گوشنت گلامی ءِ باز دروشم انت اولی دروشم یک مردمے ءَ گلام کنگ ءُ آئیءِ ھقانی پُلگ دومی سیاسی ءُ چاگردی گلامی سہمی ذہنی گلامیءُ چارمی ءُ مستریں گلامی یک راجے گلام دارگ آئیءِ زمین،زبان، دودربیدگ ، مذہب، آئیءِ زندگ بیگءِ ھق ہم پچ گرگ.
اگں یک مردمے دومی مردمءَ گلام کنت آئیءِ ھقاں پُلیت ءُ آئیءَ چہ وشیاں زبہر کنت ءُ تہنا پہ وتی کارگزاری ءُ گلامیءَ زندگ داریت گُڑا بِزان کہ ھما گلام ئے واسطہ الم اِنت کہ پہ وتی ھقانی پچ گرگ ءُ وتا آجوہ کنگ ءِ ھاترا جہد بہ کنت اول سرا وتی تاگتءَ کارمرز بہ کنت کہ وتا بہ رکین ایت۔ اگں نزور انت گڑا جاک ءُ کوکار بہ کنت دانکہ کشءُ کِر ءِ مردم آئیءِ توار ءَ گوش بہ دار انت ءُ آئیءِ درد ءَ بہ مار انت ءُ آہاں رکینگءِ ھاترا وتی سرکاری ءُ نیم سرکاری اداراہاں ھال دات بہ کن انت۔
دومی گلامیءِ دروشم کہ گوں سیاست ءُ چاگردءَ بندوک اِنت،
اے یک یا دو مردمانی جیڑا نہ انت اے یک چاگردی جیڑہ ئے۔ اے ھاکمءُ مہکوم اے جیڑہ ایں، ووٹ پنڈوک ءُ ووٹ دیوک ءِ جیڑہ ایں, اے امیر ءُ گریب ءِ جیڑہ ایں, اے سرمایادار ءُ پوریاگرءِ جیڑہ ایں، اے دھکان ءُ زمین دارے جیڑہ ایں اے، چاگردی آسراتیانی سرا قابض ءُ ہمے قبضہ ءَ چہ بیزاریں مردمانی نیامءِ جیڑہ ایں۔ اے جیڑہ ءِ مستریں سؤب سیاسی گلامی ایں پرچہ کہ مردمے جیڑگ ءُ شعوری پیسلہ کنگے تاگت زہبر کنگ بنت ءُ آہاں ترسینگ بیت اگں ملام دیگ بیت ءُ وتی ھمراہ کنگ بیت ءُ کسے کہ ھمراہ نہ بیت آئیءِ چاگردءِ تہا زند گوازینگ نامناسب بیت گُڑا آئیءِ گورا تہنا دو راہ پشت کپیت اول چاگردءَ وتی سیادی ءَ بہ سندیت ءُ پہ وتا شرتریں جاہ ءِ بہ شوہازیت۔ اگں نہ دومی راہ جہد کنگ ءُ آشوبءِ آرگ بیت کہ پہ آشوبءَ وتی ساہ، مال، وھد ءُ زندءِ ھمک وشی ندر کنگ لوٹنت ءُ پہ چاگردی ءُ سیاسی آجوئیءِ جہد بندات کنگ لوٹیت۔ ھچ وڑیں آشوب ابید چہ جہد ءَ اتک نہ کنت ءُ آشوب ءِ آرگءِ ھاترا ترا ھما اثرمندیں ہندانی مہلوکءِ ھمراہداری ءُ کمکے لوٹ بیت ۔ ہمے ھمراہ داریءُ کمک آشوبءَ راستیں وڑےءَ کامیات کُت کنت۔
سہمی گلامی کہ ذہنی گلامی ایں،اے گلامیءّ مردم گیشتریں وھدا شعوری ءُ لاشعوری صورتءَ وت قبول کنت۔ چُش کہ یک مردمےءِ مرید جوڑ بیگ انچُش کہ ما گِند ایں چاگردءِ تہا بازیں زندگیں پیر است انت یا انچیں مردم است انت کہ آ وتارا ھدا گوشنت ءُ مرچیگیں کرنءَ ہم مردم آیانی ھبرانی منوگر انت۔ اے مردمانی تہا وانندگیں مردمانی ہم مزنیں کساس ایں ھوار انت۔ اے منی نزا گلامی ءِ درستاں چہ سِل تِریں دروشم انت پرچہ کہ ذہنی گلامی تہی جیڑگ ءِ تاگتءَ ھلاس کنت۔ءُ ترا یک انچیں روبوٹءِ جوڑ کنت کہ ہما کس اگں تاگت ءَ تہی ذہن گلام کُتگ ابید چہ آئیءِ حکمءَ دگہ نہ چیزےِ اش کنگءَ تیار بیتءُ نہ کہ سرپد بیگءِ جہد کنت۔ ذہنی گلامیءِ آماچءِ مردمانی راستیں راہءَ آرگ چہ چاگردی آشوبءِ آرگءَ گرانتر اِنت بلئے ناممکن نہ انت۔ اے کار وھد لوٹیت، اوپار لوٹیت، برداشت لوٹیت، سرپد بیگ ءُ سرپد کنگءِ جزُبگ لوٹیت۔ اگں کسے پدا ہم سرپد مہ بیت گُڑا مزنیں تاوانءِ ورگءَ پد ھوش کنت گُڑا سرپد بیت کہ آئیءَ وتی دگنیاءِ بن ھِشت دروگ ایں اوستانی سرا ایر کتگ بیتگ۔
