـدا احمد، نواب اکـبر خان بگٹی ءَ ھوار بـازیں رھشونے ءِ نـام تئی چمانی دیما گوزیت، اشانی تہا یکے شھـید چیـرمین گُـلام مھمد بلوچ اِنت کہ بلوچ راج دپتر ءِ بـراہ ءُ چـیدگ اِنت، مروچی ۹ سال پیسر ۲۰۰۹ اپریل ۳ تاریک ءَ شھـید چیـرمین گُـلام مھمد گوں ، شھیـد شـیر مھمد ءُ شھیـد لالا منـیر ءَ ھوار کیچ ءَ کچکـول علی ایڈوکیٹ ءِ کـارگس ءَ چہ چِست کنگ بوت اَنت، ۶شش روچ ءَ پدّ بزاں ۹ اپریل ۲۰۰۹ ھاھانی زانگـولیں جون مرگاپ ءَ یک شوانگے ءَ دیست اَنت ـ

مروچی کہ من شھیـد گُـلام مھمد ءِ لوگ ءَ جتگیں شھیـد فـدا احمد ءِ عکس ءِ سرا جیڑاں ، مناں اے جیڑگ ءِ کساس سک مزن گندگ ءَ کئیت چُـش ھم نزاناں کہ چیا مـزن گندگ ءَ کئیت بوت کنت منی لوگ ءِ دیوالانی دیم ھورک اَنت پمشکہ، بلے من اے گپ ءَ مـاراں کہ اے شھـیدی ءِ راہ چـیرمین گُـلام مھمد ءَ ھما روچ ءَ گچّین کُتگ کہ آہی ءَ اے شَیر پربستگ ـ

تلـکاریں ھـونانی نـشاں ارسیگیں کاڑانی گُـشان
ڈوباراں بالاد ءَ منی لیٹ اَنت دل ءَ چو سیاہ مار

یک دگہ جاھے ءَ شھید چیرمین گُـلام مھمد وتی گُلگدارے ءِ تہا ھمے گوشیت ـ

“بـلوچ ءِ ربیدگـانی اولـی بُرزی ھمش اِنت کہ اگـاں دَر ءَ چی دُشمنے اَتکگ تئی سرا اُرشے کُتگ، گڑا بلوچ راج ءَ گوں بلوچ ءَ وتی زھری یک نیمگے ایر کُتگ، بزاں وتی دُشمن ءِ شکست ءُ پُروش دئیگ ءِ ھاتر ءَ تپاک ءُ یک بیتگ اَنت ءُ دَر ءَ چہ اتکـگیں دُشمن ھواری ءَ پُروش داتگ ءُ گَلینتگ”
ھمے پگـر اَت ، ھمے جُہد اَت ءُ ھمے شھـید گُـلام مھمد ءِ کُربانی اِتاں کہ شھید گلام مھمد تاں اَبد نمیران اِش کُت –

من وتی نابودیانی سوّب ءَ باز چیـز شھیـد چیرمین گُـلام مھمد ءَ چی دَر بُرت نہ کُت، بلے اے چیز دَر بُرت کہ ” مَـرگ ءِ بیـم ءَ چہ باج بَـرگ وت یـک زنـدگی ئے” ـ …….

بلوچستان آجو بات
بلوچ راج سلامت بات

LEAVE A REPLY

Please enter your comment!
Please enter your name here