سوشل میڈیا ءِ بلوچ جھد ءِ تہءَ کرد
نبشتہ: حکیم واڈیلہ
(دی بلوچستان پوسٹ)
بلوچ راجی جُنز کہ بازیں سکی سوریانی دیمپان بیگءَ پد ھم جوانیں رنگۓ جُنزگءَ انت ءُ دیم پہ وتی مرادانی منزل بلوچستان ءِ آجوئیءَ روان اِنت۔ اے جُنز کہ ایشیءِ تہءَ ھزارانی کساسءَ پیر ، ورناہ ، زالبول ءُ کسان سالیں زھگ شہید ءُ بیگواھ کنگ بیتگ انت۔ اے جُنز کہ ایشی ءِ ردوم دیگءِ ھاترا پیریں بلوچ نواب اکبر خان بگٹی ، نوابزادہ بالاچ مری، بلوچ راجءِ دوستناکیں رھشون واجہ غلام محمد بلوچ گوں وتی ھمبل شیر محمد ءُ لالا مُنیر ءَ، بلوچی زُبان ءُ بلوچستان ءِ مستریں دوزواھ ءُ درد وار اُستاد صباء دشتیاری، ورناھیں سنگت ثناء، قمبر چاکر ، الیاس نذر ، احمد داد، ءُ دگہ ھزاراں پُسگاں وتی زِند ندر کُتگ اَنت۔
انگت ھم یک مزنیں کساسیءَ بلوچ راجءِ درد وار گارءُ بیگواھ اَنت۔ اے گار ءُ بیگوایانی تہءَ کراچی ءَ بہ گر داں ڈیرہ بگٹی ، کوہلوہ، کاہان ، کوئٹہ ، نوشکی ،آواران، مشکے، مکران ءُ بولان ءِ مردم ھوار اَنت۔ بلوچستان ءِ تہءَ چُشیں لوگ یا کہول باز کم اَنت کہ آ پاکستانی پوج ءِ زوراکیءِ آماچ نہ بیتگ اَنت ءُ تاوان بار نہ بیتگ اَنت۔
کساس ۱۸ سال اِنت کہ بلوچ ءَ اے جھدءِ بندات کُتگ ھما وھدا جھد بنا کنگ بیتگ آوھدا نہ سوشل میڈیاءِ بیتگ ءُ نہ کے انٹرنیٹ ءِ ھاسیں آسراتی رسانک ءِ پا ھالے سر کنگ ءَ. مستریں زریعہ یا وا ٹی وی ءِ نیوز بیتگ انت اگں نہ گُڑا ھالتاک ءِ ۔ بلے مروچی جاور باز مٹ بیتگ اَنت ھمک مردمءِ وت یک نیوز نیٹ ورک ءِجوڑ کُت کنت ءُ ھالاں انٹرنیٹ ءُ سوشل میڈیاءِ کمکءَ دگنیاءِ سرا سر کُت کنت۔ سوشل میڈیا ءَ بلوچانی مزنیں مُچیءَ کساس ۸ سال اِنت کہ ھمدا وتارا داشتگ اِش ءُ جوانیں وڑءَ کار ھم کنگءَ اَنت۔ سوشل میڈیاءِ تہءَ اولی ۳ سالاں پاکستان ءُ آئی ءِ کاسگ چَٹانی ھلاپءَ بلوچاں سک مزنیں ءُ ترندیں کمپین کُتگ ءُ سوب مند ھم بیتگ اَنت۔ اے اولی ۳ سالانی تہءَ دگنیاءِ بازیں اھوالکاراں ، سیاست کار ءُ انسانی حقانی ھاترا جھد کنوکیں گلاں ھواریں مردماں سرپدی رستگ ءُ آیاں باز جاگہ ءَ بلوچانی جیڑہ چِست کُتگ ءُ بلوچاں داں یک ھد ءِ اوستءِ ھم رستگ۔
چُش کہ وائٹ ھاوسءِ نیمگ ءَ چہ بلوچ سوشل میڈیا جھدکارانی جُست ءِ پسہ وتی بریفنگ ءِ تہءَ داتگ ات ھمئے وڑا الجزیرہ، بی بی سی ءُ دگہ مزنیں نیوز چینلانی تہءَ ھم بلوچ ءِ جھد ءُ بلوچستان ءِ تہءَ بیوکیں پاکستانی زوراکیانی سرا نہ تھنا مراگش برجم دارگ بیتگ اَنت بلکیں بلوچ سوشل میڈیا ءِ سرا کار کنوکیں سنگتانی ٹویٹس ءُ آہانی رپورٹ ھم پیش دارگ بیتگ اَنت۔
