افسانہ
بولان نا مابت
(اولیکو بشخ)
نوشت: گلزار بلوچ
مَٹ: عتیق آسکوہ بلوچ
“گراناز دا میرو نا بانسری نا توار ءِ نا؟” حانی خواہ ءِ بیش آن شیف کننگ وختا پد آ چَک ءِ ہڑسیسہ مَش نا پارہ غا اُریسہ سوج کرے.
“ہمو ابدال ءِ پین دیر مننگ کیک ہرا مَش و پَٹ آتیٹ بانسری خلیسہ ہمیش پیری خلے.” گراناز بے چکاری تون پارے.
“امر کہ مرے، بانسری گچین خلیک. اُست خوائک بس بنیسہ کاؤ تا، دانا توار تینا پارہ غا چکیسہ کائک. دنکہ بدن جانکش ہلنگا بریک، دُدینگسہ دانا پارہ غا ہننگ کن اُست خوائک.” حانی بے سد میرو نا بانسری نا بابت پاننگ ئس.
حانی تون دیر پُر کننگ کن اوڑتون بروکا سنگتاک گراناز و نوری ٹاکو خلیسہ مخار و پاریر: “میرو ابدال ئسے، داٹی سر و باگل نا انت سیالی ئس.”
حانی خواہ ءِ دیر کریسہ پارے کہ “میرو ابدال ئسے ولے اونا بانسری آخہ. اونا بانسری اٹ دڑد ئسے، بے جاراتی ئسے، کڑمبی ئسے، مہر ارے یا گڑا کڑمبو عشق ئس.”
دوارہ حانی گُد ءِ تینا دنّان تیٹ ہلیسہ پُر آ خواہ نا باہ ءِ تفیسہ سوج کرے: “انت میرو چُنکی آن ابدال ءِ یا کس ئنا عشق اٹ ابدال ءِ؟”
گراناز ورندی تریسہ پارے: “میرو نا بابت کس ءِ سما اَف کہ او ہرا وخت آن دُن ءِ، او دیر ئسے، اونا اُرا والاک دیر ءُ” دوارہ گراناز مُون ءِ تینا کرنچ کریسہ پارے: “و کس انتکن اسہ ابدال ئسے نا بابت داخہ معلومداری تخہ، میرو کراہی آ کچھی آن خراسان آ لَڈ و ہنپ نا وختا کاروان تون مریسہ بریک و سیڷ ئنا بننگ آ کاروان تیتون بولان نا اسہ مزار ئسے آ ہڈ کیک. میرا نا ہند بولان ءِ، او ابدال ئسے، اونا کس ئتون ہَڷ و تس اَف.”
حانی سوج کرے: “میرو تینٹ پاپک کہ او دیر ئسے، انتئے دُن ءِ؟”
گراناز پارے: “میرو کس ئتون ہیت کپک، ایلوفتا ہیت آتے بنیسہ بیرہ بشخندہ کیک. بانسری اونا نشہ ءِ یا گڑا اونا سنگت.” گراناز یخ آ دیر تیٹ مُون ءِ تینا سلیسہ پارے: “باوہ جان پاننگ ئس کہ دا سال ہراتم ننا کاروان کرائی نا وختا بولان آن گدرینگسہ، بی بی نانی نا ہند آ نن سلیسن گڑا میرو ہموڑے مزار نا رہی آ تولوک کاروان تے سیل کننگ ئس. ہراتم نن سرہلکن گڑا او ننتون اوار مس.”
حانی: “کاروان اودے تینتون تد مننگ آ نئے پاپسہ؟”
گراناز: “میرو ءِ کس نئے پاپک، نئے پار ہم انتکن او ابدال ئسے، کس ءِ تنک کپک. میرو کاروان نا ہچو خلق اسیٹی ہڈ کپک، کس آن ہچس خواپک. او بس خلق آن مُر مَشتیا تولوک بے سد مریک، پَٹ آتیٹ ابدال آتیانبار ہنیسہ کائک. بانسری خلیسہ و سرونز آن سُر تالان کریسہ کائک، تینتون گم مروک مریک.”
حانی آ دنکہ دا ہیت آتا اثر مننگ ئس. او میرو تون ڈُب ہلیسہ ہننگ ئس. او داخہ در دا ہیت آتے خوڑتی تون بننگ ئس کہ اونا خواہ پُر مسوسس ولے اودے سما تمنگ اَلو.
نوری ہراتم خواہ ءِ پُر مروک خنا گڑا حانی ءِ پارے: “گودی خواہ پُر مسونے و نے سما اَف!”
گراناز بشخندہ کریسہ شغان نا ڈَول پارے: “حانی ءِ میرو ابدال تون عشق مسونے.”
ہڑتوماک ٹاکو خلیسہ مخار. حانی خواہ ءِ بابیرہ اٹ تفیسہ بیش آ بیٹ کرے و گراناز و نوری ءِ پارے: “کانبو اُرے مس، خلق ہم مُر ءِ.”
