یاتانی دریگ | ہیہٹے پاکو ءِ جهنڈی ترا – هسابجار

70

یاتانی دریگ
” ہیہٹے پاکو ءِ جهنڈی ترا “

هسابجار

دی بلوچستان پوسٹ

عطاشاد ڈگری کالج ءَ تربت ءَ ملا فاضل ءِ یات ءَ دیوانے دارگ بوهگ ءَ ات ، من هم لوٹ ات کہ ایے دیوان ءَ بُروان ، بلے پہ من اے دیوان ءِ روگ چہ پُل ءِ سرات ءِ گوزگ ءَ کمتر نہ ات ، چی ءَ کہ منی شپانی در بوهگ پہ منی پت ءَ پہ وت یک پُل ءِ سراتے ءَ کمتر نہ ات ، منی پت ءِ فرمان ات کہ رو برکت ءَ ساری من لوگ ءَ ساڑی بہ باں ، منی پت ءِ اے فرمان پہ وتی یکیں مردیں چک ءَ ہبکہی گپے نہ ات ، آئی ءِ مهر ات انت ءُ زمانگ ءِ لوٹ –

من کجام هم وڑے ءَ وتی پت لاچار کُت ءُ پت ءَ منا رزا دات ءُ سد کلدار هم دات –

آ وهدی من چار ءَ وانگ ءَ اتاں ما کہ اسکول ءَ چہٹی کتگ ات ، ءُ سبارگ ءَ پد ما گوں چیزے سنگت ءَ وهدے کہ روڑ ءِ سرا اتکیں هولاکے ءِ ودار ءَ تہ من وتی پت ءِ ستا گوں اے لبزاں کُت ” منی پت ءَ شاباش انت کہ من ءَ دیوان ءِ روگ ءِ رزا ئےِ داتگ ءُ من ءَ سد کلدارئےِ هم داتگ ” سد کلدار آ زمانگ ءَ بلاہیں زر ے ات –

ما هولاکے ءِ ودار ءَ سیٹ عباس ءِ لوگانی پُشت ءَ اُشتاتگ اتیں کہ ٹرکے اتک ءُ ما دست دات ، آئی ءَ مارا زُرت گوں ما ٹرک ءِ چت ءَ نشتیں ، منی یک بدیں هادتے هست ات همے کہ هولاکے ءَ سوار بوتاں تہ آئی ءِ دیتانی بو ءَ دل هراب بوت آ چائے مهم بکش ءِ پچیس ءِ سلانسر ءِ دیتانی بو بی بیت ماں سیاهلو ءِ کوهانی تہ ءَ یا دگہ هولاکے –

مهم بکش منی پت ءِ زامات انت ، همے کہ چہ گتر ءَ اتکگ ات منی پت ئےِ زرُت ءُ شت وتی سانگ بندانی گندگ ءَ نگور ءَ ، ءُ من الم شتاں گوں ءُ آهانی پُچ چہ شانوکاں گہیتاں –

ما کہ وهدے ٹرک ءَ سوار بوتیں تہ منی شانگ بنا بوت ءُ من شاناں کُت ءُ وپتاں داں تربت ءِ کراس اتک جوسک کہ آوهدی تربت ءِ ایف سی ءِ کیمپ جوسک ءَ ات ءُ آئی ءِ کیمپ ءِ بُرج ءِ سرا پاکستان ءِ بیرک مِک ات ، گوں بیرک ءِ گندگ ءَ من سر چست کُت ءُ پنچ ئےِ دات ءُ گُشت ” ہیہٹے پاکو ءِ جهنڈی ترا ” پدا سر دوردات کہ دل سک هراب ات ، اے دیوان ءَ اِلُک گوادری هم گوں ات کہ سک کسان ات همے سوت ئےِ جت ” بی اس او مے جان توئے جهدانی ایمان توئے “

دومی همے کہ ” یک آسے روک انت ایران ءَ یک آسے روکیں افغان ءَ ما سوریں روچ ءِ انتظار کناں آزات بلوچستان کناں ”
آ دگہ گشندهانی هواری ءَ سعیت ایرانی هم گوں ات کہ وهد ے تلو ءِ سرا اتک تہ گوں وتی دست ءِ لنکُّاں وکٹری ءِ نشان ئےِ جوڑ کُت


دی بلوچستان پوسٹ: اے نبشتانک ءِ تہا درشان کُتگیں ھیال ءُ لیکہ نبشتہ کار ئے جِندئیگ اَنت، الّم نہ اِنت کہ دی بلوچستان پوسٹ رسانک نیٹورک ایشانی منّوک بہ بیت یا اگاں اے گل ءِ پالیسیانی درشانی اِنت۔