مرگاپ ءِ شھیداں سلام
اکیل مراد
دی بلوچستان پوسٹ : کالم
جھان ءِ تہ ءَ ھنچیں رھشون ودی بیتگ اَنت کہ مروچی چَہ چُنت سال پیسر آیاں اے جھان یلہ کرتگ بلے آ ابدمان اَنت نِیلسن منڈیلہ، ڈاکٹر چی، بگھت سنگھ ءُ ھزاراں چشیں “لیڈر ” رھشون ودی بیتگ اَنت کہ آیاں وتی راج ءِ “مستقبل ” واست ءَ جیڑیتگ ءُ وت ءَ ابدمان کرتگ ۔
ھمے رھشوناں چہ یکے بلوچ نیشنل مومنٹ بنھشتار، واجہ شھید گلام مھمد اِنت کہ مروچی ءَ چہ نُہ سال پیسر پاکستانی چیریں دستاں کیچ ءَ کیچ ءَ کچکول الی ایڈوکیٹ ءِ کارگس ءَ چیئرمین گلام مھمد، لالا منیر ءُ شیر مھمد آوار جتگ ءُ برتگ اِت اَنت ۔
شَش روچ ءَ پد آیانی ٹپ ءُ ٹوریں لاش ماں مرگاپ ءِ ڈلانی تہ ءَ چگل دات اَنت ھرسھیں رھشونانی کِرد بلوچ زرمبش ءَ سھر ءَ ایں ۔
آیانی دیدانک تچک ءُ پلگار اَت کہ مروچی ھما سبب اِنت بلوچ راجی زرمبش ءَ وتی گام دیم پہ منزل ءَ تیز کرتگ اَنت ۔
چوناھیگ ءَ بلوچستان ءَ بلوچ راجی زرمبش ءَ شھیدانی کمی نہ اِنت اگاں ما ھمک شھید ءِ بابت ءَ نبشتگ بہ کن ایں ھم مئے راجی زرمبش ءِ شھیدانی لَڑ ھلاس نہ بیت بلوچ ماتاں ھنچیں بَچ ودی کرتگ کہ آ راجی زرمبش ءَ پہ سرانی دیمھونی ءَ ھِچ وڑ ءَ چَک ءُ پد بوھگ ءَ نہ اَنت۔
تران ئِے ءِ تہ ءَ شھید واجہ گلام مھمد گوش اِت کہ بلوچ مات تنی وھدی سَنٹ نہ بوتگ اَنت آیانی بَچاں پاکستان بہ گپت ءُ ھلاس بہ کنت راجی پکرانی تہ ءَ مردمانی دیدانک ھم پہ راجی زرمبش ءَ بیتگ اَنت کہ مروچی راجی زرمبش ءِ شھیدانی لَڑ بازیں کَچے ءَ رَس ایتگ اَنت ءُ راجی جنز دیم پہ منزل ءَ روان اِنت ۔
راجی جنزانی تہ ءَ الم راجی پَلامرزی گون بیت گڑا راجی زرمبش وت ءَ زوراک ءِ دیم ءَ مھکم کنت ءُ زرواکیں دستاں پروش ءِ آماچ کنت۔
شھید واجہ ھما پکرانی نام اِنت کہ آئی ءِ تہ ءَ یک ھنچیں آشوب ءِ بیتگ کہ تنی وھدی انگت ءَ ھمک میتگانی تہ ءَ شھید واجہ ءِ کردانی سَتاہ بوھگ ءَ ایں ۔
تنی وھدی سرجمیں بلوچستان ءِ مردم ھمے گپ ءَ جن اَنت کہ شھید واجہ ءِ جِند اگاں راجی زرمبش ءِ تہ ءَ جاڑیگ بیتیں گڑا آئی ءِ کاراں مروچی زرمبش کجا رَسینتگ اَت دشمن ءَ ھم ھمے جیڑیتگ اَت گلام مھمد اگاں زندگ اِنت آ الم وتی راج ءَ منزل ءَ رَسین اِت ۔
بلے دشمن ءَ اے پھم اِتگ کہ گلام مھمد چہ شھیدی ءَ پد ھم بلوچ راج ءِ دلانی تہ ءَ زندگ اِنت ۔
آئی ءِ پکر ءُ لیکہ ھما وڑ بیتگ اَنت کہ آ ھچ بر شموشگ نہ بنت آیاں بلوچ راج ھمک سھت ءُ دمان گیر آرگ ءَ ایں آئی ءِ آجوئی ءِ کاروان ءَ اے وھد ءَ بازیں وڑئے ءَ دیمروی کرتگ۔
اے دشمن ءِ پروش اَت کہ آئی ءَ یک سیاسی چراگ ءِ چہ بالواں بس گستہ کرت بلے ءِ رژن گِستہ کرت نہ کُرت ھمود ءَ چراگ ءِ رژن ءَ وت ءَ بُرتگ ءُ رسینتگ کہ اود ءَ ھِچ وڑیں چراگانی رژنائی نہ بیتگ ۔
بَلے مروچی ھما چراگ ھمود ءَ ھم رژناہ کنگ ءَ ایں آئی ءِ ھرچاریں نیمگاں بالواں وتی بانزول ایر داتگ اَنت ءُ آئی ءِ رژن ءِ رندگیری ءَ کنگ ءَ اَنت ۔
ھَنچش گُش اَنت اگاں یک راج ءِ بہ بیت آئی ءَ رھشون، “سر ” مہ بیت گڑا آ راج ءِ بستار ھم چوں گاریں پَس ءَ ایں کہ آئی ءَ کَس دست نہ گِپت ءُ آ دریگانی دست ءَ بیت بلے مروچی بلوچ ماتاں ھَنچیں بَچ ودی کرتگ کہ آ بلوچ راج ءِ رھشونی ءَ کنگ ءَ اَنت ۔
ھمے سبب اِنت کہ بلوچستان ءَ شھیدانی کمی نہ اِنت اود ءَ ترا ھمک پکراں گوں بندوکیں شھیدانی پِکر گندگ بنت۔
سَے اپریل دوزھراز ءُ نُہ ءَ شھید گلام مھمد، شھید لالا منیر ءُ شھید شھید شیر مھمد ھرسھیں رھشون چہ کیچ ءَ پاکستانی لشکر ءَ آوار جت اَنت ءُ بُرت اَنت ۔
چِد ءُ پد ھرسھیں رھشونانی ٹپ ءُ ٹوریں لاش ھشت اپریل دوھزار نُہ ءَ کیچ ءِ دمگ پیدارک مرگاپ ءَ چگل دات اَنت ءُ نُہ اپریل دوھزار ءُ نُہ ءَ اے ھال سرجمیں بلوچستان ءَ شِنگ ءُ تالان بیت ۔
بلوچ ءِ سرجمیں لوگاں یک نیمگے پرسی ءُ دوھمی نیمگ ءَ بلوچ ماتاں پھری درشان کُرت ۔
ھر سھیں رھشون مدامی ابدمان بیت اَنت ءُ آیاں وت ءَ راجدپتر ءَ نمیران کُرت۔