حانی سر ہلیسہ میرو نا پارہ غا مَش آ اُرا ہرانا بانسری نا توار داسہ ہم مُد ئٹی بے سُدی تالان کننگ ئس، اوفک سر ہلکر. چشمہ آن خلق اسکان پند اٹ حانی دنکہ اسہ پین جہان اسیٹی ڈُب ہلوک ئس. گراناز و نوری ہیت آتیٹ مشغول ئسر و حانی سوچ آتیٹ ڈُب ہلوک ئس. حانی ٹَک خلنگ ئس کہ گڑاس تو ارے ہرا میرو نا سُر و ساز ءِ داخہ در پر اثر کیک. اوفک خلق آ سر مسوسر. حانی دا غم و خیال آتیان آزات مریسہ اُرا نا کاریم تیٹ اختہ مس. بزگل ہم بسوسُس، مال نا خوڑدہ غاتا وخت ئس حانی کاریم تیٹ داخہ در گٹ مس کہ اودے میرو اسُل یات بتو. حانی ءِ دَغک تیتون بھاز مابت ئس، او اوفتیتون گوازی کریکہ، اوفتے مابت تسکہ. ننکان ہراتم تیوہ غاک خاچار گڑا حانی ہم خاچنگ کن ہنا، تیوہ غا دے کاریم تیان دمدر مریسہ خاچنگ کن بالشت آ کاٹم ءِ تخا گڑا تغ اودے تینا بغل ٹی ہلک.
خلق نا زالبولک ہر اِرا دے آ دیر ہتنگ کن ہنارہ. اینو اسیکہ وا زالبولک دیر اتنگ کن پیش تمار. خلق نا منہ پین زالبول ہم اوار ئسر. ہراتم اوفک چشمہ آ سر مسر گڑا تیوہ غاک تینا خواہ تے پُر کننگ آ لگار. منہ زالبول پُچ سلینگ کن ایسوسر، اوفک دیر باسفنگ کن خاخر لگفیر کہ کال شاغسہ پُچ سلیر. منہ زالبول کاٹم مَشنگ ٹی لگّار. حانی دیر کَننگ وختا واردم آ چَک ءِ ہڑسیسہ مَش نا پارہ غا اُراکہ، ہراڑے مالو نا وار میرو تولوک بانسری خلنگ ئس ولے اینو میرو اَلو. گراناز ہرا حانی نا رہی آ ئس، حانی ءِ سروشک ءِ تینا خلیسہ تنک کریسہ پارے:
“امر نکن میرو ءِ پٹّنگ ئُس؟ اینو نا ابدال ساڑی اَف.”
حانی گراناز نا پارہ غا مابت تو خن تے کشیسہ پارے:
“امرو ہیت کیسہ! ای تو ایہن اوننگ ئسوٹ. کنا او ابدال تون انت کاریم.”
گراناز و حانی نا ہیت آتے بنیسہ خلق نا اسہ بھلو عمر والا زالبول ماہ گنج سوج کرے: “انت اوننگ اُرے مسڑکوک؟”
گراناز ورندی تس: “حانی، ابدال میرو نا سوج ءِ کننگ ءِ، مالو نا وار نن بسون گڑا او دا مَش آ تولوک بانسری خلنگ ئس.”
ماہ گنج آسڑد اس کشیسہ پارے: “میرو… میرو ابدال ئسے، اللہ نا بندہ ئسے. اندنو ابدال اس ہرا تینا خدا نا عشق ئٹی ءِ، درویش ئسے میرو…”
حانی’ تاتہ ماہ گنج نا رہی آ ہنا تُوس ہرا تینتون ہتوکا پُچ آتے سلینگ ئس. حانی سوج کرے:
“تاتی نی میرو ءِ چاسہ؟ میرو دیر ئسے؟ او ابدال امر مس؟ او ہراڑے ہندی ءِ؟ اینو انتئے داڑے اَف؟”
حانی بے جاراتی تون سوج ئنا زی آ سوج ارفنگ ئس. اونا خن تیٹ دنکہ اسہ گروشک اس ئس، اسہ اُست خواہی اس ئس میرو نا بابت اٹ. تاتی ماہ گنج پارے:
“کنا مسڑ، میرو نا کس ءِ سما اَف کہ او دیر ئسے، اونا لمہ باوہ دیر ءُ. او دا وادی تیٹ پیری خلیسہ کیک، اودے کس ہچبر خنپک. کس ءِ انت سما کہ او ہراڑے سلے؟ او خلق تون ہمراہ مریک ولے اوار مفک، ہرا خلق تون ہمراہ مریک او ہمو خلق ئنا باہوٹ ئٹی مریک یا گڑا…” آسڑد اس کشیسہ تاتی دوارہ پارے: “یا گڑا ہمو خلق اونا و نن تیوہ غاک اونا باہوٹ ئٹی مرینہ. او بندغی تصور و وجود آن خلاس خننگک یا گڑا اونا شخصیت بھاز زیات شابیتی تخک ہرانا درک لَس آ بندغی سوچ و خیال آتیان مننگ کپک.”
تاتی ماہ گنج’ میرو نا شخصیت ءِ اندن بیان کننگ ئس دنکہ او اسہ بندغ ئسے نا آخہ بلکن قدرت نا صفت ءِ کننگ آ مرے، فطرت نا اسہ رنگ ئسے بیان کننگ آ مرے.
