افسانہ-بولان نا مابت
(گڈیکو بشخ)
نوشت: گلزار بلوچ
مَٹ: عتیق آسکوہ بلوچ
باوہ ہراتم بش مس خاچنگ کن ہنا گڑا تیوہ غاک بش مس ہنار بیرم تیٹ پیہار. حانی ہم بیرم آ بس لیٹا، منہ ساعت آن گڈ شوگ نا مَش آن جِک مروکا طوبے نا چانڑدئی تینا گچینی تون ئس، اندن دنکہ تیوہ غاتے خمب اٹ ہلنگ کن بسونے. حانی اندن کہ طوبے ءِ خنا گڑا اونا طب بگڑینگا، او پالو مَٹ کریسہ کرے. دے ئنا دمدرینگ نا سوب آن ایلو تیوہ غاک تنگان ہناسر ولے حانی تغ آن مُر خلاء تیٹ پند کننگ ئس. او کسر اُروک ئس، اونا اُست خوائی اس کہ میرو ءِ چانڑدہ نا نن اٹ بانسری خلنگ آ خڑک آن خنیو. حانی پالو ءِ مٹ کریسہ نن ءِ گدریفنگ ئس. اینو نا کیفیت تون اسُل جتاء ئس، طوبے حانی تون و حانی طوبےتون دنکہ ہیت کننگ ئس یا ہڑتوماک میرو کن کسر اُروک ئسر.
نن نیمہ مسوسُس، حانی لیٹوک طوبے ءِ اوننگ ئس. طوبے دنکہ کاٹم آ بریسہ حانی نا پیشانی ءِ دروت ہلنگ ئس. چُپی ہر پارہ غا تالان ئس، دوزان نا مش ئتون اسہ گہوش اس ہر پارہ غا خوش ءُ گند اس تالان کننگ ئس. حانی ءِ دنکہ کس ئنا بننگ نا گمان مننگ ئس انداڑتون مدان ءُ توار اس اونا خف تیٹ تما، او گوڑینگا کہ راستکی توار ئسے یا کسر اُروک مننگ نا سوب آن اونا گمان اٹ ئٹی بننگ ءِ، حانی سرگڑدانی نا کیفیٹ اٹ ئس، توار تالان مریسہ کرے.
میرو نا بانسری دوزان آن بولان اٹ سُر تالان کننگ ءِ بناء کرے. حانی نا بدن جانکش ہلنگ ئٹی بس، بے جاراتی زیات مننگ ئس. حانی بش مس بیرم آ تُوس. توار اس کہ اُس ئنا دریکہ غاتے دیر کریسہ ئس، ضبط پننگ ئس. حانی بے پامی تون بش مس و گام ارفنگ ءِ بناء کرے، حانی تینا ایب کیب آن پیشن مسوسُس. باوہ نا خلیس، چاگڑد نا بندی گری تے بے خیال کریسوسُس. حانی شپاد آ نت، ملوکا پژغاک غاتون مدان گام تیتون سر ہلک. حانی دنکہ تینا دوتیٹ اف. مدان آ گام آک ترند مریسہ کریر، منہ ساعت آن گڈ حانی ددینگسہ ئس. توار دوزان نا چشمہ نا پارہ غان بننگ ئس. حانی تہو ٹی چیچلو کنوکا توار نا پارہ غا ددینگسہ ئس. دیخہ ساعت آن گڈ حانی چشمہ نا رہی آ سرمس. چشمہ نا رہی آ اسہ بندغ اس خاخر لگیفوک تولوک بانسری خلنگ ئس. حانی نا نت تا توار ءِ بننگ آ او چُپ مس و دوارہ کاٹم ءِ جِک کریسہ اُرا، کاٹم آ بینگن آ تالان آ پژہ غاک، پینگن آ ریش، چنگ تروکا بروت آک، خیسن آ بھلا خنک حانی ءِ اُروک سلیسر.