گلامی ءِ چارمی ءُ مستریں دروشم یک راجءِ گلام کنگ اِنت بزان یک سرڈگارءِ سرا ڈنی مردمانی قبضہ ءُ زمین ءِ سرا آبادیں راجءَ چہ ہمک وڑیں ھقاں زبہر کنگ انت۔ گلامیں راجءِ دودءُربیدگ ، زبان، مذہب، کاروبار ءُ زمین ءِ سرا ڈنی قابض ایں مردم وتی دودربیدگءُ زبانءَ لس مہلوکءَ زور وانین انت دانکہ گلامیں راج چہ وتی پجارءَ بیھال بہ بیت ءُ راجی گلامیءِ تہا بیگواہ بہ بنت۔ ھمے بیگوائیءِ تہا دری قبضہ گیر گلامیں سرڈگارءِ تہا موجود ایں معدنیات ءِ پولّگءَچکءُ پد نہ بنت۔ بلئے اگں یک راجے وتارا چہ اے گلامیءَ رکینگ لوٹیت گڑا اے ھما راجءِ تہا موجود ایں سیاسی گلانی ءُ سیاسی سروکانی زمہ واری جوڑ بیت کہ وتی لس مہلوکءَ راجی گلامیءِ بابتءَ سرپدی دیگءِ جہد بہ کن انت۔ اے ھما رہشونانی زمہ واری جوڑ بیت کہ راجءِ تہا وتی زبان ءُ دودربیدگءِ زانگءُپجارگءِ اوست ءُ پہ وتی راجی آجوئیءَ ندر بیگ ءِ جذبگ پیداک کنگ بہ بیت۔ راجءِ تہا موجودیں سیاسی ءُ ادبی دانشورانی ہم زمہ واری جوڑ بیت کہ سیاسی گلانی ھمراہ داری بہ کن انت ءُ گوں وتی قلمءِ تاگتءَ راجءَ سرپدی بہ دی انت دانکہ مردم چہ گلامیءِ وابءَ آگہ بہ بنت ءُ پہ وشیں ءُ آزاتیں بانداتءِ ھاترا جہد بہ کن انت۔ پرچہ کہ راجی گلامیءِ ھلاپءَ ھمینچو دیرا پاد کئت ھمینچو گیشتر جہد کنگ لوٹیت۔
مرچی بلوچستان ہم گلام اِنت مئے سرڈگارءِ سرا ڈنی قبضہ گیر ظلم کنگءَ اِنت میتگانی میتگ ماندارگءَ انت جنین آدمءُ چکاں ھم بیگواہ کنگءَ ایں۔ بلوچ ورناءُ کماشانی بیگوائی ءَ پد کُشگ ءُ جونان روڈانی کُنڈا، کورانی تہا یا جنگلان دور دیگءِ کار باز پیسرا چہ برجہ اِنت گوں ایشاں ھوار بلوچانی زبانءُ دودربیدگ ھم زوراکانی زلمانی آماچ اِنت۔بلئے راجی گلامیءِ ھلاپءَ بلوچ سرمچار ءُ سیاسی گل ءُ زانتکار وتی کچءُ کساس ءَ جہد ہم کنگءَ اَنت۔ بلوچ وتی سیاسی ءُ جنگی جہدءَ گوں بازیں چِستءُ ایرءَ پد ہم گوں جوانیءَ دیمءَ برگءَ اِنت۔ چہ قبضہ گیریں اِستانءِنیمگءَ بازیں پندل سازگ بیتگ انت ءُ انگت ہم بیگ ءَ ایں چُش کہ بلوچستانءِ تہا آبادیں بلوچان مذہبءِ نامءَ بہر کنگ ءُ میڑینگءِ کوشست ءُ ریاستی چیردستیءَ مذھبی گلانی اڈ دیگ ءُ بلوچ جہدءَ مذھبی جنگءِ پیش دارگ استانی پندل ھوار انت۔ نوں چُشیں گرانیں وھدا کہ یک نیمگ ایں سرمچار کوہاں پہ آجوئیءَشپءُ روچ جہد کنگءَ انت۔ سیاسی گل لس مہلوکءِ تہا آجوئیءِ پیغام ءَ مُلک ءِ تہا ءُ درملکءَ سرکنگءَ انت۔ اے وڑیں جاوراں بلوچ سیاسی، ادبی ءُ مذہبی دانشورانی زمہ واری جوڑ بیت کہ گوں ستک دلءَ بلوچ راجی جُنزءَ دنیائے دیمءَ گوں وتی قلمءَ بیار انت ءُ دگنیاءَ بلوچ جیڑہ ءِ بابت ءَ سرپدی بہ دی انت۔