ماہ گنج مُستی پارے:
“مسڑ، میرو ءِ خنوئی ءِ، اونا شخصیت یا اونا کڑمبی ءِ اُروئی مرے گڑا میرو ءِ چانڑدہ نا نن اٹ اسہ وہوکو دیر ئسے نا رہی آ یا گڑا اسہ مَش ئسے نا ٹیڑ آ تولوک بانسری خلیسہ بنس، اُریس. میرو چانڑدہ نا ننکان اسہ دیر ئسے نا رہی ئنا مَش ئسے آ تولوک بانسری خلیک، ہمو ننکان اونا بانسری بے سد کروک مریک. پارہ کہ ہمو ننکان اونا بانسری آ جِن و پریک بریرہ چھاپ کیرہ.”
تاتی ماہ گنج پاریسہ ہننگ ئس و حانی بنیسہ ہننگ ئس. حانی سوج کرے کہ “تاتی، میرو کس ئسے نا عشق ئٹی دُن ءِ؟”
تاتی ماہ گنج: “کنا مسڑ دُن انگا درویش آک اسہ بندغ ئسے نا عشق آن مُونی مریرہ. دافک تینتون عشق کیرہ، خدا تون عشق کیرہ. کائنات نا زیبا غا گڑا و ہر بندغ تون اوفتا عشق مریک. ہرا ڈغار آ زند گدریفرہ ہموڑتون عشق کیرہ. میرو نا عشق ہم اندن ءِ ولے میرو کس ئتون ہیت اسُل کپک، اینو اسکان کس میرو آن چاہندار متو کہ اونا دا کیفیت نا سوب انت ءِ.”
ماہ گنج کڑمبو سوچ اسیٹی ڈُب ہلنگ آن گڈ پارے: “بلکن میرو ءِ اونا وڑو اسہ عاشق، ابدال، درویش اس پُہہ مرے.”
دوارہ تاتی ماہ گنج نازاں مریسہ پارے:
“نے سما ءِ کہ میرو بولان نا ہرا کاروان تون ہمراہ مریک گڑا ہمو کاروان ہمو سال نا بولان نا ٹیکی (انعام) ہلوکا کاروان پاننگک. میرو بولان نا گٹ و ہر ٹیڑ تون دنکہ خمب ہلیسہ کائک. او پند ئنا نیامٹ بولان تون ہیت کریسہ کائک، او بولان تون مخک. پارہ کہ ہراتم او بولان اٹ پند اکن سر ہلیک گڑا بھاز خوش مریک، اودے بھازا کیفیت آک گیڑ کیرہ، او بے سد مریک، ٹاکو خلیک، گارّہ خلیک، فخر ئتون کائک، معصوم اس مریسہ بولان نا بغل ٹی خاچک. او بولان نا چشمہ غاتا دیر تے کنیسہ بے سد مریسہ خننگک. اندن گمان مریک کہ بولان نا رنگ آک، بولان نا زیبائی اوڑتون اوار پند کیرہ. او بولان ءِ اندن اُریک دنکہ اسہ عاشق اس تینا مابت نا دیدار ءِ کننگ آ مرے. بولان نا بڑز انگا ٹیڑ آتے خوڑتی تون سیل کیک.”
تاتی ماہ گنج بشخندہ تون حانی ءِ اُریسہ پارے: “سما ئنے حانی، ہراتم او مُر آ تولوک بانسری خلیک گڑا ننا کاروان نا سادار تیان ہلیس جنگلی چُک آک ہم اونا بانسری نا توار آ دنکہ چھاپ کریسہ خننگرہ.”
تاتی برجاہ ڈَول اٹ میرو نا بابت پاریسہ ئس: “میرو ءِ خن تو دنکہ بولان اوٹی خننگک یا ہموتم بولان ءِ اُر گڑا میرو اوٹی خننگک. بولان نا فطرت ءِ میرو، بولان نا عشق ءِ میرو، او بولان نا رنگ ءِ، زیبائی ءِ بولان نا میرو.”
زالبولک دیر پُر کریسر. نوری، حانی ءِ توار کرے: “حانی زو کر تینا خواہ تے پُر کہ ننے ہنوئی ءِ تاتی ئسک اُرے آ بریرہ، مال و خوڑدہ غاتا ساعت بننگ ءِ.”
حانی اسہ دم تو ہیجا، بش مس و پارے:
“راست پاسہ، زو کبو لمہ پاریسُس کہ اینو مدر خریش جوڑ کروئی ءِ. بھاز کاریم ارے اینو لمہ سوختہ مرو، زو کانبو.”
حانی، نوری و گراناز خواہ تیٹ دیر ارفیسہ ہنار. کسر ئس، گراناز و نوری نا ہیتاک ئسر ولے حانی سوچ آتیٹ گم مروک، دا سما تمنگ اَلو کہ او تینتون ئس یا میرو تو ئس!
پند ئس، ہنیسہ ئس.
(برجا ءِ…)