حانی ددینگسہ بسوسس، ترند آن ہلوکا دمہ، ملوکا پژہ غاک، ددینگ نا سوب آن خیسن آ دروشم، بھلا و پُر آ خنک، نازرک آ شپاد آ نت تیان دتر وہنگ…
ہڑتوماک اسٹ ایلو ءِ سیل کریسہ کریر. ساعت آک گڈرینگار یا سال آتا سال آک یا گڑا وخت انداڑے تفوک سلیس! حانی خن تیٹ میرو آن سوج کریسہ کرے، سوج آک ہرا بلکن ہرا اوڑتون بناء غان ئسر، اونا دنکہ سرشت نا بشخ مریر.
نی دیر اُس، ہرا وخت آن اُس، انتکن ابدال اُس، نا سُر آتیٹ داخہ در دڑد انتکن ءِ، نے دیر تون عشق ءِ، دا دڑد ئسے امرو، دا ابدالی نا سوب، تارمئی آن سہب اسکان نا راز انت ءِ؟
میرو خن تے خَلوک حانی نا زیبائی و اونا خن تیٹ بش مروکا سوج آتے سرپند مننگ ئس.
حانی دنکہ میرو ءِ شیشپہ کریسہ اونا راز آتے پاش کننگ خوائسکہ. حانی خن تیٹ سوج کننگ ئس کہ بولان اٹ دنو انتس ءِ ہراڑتون نے ابدالی نا ہد اسکان است مابت ءِ، بولان تون امرو سیالی ئسے، بولان آن نی ودی مسونس؟
میرو بننگ ئس، سوج آتا برجاء وڑ اٹ ارفنگ نا نیامٹ میرو بشخندہ کرے، دوتیٹ ہلوکا بانسری ءِ جوڑ تیا تخا و کاٹم ءِ شیف کریسہ خلنگ ءِ تا بناء کرے. بانسری نا توار تون حانی نا سوج آک سلیسر و حانی نا بدن نا ضبط پنّا. ساعت آتیٹ حانی نا ورنائی چھاپ ئٹی ئس.
(او خدا جان! چانڑہ نا طوبے مرے، بولان مرے، دوزان نا بغل اٹ میرو نا بانسری مرے و حانی نا چھاپ مرے… بولان نا زیبائی و عشق نا اواری مرے. ای پاوہ دا ساعت آ ڈغار تون آسمان ہم چھاپ ئٹی مرو.)
میرو تینا باگل و سر آتیان حانی نا سوج آتا ورندی ءِ تننگ آ لگا:
ای عشق اُٹ، فطرت اُٹ، بناء آن ایسر اسکان مروٹ، دڑد کنے ٹی آخہ، پام ئٹی ءِ، شعور ئٹی ءِ، مابت ئٹی، عشق ئٹی ءِ…
بولان! بولان ءِ تو اُروک آک خنک خننگ کیرہ، عشق آن زیات عشق کننگ ءِ بولان، فطرت ءِ بولان، مابت ءِ بولان، جذبہ ءِ، مہر گڑھ ءِ، بندغی نا تہذیب ءِ باہوٹ تروکا بولان ءِ، کنا بنماس ءِ بولان، ای دتر اُٹ ہر ہمو بندغ نا ہرا بناء آن ایسر اسکان بولان نا عشق اٹ تینے ندر کرے و ندر کریسہ کرو، ای چھاپ اُٹ ہمو زیبائی نا ہرا بولان نا عشق اٹ بے سد ءِ، ای زیبائی اٹ ہر ہمو کاروان نا ہرا بولان نا وَل کنوکا گٹ آتیٹ تہذیب ءِ ارفیسہ کائک، ای لج و معیار اُٹ بولان نا ہر ہمو لمہ نا ہرانا جغر نا ٹکر بولان نا خمب اٹ دتر وہیفسہ خاچوک ءِ، ای رنگ اُٹ بولان نا، ای سنگت اُٹ بولان نا…
کنا دڑد تارمئی آن ءِ ولے کنا اُمیت سہب تون ءِ.
دے ئنا روشنائی حانی نا دروشم آ تما گڑا حانی ءِ ہوش بس، او چشمہ نا رہی آ چھاپ خلیسہ خلیسہ بے ہوش مریسہ تماسُس. حانی بش مس و زوت آن دانگ اینگ اُرا، میرو اَلو، تارمئی اَلو.
دے ئنا روشنائی شوگ نا مش آن سہب ئنا حوال ءِ تریسہ گروشک تننگ ئس.