بلئے ھمے دُراھیں جوانیں گامگیجانی نیامءَ ہم یک وھدءِ انچیں بندات بوت کہ سوشل میڈیا اناگتی بلوچ پاکستانءِ بحث ءُ ایراد گرگءِ جاہءّ بلوچ گوں بلوچ ءّ گورجیگ کنگ بوت اَنت۔ ھمک روچ یک نوکیں گپ ءُ نوکیں جیڑہءِ سرا وت ما وتی مپت ءُ ناحقیں تنقید ءُ سنگتانی کردار کُشی بندات کنگ بوت۔ ھواریں ءُ کامیابیں کمپینانی جاگہ یک دومیگءِ ایرجنگءَ گپت۔ انچیں جاور پیداک کنگ بوت انت کہ بازیں مردم دل رنج بوت اَنت ءُ بازیناں چہ ھمئے جیڑاھانی سببءَ وتی دلگوش دگہ نیمگءَ دات ءُ بلوچانی مچی پروشان بیت ءُ پاکستان ءُ آئیءِ چاریگاں چہ ھمے وت ما وتی جیڑہانی باز پائدگ رست ءُ بلوچاں باز تاوان ۔
سوشل میڈیا ءَ بندات بیتگ ایں وت ما وتی جنگ ءُ یک دومیگءَ چہ دیمءَ بوگءِ ریسءَ لہتیں جوانیں سنگتاں وتا بھر نہ کتگ ءُ آیاں مُدام ھمے کوشست کُتگ کہ دُراھیں بلوچ گل ءُ سنگتانی ھبر ما جھانءَ سر بہ بیت ءُ بلوچستان ءِ آجوئیءِ توار دگنیاءِ دیمءَ سر بہ بیت۔ بلئے پدا ھم باز مردماں ھمے سنگتانی کار ءُ آیانی کمپین ءِ سرا زھر اتکگ ءُ آیانی سرا بے بنیں ءُ دروگیں بھتام جنگ بندات کُتگ ایش۔ اے بھتامانی جنوک اگں پاکستان ءُ پنجابی ءِ بہ بیت ایں سر پر بوتگ ات۔ بلئے وتارا آجوئی لوٹوک گشوکیں مردم وھدءِ بے منانک ءُ دروگیں بھتام جنت گُڑا الم ھما بھتام جنوک ءِ نیت ءُ کِرد ھم چارگ بیت ءُ آئیءِ سرا جُست ھم چِست بنت۔
مرچی پدا سوشل میڈیا ءِ تہءَ جاور کمو گہتر بیتگ اَنت یک مزنیں کساسیءَ مردم سرپد بوتگ اَنت کہ سوشل میڈیاءَ بے بنیں بحث ءُ بھتام ءُ ایر جنگ ءُ گداری ءِ سرٹیفیکیٹ بھر کنگ یا اگں مردماں دمگانی تہءَ بھر کنگ کسی ءَ بلوچ ءُ در بلوچ گُشگءَ چہ نہ تھنا بلوچ جھد ءَ تاوان رسیت بلکیں ریاست وتی داشتگیں کاسگ چَٹانی ھمراہ داریءَ لس بلوچءِ نیامءَ پروپیگینڈہ بندات کنت کہ بلوچانی سیاسی مردم وا ایش انت روچ ءُ شپ گوں یک دومیگءَ گور جیگ اَنت چہ ایشاں آجوئیءِ اوست دارگ بزاں وتارا رد دیگ اِنت۔
ھما کُلیں سنگت کہ گوں ایمانداریءَ جھدءَ بندوک اَنت ءُ لوٹ اَنت کہ بلوچ ءِ توار ماں جھانءَ جوانیں رنگءَ سر بہ بیت گُڑا درستاں پیسر یک سوشل میڈیا کوآرڈینیٹگ ٹیم ءِ اڈ کنگ بہ بیت کہ آئیءِ تہءَ بلوچ راجی جنُزءَ گوں بندوکیں دُراھیں اسٹیک ھولڈرز ھوار کنگ بہ بنت ءُ ھواریں وڑی ءَ بلوچ راجی توار دگنیاءَ رسینگ بہ بہ بیت ءُ وتارا یک سرپد ءُ زانتکاریں راجءِ وڑا پیش دارگ بہ بیت دانکہ بلوچ راجی آجوئیءِ توارءَ گوش دارگءَ ساڑی بہ بیت۔
