نوشت: کامران بلوچ
ریاست پاکستان نا بلوچستان نا زی آ کوزہ و بے دادی تیٹ پاکستانی فوج تون اوار اگہ پارلیمانی سیاست و پاکستانی پارلیمنٹ اٹ بشخ ہلوکا قوم پرستی نا دعویٰ کروکا سیاسی پارٹی تیا چمشانک اس شاغنگہ تو بلوچ قوم آ زُلم و بیدادی و بلوچ قوم نا بدن آن وہوکا دتر تیٹ قوم پرستی نا پِن آ سیاست کروک آتا دُوم ہم رنگی ءُ. اندا پارلیمنٹ آن بلوچ قوم آ آپریشن کننگ نا پالیسیک منظور مریسہ کرینو. و اسہ پارہ غا قوم پرستی نا دعویٰ کروکاک بلوچ قوم نا مُونا بلوچ بے گواہ غا مخلوق و سائل و وسائل آتا حق ئنا ہیت کریسہ بلوچ مخلوق ءِ ریفرہ تو ایلو پارہ غا بلوچ گلزمین نا استحصال ءِ کریسہ سائل و وسائل آتا لُٹ و پُل اٹ پنجابی سامراج تون ہمراہ مریسہ اونا کمکار ءُ.
بروکا سال اٹ یعنی اِرا ہزار و ہژدہ (2018) اٹ پاکستانی ریاست اسیکہ وا گچین کاری نا ڈرامہ ءِ ہڈ تننگ نا سوچ ءِ خلنگ و دا گچین کاری تا ڈرامہ ءِ اودے بلوچستان اٹ ہر حالیت اٹ سرسہب کروئی ءِ کہ او جہان ءِ ریفسہ نشان تریفنگ خوائک کہ بلوچ قوم و بلوچستان پاکستان نا بشخ ئسے ءُ و بلوچ قوم پاکستان تون اوار ءِ، حالانکہ گواچنی آ ہیت دادے کہ پاکستان اٹ گچین کاریک بیرہ پِن نا ہد اسکان مریرہ و اسل گچین کاریک پاکستان نا اسٹیبلشمنٹ و خفیہ ادارہ غاتا دفتر آتیٹ آتیان مریرہ و بلوچستان اٹ پاکستانی گچین کاری تا گواچن آ دروشم ءِ تدوکا وخت اٹ 2013 نا گچین کاری تیٹ خنان کہ تیوہ غا بلوچستان اٹ ٹرن آؤٹ %2 ئس. ہراڑان دا پاش مس کہ بلوچ قوم ہچبر پاکستان تون مننگ خواپک.
تجزیہ کار آتا پاننگ نا رِد اٹ بروکا گچین کاری تا ڈرامہ ءِ بلوچستان اٹ سرسہب کننگ کن پاکستانی اسٹیبلشمنٹ تینا پورہ وس و طاغت ءِ خلو، و جہان ءِ پورہ باور کریفنگ نا کوشست کرو کہ بلوچستان اینو ہم پاکستان تون تفوک ءِ. دا ڈرامہ اٹ قوم پرستی نا دعویٰ ءِ کروکا پارٹیک پاکستانی اسٹیبلشمنٹ تون کمکار مرور ہراڑان پاکستان جُوان فائدہ ارفنگ نا کوشست کرو. انتئے کہ قوم پرستی نا دعویٰ کروکا پارٹیک ہمیش ہمو کارڈ آتے کاریم ئٹی اتیسہ کرینو کہ ہرافتیان بلوچ مخلوق ئٹی آسراتی نا اُمیت اس ودی مریک، دا کارڈ آتیٹ زند ئنا ایلو آسراتی تون اوار بلوچ بے گواہ تا یلہ کننگ و سائل و وسائل آتیا حق ئنا کارڈ ہم کاریم ٹی ہتنگسہ مسونے ولے بلوچ قوم ءِ داسہ جُوان سرپند مروئی دا بیرہ ریفنگ نا ہیت ءُ، گواچنی دا قوم پرستی نا دعویدار آک ہمیش اندری اسہ ڈیل اس کریسہ پارلیمنٹ نا بشخ مسونو و اندن نن خنان کہ نیشنل پارٹی نا حکومت نا بننگ تون بلوچستان نا ہر کنڈ اَمرو خاخری ءُ آپریشن آک بناء کننگار، تو دا تیوی آ گڑاک قوم پرستی نا دعویٰ کروکا تا گواچن آ دروشم ءِ نشان تننگ ءُ و داڑان دا ہیت پاش مریک اسیکہ وا بلوچ قوم دافتا دروغ آتیٹ بف.
2018 نا گچین کاری تے سرسُہب کننگ نا خاطر پاکستانی اسٹیبلشمنٹ داسی آن تینا کاریم نا بناء ءِ کرینے. دا رِد اٹ “سوات طرز آپریشن” نا پَڑو ہم حکومتی کارندہ غاک کرینو. وداڑا عمل کریسہ تیوی آ بلوچستان اٹ آپریشن آتا اسہ برجاء ءُ سلسلہ اس بناء کننگانے و دا وخت اسکان مشکے، تربت، بولان، خاران، ہرنائی و پین بھاز آ علاقہ تیٹ آپریشن آک مریسہ ءُ، ہرافتیٹ بلوچ فرزند آتا شہید کننگ و بے گواہ کننگ تون بلوچ زالبول و چُنا تے ہم دزگیر کننگانے و دا سلسلہ دائسکان برجاء ءِ.
دا آپریشن آتیان اندا خننگک کہ پاکستانی ریاست ءِ بلوچ سلاء بند تنظیم آتیان خُلیس ءِ کہ اسہ پارہ غا دافک “سی پیک” ءِ نسخان تننگو تو ایلو پارہ بروکا گچین کاری تیٹ دا تنظیم آک ہڑاند شاغور. اندا سَوب آن او دا تنظیم آتیا تینا پورہ طاغت ءِ خڑچ کریسہ ءِ.
پاکستانی ریاست نا پارہ غان گچین کاری تا سرسہبی کن داخہ طاغت خلنگ دا گچین کاری تا اہمیت ءِ ظاہر کیک، دا رِد اٹ بلوچ سلاء بند تنظیم آتیتون اوار سیاسی پارٹی و تنظیم آتا کوپہ غاتیا زمہ واری تا بڈ پین زیات مریک کہ اوفک دا گچین کاری تے بے سُہب کننگ کن تینا کاریم تے تیز کیر انتئے کہ دا گچین کاری تا بے سُہبی بلوچ قومی تحریک نا مُستی سرسُہب مننگ نا ذامن مرو، دا گچین کاریک نشان ایتور کہ دیر اخس دیر ئٹی ءِ. ریاست پاکستان تو تینا تیاری تے برجاء تخانے و دا گچین کاری تا سرسہبی کن داسی آن کاریم کننگ ءِ ولے سوج دا ودی مریک کہ بلوچ قومی تحریک تون تفوکا تنظیم آک ہرا ہد اسکان داڑکن تیار؟ انت بلوچ سیاسی و سلاء بند تنظیم آک دا لائخی ءِ تخرہ کہ بلوچ مخلوق گچین کاری تا دے اسُل تینا اُرا تیان پیشن مفس و جہان ءِ نشان ایتر کہ نن پاکستان تون مننگ خواپنہ، اگہ آن گڑا دابلوچ تنظیم و بلوچ قومی تحریک نا سرسہبی نا مستائی مرو.
