“بلوچ ءُ اُستاءِ تعصب”
منظور بسمل
دی بلوچستان پوسٹ : نبشتہ
چاکر ءُ گْوہرام پہ بلوچءَ دو معتبریں نام اَنت، بلے بلوچ کانفیڈریسیءِ پْروشوک ءُ خانہ جنگیءِ بدیں بُنپدءِ ایر کنوک ہمے ملّیں متْرس انت۔ اِشانی سی سالی جنگ ءُ بجنگانی بروردءَ بلوچ “اِیسُپءِ کَتب”ءَ سرکتگ۔ کسے منّیت یا نہ منّیت، بلے دُنیا زانت کہ “بلوچ” یک حاص ءُ ناسیں زاتے، ٹکّے یا بولکّے نہ اِنت۔ بلوچ ڈیہہءِ کُلّیں جہمنند کہ بلوچیءَ ہبر کننت، بلوچ دود ءُ ربیدگانی حسابءَ زندگ اَنت، مِلک ءُ میراس اِش است یا بُوتگ اِش، لوگ ءُ گِدان اِش است، چہ کرناں ہمے ڈیہہءِ جہمنند اَنت آ “بلوچ” انت۔
چے اُستا، چے جدگال، چے بْراہوی، چے دَرزادگ، چے گُلام، چے زِگری، چے نُمازی، چے رِند، چے گچکی، چے ہوت، چے رئیس، چے فِلان ءُ چے گُہمان۔۔۔
انگریزءِ آہگءَ پیسر بلوچ یک “کوڈے” ات۔ اُستا، دہکان، شْوانگ، جتّ ءُ اے دگہ کِسب ءُ کارانی ہنرمند، بزگر ءُ پوریاگر ہمدست ءُ تپاک اتنت، ہمراہ ءُ ہمکار اتنت، یکے دومیگءِ ہمباسک ات، ایمنی ات، وشدلی ات، زندءِ ہمک پڑءَ کار سواری ات۔ اَشر، اَواچک، بجّاری، پوڑی، وام، بدل، مَدت، کُمک ءُ دگہ باریں چے چے۔۔۔ ہواریں زندءِ بہر اتنت۔
“سِست ءُ سید کن حاکمی کن”
انگریزءَ وہدے بلوچ گلزمین دیست، بلوچءِ مَجگ ونت، کسب ءُ کار چارت ءُ تپّاس اتنت، گڑا شیطانی دماغءَ کار کت۔ بلوچ ٹک ءُ بولکانی سرا کار بِنا بوت۔ چد و پد ہما بوت کہ مروچی ہرکس گندگا اِنت۔ ناں بلوچ یک کوڈے منتگ ءُ ناں بلوچ گلزمین یک اُستانے، کُل بہر ءُ بانگ، ٹُکر ٹیری، ہچ پشت نہ کپت۔
بژنی ہبر ایش انت کہ دو مردم مِڑیت، زاہ ءُ لٹاں سیمی مردم مپتء حُدا وارت۔
بلوچءِ مستریں بدبہتی چہ ہمدا بنا بیت کہ آ پندلانی آماچ بیت، “ہنرمند ءُ کسب” ایرجنئگ بنت، کم درجہ ءُ کم نسل لیکگ بنت، “عیبی برسرء گیبی” بنت۔
کس دومیگ وتی درور نہ لیکیت، بْراتی ءُ دوستیءِ مُرگ بال کنت۔
اے ہبرءَ بزان ات کہ دُنیاءِ حاکمیں توان ءُ طاقتانی سرچمّگ ہمے “کم نسلیں ہنرمند ءُ کِسب سازیں سرگ ءُ پادگ” انت کہ مروچی پادمال اَنت۔
من اے نہ گُشاں کہ بلوچءِ اعلٰی ءُ بالائیں ٹک ءُ بولک کہ مزن مرّی ءُ شان کنگا اَنت، وتی کسب ءُ کارانی شونداریءَ بہ کننت، بلے اے ہبر تچک اِنت کہ دنیاءِ سرا دُز، ڈُنگ، کاچاک، شپک، گُریز ءُ غُنڈہاں دائما حاکمی نہ کتگ۔
یکبرے من پدا گوں وت دزبندی کناں کہ ائے بدبہتیں “بلوچک”!
وتی کبلہءَ راست کن!
وتا پجہ بیار!
پندلانی آماچ مبو!
وتکوش مبو!
سد ءُ یک دل بو!
چہ وش نیاتکانی گیتکگیں داماں وتا پہریز!
دشمنانی پندل ءُ رِپکانی شکار مبو!
“بلوچ کوڈ” ءَ ایلنگی ءُ پولنگی مکن۔!!!
دْرُستیں ٹَکّ ءُ بولک وتی جاگہءَ شرپدار ءُ پُرمَنگِہہ اَنت، کس کسی چَمدار ءُ واستیگ نہ اِنت، کُل بروبر اَنت، پمیشکا ہمینچو زُوت تر ہوش کنگ بہ بیت گہتر اِنت۔ کست ءُ کینگءَ برورد نیست۔
اگاں “بلوچ”ءَ ڈیہے بُوت، بلوچءَ دیمرہی یے کت، گُڑا “اُستا” ءُ اے دگہ “کم نسلیں” کسب ءُ کارانی ہنرمند وتی سرا پہر بندنت۔
فزکس ءُ کیمسٹری اُستاءِ میراس اَنت، سلاہ ءُ ازباب اُستائیگ اَنت، کِسب ءُ ہنر اُستاءِ دستءَ اَنت، زانشت ءُ سائنس اُستائیءِ منت وار اَنت۔
بلوچ راج تپاک بات
تعصب گار ءُ بیگواہ بات
