لمہ ای خوانپرہ – ندیم گرگناڑی

54

لمہ ای خوانپرہ

نوشت: ندیم گرگناڑی

دی بلوچستان پوسٹ

اینو خنکتہ خڑینکی خیسن ئسر، گد کاٹما زندنا بیوس بے کس او خواری کروکا باوہ لمہ نا خواری کشوکا زندے خنسا است تہ تہٹی لاڑ کریکہ۔ زندنا بروکا وختے روشن خناکہ تو وختس ہمو زندے بھاز تہارمہ ہم خننگٹی ئسک۔ روشنائی و تہارمئی نا نیام ٹی اونا جنگ زندنا سختنگا ویل و ڈکھ آتیتو راہی روان ئسک۔

شہناز۔۔۔۔۔۔ کنا مسڑ۔۔۔۔۔۔۔۔۔
ہنینا لمہ نا توار تون شہناز تینا بروکا وختنا شرحالی نا خنوکا تغنا تعبیرے ریک نا زیہا تہو نا گواچی کریسا ہڑیسکارہ ئس خلک۔
شہناز۔۔ کنا مسڑ۔۔
زوبہ نیرن کرک نا خوانینگ نا وخت مننگٹی ءِ۔
شہناز اینو دڑدی آ استتو لمہ ءِ پارے: ’’لمہ ای خوانپرہ۔‘‘
ہاں کنا مسڑ انت پاسہ۔ طب نا تو جوانے نہ۔۔۔ آھو لمہ طب کنا جوانے بس خوانپرہ۔
انتئے کنا مسڑ۔۔۔ لمہ نا بلہ غاتے ارفے۔ باوہ نے ہیت ئس کرے یا ایلم نیتو جنگ کرے۔ کنامسڑ آخر کنتون پار۔ مسڑ تینا ہرہیتے لمہ تون پائک ۔ بر بر کنا رہا توڷ آخر کنا مسڑ گودی ءِ انت مس کہ خوانپک؟ کنا مسڑ نی خوانپروس تو ننا دا خوارا زندٹی شرحالی امر برو۔۔۔۔

شہناز خنتا خڑینکاتے گدنا پلوٹ پاک کریسا بس لمہ نا رہا توس۔
لمہ نا لخٹی دوتے شاغسا پارے: جی کنا ہنینا لمہ نے جوان سما ءِ کہ اسکول آن کالج، کالج آن یونیورسٹی اسکان سرمریسا دا زند ہرا اڑوجنجالی ئٹ تیر مسونے و کنے آنبارنگا خوانوکا مسنتے جوان سما ءِ، کنا لمہ چنک ئسوٹ اسکول آ ہناٹہ تو استاد ماسٹر پاریکہ بہلن مسوس بھازاتا استاتے ہشوس۔ ای مخاٹہ ولے استاد ماسٹر ہم ٹاکو اس خلکک۔ ای ہندن سرپند مسٹہ کہ استاد ماسٹر کنے آن بھاز خوش ءِ، ویگنا مسیتا کہ ہناٹہ تو استاد سائیں سبخ تس وختا کنا دوئے تینا دوٹی ہلکک توریکہ ولے ای ہندا سمجھاٹہ کہ سائیں داسا ایسا کنے لٹ اٹ خلیک ولے اینو ای دا سرپند مسونٹ کہ دا نیت نا خرابیک ئسر۔ اینو کالج آن کہ یونیورسٹی آ سرمسوٹ تو دا پِت آک کنا کسرٹی پین زیات تالان کننگار۔ کنا مسڑ سنگتاتان بھازاک تینا خوانینگ ءِ اسکول آن اِلار بھازاک کالج و یونیورسٹی آن اِلار۔
کنا لمہ نی پا کہ دا حالت آتیٹی ای امر خوانیو؟
پگا۔۔ پگا خدا کپ نا مسڑے۔۔۔!

شہناز بس بس کنا مسڑ۔۔ ای نا مچا ہیتاتے سرپد مسوٹ۔ کنا مسڑ بن اینو یونیورسٹی ٹی نا ایلمکو۔ نی کنا مسڑ او کل خوانوکا چھناک کنا ماکو۔ اوڑے خوانوکا ہر چنا ایڑ ایلم اریر۔ ننا اسٹ ایلو نا لج و میار اسٹ ءِ۔ ننا حیاء غیرت ہنداخس ءِ کہ تینا ایڑ لمہ تو تینائے ولے نن ایلو نا ایڑ لمہ کن ہم جان نا قربانی ترسا بسونن۔ مستناتے اِلے ہنوکا منہ سال مست نا وختے استا ہتہ دا واقعہ نا وختنا سیکہ کماشا کرم خان پین قوم سینا نیاڑی نا لج و میارٹی کسفنگا۔ ہرانا دیتتا شاہدی ءِ اینو ہم مچا خَل ءُ مشک تیرہ۔ کنا مسڑ نی خوان اینو ہم ای سوغند ہفیوہ کہ نا ایلمک زندہ ءُ۔ نا لج نا زیہا اوفک خن شیف مفرور۔

شہناز لمہ نا ہیتا تے بنسا ہرا وختا مونے بڑزا کرے تو زیبلا خنک حیاء نا خڑینکان پُر ئسر۔
شہناز پارے ہاں لمہ راست پاسہ ۔
یونیورسٹی ٹی خوانوکا چناک کنا ایلمکو۔

شہناز اینو خوشی آن گل و بالے۔ زندنا شرحالی کن بھلا امتحان ءِ ترسا سرسوبی نا پارہ غا گام تخنگٹی ءِ۔


دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان پوسٹ میڈیا نیٹ ورک نا دا ہیت آتے مَننگ الّمی اَف و نئے کن دا ادارہ نا پالیسی تا درشانی ءِ کیک۔