ریاستی دروگیں پَندل ءُ بلوچ راج
اکیل مراد
مروچی بیست ءُ سے مارچ بیتگ مروچی ءِ روچ ءَ پاکستانی لشکر ءَ وتی شاتکامی ءِ روچ داشتگ ءُ وت ءَ دنیا ءِ تہ ءَ ایمنی ءِ مھتر ءِ گوشتگ ۔
بلے اجکہ ھمے گپانی تہ ءَ بیت کہ مروچی ءِ روچ ءَ بلوچستان ءِ جاورھالانی سر ءَ کہ ھمک روچ ھمک ماہ ھمک سال ءَ بلوچ راج ءَ بیدے وتی لاش ءُ بیگواھیں مردمانی کِسہ ھاں ابید دگہ ھچی دَز نہ کپتگ ۔
بلے ھمے لھتیں زَر ءُ کُشندہ پرستیں مردماں ھم پاکستانی لشکر ءِ بُنھشتی ءِ سر ءَ ھمگرنچی کرتگ اَت لھتیں جاھاں بزگیں بلوچ پہ زور ءُ لھتیں جاھاں پہ ھُنر ءُ پندل اے مراگشاں ھوار گیجگ بیتگ اَنت ۔
دمانے ءَ پیسر ءَ تمپ ءَ سنگتے ءَ ھال کُرتگ اَت کہ لشکر گوستگیں روچ ءَ مئے لوگانی کَش ءُ گوراں اَتکگ اَنت کہ بانداتگیں روچ ءَ شما درست بیا اِت مئے مراگشاں بھر بہ زور اِت ءُ شمے بیگواھیں مردماں یلہ کن آں بلے گپ چی اِنت؟ ھما ھُنر ءُ پندل جھان ءِ دیم ءَ بلوچ راج ءِ سر ءَ زلمانی پدر کنگ ءَ ابید پاکستانی زھر آماچیں میڈیا ءُ پندل سازیں مھلوک ھمے چیزانی شوینگ کنگ ءَ ھما ھَد ءَ جاڑیگ اَنت کہ آیانی پاد چمپلاں چہ ڈن ھم کپگ ءَ اَنت۔
آیانی گیشتریں مول ءُ مراد بس ھمیش انت کہ ریاست ءِ دست مھکم بہ بنت ءُ راجی جنز ءَ چہ بلوچ راج دلپروشی ءِ آماچ بہ بیت بلوچ راج چہ جنز ءَ دزکش بہ بیت بلوچ راج وتی بنکی مڈیاں چہ پراموش بہ بیت بلوچ راج وتی ننگ ءُ ناموس ءِ سر ءَ پراموش بہ بیت،۔
راجی بیلاں اے ھنز ءُ پندل درست مئے ءُ شمے درستیں راج ءِ بیگواھی ءِ اِنت راجی مڈیانی برگ انت راجی ننگ ءُ ناموس ءِ پادمالی انت راجی چکانی زانشتی ءِ گِستہ ءَ اِنت اشی ءَ شما درستیں راج ءُ مھلوک سرپد اِت مئے بنکی دشمن کئے انت؟ مئے بیگواھی ءَ کئے ءَ لانک بستگ ۔
ھَنچُش سنگت شھید لالا حمید گوش ایت کہ اے شستیں سالانی تہءَ پارلیمنٹ ءَ ترا پجاہ نیاھورتگ بلکیں اے ھما بامردانی سُھر چکین ھون ءُ جنز ءِ برکتیں جھان ءِ دیم ءَ بلوچ راج مروچی زانگ بوھگ ءَ ایں بلوچ وتی ھکانی جُست ءَ کنگ ءَ ایں بلوچ وتی پجار ءُ پھازگ ءِ ھاتر ءَ جنگ کنگ ءَ ایں بلوچ ءِ جنگ یک راستگ ءُ تچکیں جنگانی وڑ ءُ پئیم ءَ روان اِنت۔
مروچی اگاں بلوچ ءِ پجار رَک اِت کُت کنت گڑا آ ایوک ءَ بلوچ راجی آجوئی ءِ جنز انت سلاہ بندیں جنز اِنت ھما بامرد اَنت مروچی آیانی ھون وڈانی سر ءَ تلان اَنت ھما ھونانی رَنگاں گیر بیار اِت ءُ دری دشمن ءِ سرجمیں پندل ءُ ھنراں بے سوب بہ کن اِت راجی جنز ءَ تمردی ءِ واھگ ءَ بہ دار اِت الم اے چیز ءَ ما ھم سرپد بہ ایں بلوچ جنزانی تہ ءَ نہ وشی ءُنگیگی اتکگ اَنت اے گپ تچک انت کہ باج زیردستانی بیت ءُ زوراک پروشی ءِ آماچ بیت بلے ھما سبب ءَ زوراک پروشی ءِ آماچ بیت کنت کہ کُلیں راج ریاست ءِ پندل ءُ ھنراں بے سوب کُت بہ کنت آ تُری دنیا ءِ کجام ھم زوراور بہ بیت بلے وھدیکہ زیردستیں راج ھم سُنت بیت گڑا ھما زوراک وتی سنگرانی تہ ءَ پہ لرزی ءَ نِند اِیت ترس آماچی ءَ وتی کِشکانی سرپاں اوشتیت اے دراھیں چیزانی پروشی راج ءِ ھم سُنتی ءَ اِنت ۔
راج پہ بیگواہ کنگ، بند کنگ ءُ گار کنگ ءُ کشگ ءَ ھِچ بَر ھلاس نہ بیتگ اَنت ھما وھدی کہ راج ھلاس بیتگ اَنت آیاں زوراور مَنّیتگ ءُ سلامی کُرتگ ھما وھد ءَ راجانی سر گار بیتگ اَنت۔
راجءِ بامردیں لچہ کار اَتا شاد گوش اِیت
“تو پہ سرانی گڈگءَ زندءِ ھیالاں کُش ئے
پہ سندگءَ داشت کنئے پھلاں چہ بوتالانیءَ”
بزاں کہ راجانی بامرداں تو شھید کُرت کن ئے بلے آیانی ھون ءِ سھری ءُ آیانی وشبوھیں زیمراں ھِچ بر داشت کُرت نہ کن ئے بیلاں وتی راجی بامردانی ھوناں لگتی مہ کن اِت کہ مروچی بازیں ھسابے ءَ راجی بامرداں کربانی داتگ ماتانی تاسپیں بَچ شھید بیتگ اَنت ماتانی ورنا ءُ زانتکاریں چک گار کنگ بیتگ اَنت تنی وھدی بازیں کَچے ءَ بیگواھیانی جاور شمے دیم ءَ اَنت ۔
گوستگیں وھداں گپار لانگو کہ بیگواہ اَت آئی ءِ بَچ ناسر ءَ وتی وانگ چہ پت ءِ بیگواھی ءِ سر ءَ ھلاس کُرت تاں منی پِت نئیت بلے آئی ءِ ودار آسری نہ بیت بلکیں آئی ءِ پت ءِ ٹپ ءُ ٹوریں لاش دز کپت مروچی آئی ءِ جند بیگواہ انت، آئی ءِ بیگواھی ءِ سر ءَ آئی ءِ کستریں گھار ءَ ھم وتی وانگ ءُ زانگ یلہ کرتگ ءُ دگانی سر ءَ نندگ ءِ جار جتگ مروچی اے جاورانی زمہ وار کئے انت؟ ھما ریاستی ٹولہ پرست ءُ پارلیمنٹ ءِ واست ءَ زَروکیں مردم اَنت آ تُری ڈاکٹر مالک بیت یا ھاسل بیزنجو یا ساجد دشتی یا ایندگر کُشندہ بنت اے درست راجی مستریں دشمن اَنت شمارا الم اے پھمگی انت کہ راج ءِ دوزواہ کئے انت کہ وت ءَ پہ دِرتہ پچی ءُ شُد لاپی کوشارینگ ءَ ایں منی ھیالاں ناں بلکیں اے تچک انت آجوئی دوستیں سنگتانی چکاں کسے ءِ چَم کپ اَنت پہ گڑا سماہ بیت کہ راجی دوزواہ کئے انت
بیلاں سبھاش چندر بوس گوش اِیت کہ اگاں سامراج لَٹ ءُ کُٹ ءِ زورا آجوئی ءِ جنز ءَ نیزور کنگ لوٹ اِت گڑا وتی گڈی زورا بہ جنت گڑا ما ھم دل ستکی ءَ اے لٹ ءُ کٹی پالیساں وش آھت کن ایں پرچاکہ سامراج ءِ اے پالیسی مئے زمین دوستانی واب ءِ سر ءَ بے سوبی ءِ نشانی بیت اِنت ۔
بیلاں راج ھما وھد ءَ زندگ مان اَنت کہ آیاں پہ وتی ننگ ءُ ناموس ءِ رکینگ ءَ ھمک وڑیں سکی ءُ سوری سگیتگ مروچی شمارا ھم ھما وڑیں سکی ءُ سوریانی تہ ءَ گوزگی انت شمارا ھم ھما زوراکانی دیم ءَ چو کوہ ءَ مِک بوھگی انت ءُ وتی بامردانی رند پداں روگی انت گڑا شمے آھوکیں نسل یک وشیں باندات ئے ءَ بام ءِ وڑ ءَ وتی ھیالاں درشان اِت کرت کنت مروچی شمے ھمکوپگی ھما ھد ءَ درکار انت کہ ھما شھیدانی ھون پہ جنز ءَ درکار بیتگ اَنت اگاں بلوچستان آزاد بیت گڑا سرجمیں راج ءِ ایمنی بیت سرجمیں راج وتی میتگانی تہ ءَ ایمنی نِشت کرت کنت ۔
راجی جنز ءَ بہ رکین اِت راجی جنز ءَ گوں وت ءَ بندوک بہ کن اِت راجانی دیم ءَ وت ءَ راجی ءِ بستار ءَ بہ اوشتارین اِت راجانی سرپ ءَ اوشتوک بہ بیت اے پندل ساز ءُ کشندہ پرستانی ھمراھداری ءَ یلہ بہ کن اِت کہ آیان وتی سرجمیں راہ ءُ در بند کرتگ اَنت آیاں پہ وت ءَ بلوچستان ءَ ھمینکسیں زمین پَشت نہ گپتگ کہ آیانی کَلاں جاہ بہ بیت پَرے ھاتر ءَ آ شمارا ھم گمراہ کنگ ءَ اَنت وتی دوست ءُ دشمن ءَ بہ پھم اِت مروچی اے شمے دیم ءَ انت کہ راجی جنز بندات بیتگ چنت مردمانی زند پہ زھر آماچیں نِشہ ءَ چہ رکیتگ گڑا اگاں شما آ دگہ چیزاں پھمیت کُرت نہ کن ئے اے چیز شمے دیم ءَ ایں الم من ءَ شمے سر ءَ ستک انت کہ شما درستیں چیزاں پھمیت کرت کن ئے ءُ گوستانک ءَ پد ءَ وتیگ ءَ وشھال کُرت کن ئے
راجی جنز سوبین بات
پندل ساز ءُ دروگ بند نیست ءُ نابود بات اَنت
