بولان اٹ چانڑدئی – مہر میر – عتیق آسکوہ بلوچ

44

بولان اٹ چانڑدئی

نوشت: مہر میر

مَٹ: عتیق آسکوہ بلوچ

اگست نا تُو و چانڑہ نا نن ئس۔ بولان اٹ طوبے نا پیش تمنگ آن مُست اسہ خرّن ءُ روشنائی اس تالان ئس۔ اندن گمان مسکہ کہ بولان نا مَش تیان ہلیس اوڑے ساڑی زند ئنا ہر دروشم طوبے کن کسر اُروک ءِ۔مہر ئنا وادی ٹی طوبے ایہن ہم بے سمائی و شبل ئنا نشانی مریک و دوارہ ہمو طوبے ہراکہ ہزار آ سال آتیان مُست ہم مہر گڑھ نا وادی ٹی مہر ئنا دروشم مسونے ہرانا سوب آن اینو ہم بولان اٹ عشق ئنا داستان آک ودی مریر، دن انگا طوبے نا کسر اُروکا نا گمان ہم بے سُد کروک مریک۔

تاریخ نا روانی پاس یا گڑا قدرت نا تینا قانود، بولان نا گچینی پاس یا مہر تون تفوکا جوزہ غاک، طوبے ہراتم بولان اٹ روشنائی تالان کیک گڑا زند تینا ہر دروشم اتون شبل و چھاپ ئتون مریک۔ ہر پارہ غاعشق ئنا بناء مریک ، زند ہر ہند آ عشق ئنا داستان آتے نوشتہ کننگ کن تولک۔

اینو بولان اٹ ہراڑے ہرگڑا ہر پارہ غا طوبے کن کسر اوننگ ئس ہموڑے ہیرونک نا ہند اچشمہ آن دیخہ مُری آ’ نورا‘ اسہ خل ئسے آ ٹیک خلوک تولوک ئس۔ او تینا مہر ئنا پَٹ و پول ئٹی ئس۔ اسہ سال اس مالو نورا ءُ مہرو اندا جاگہ غا تولسہ بولان نا سوغند و طوبے ءِ شائد کریسہ اسہ ایلو نامننگ نا قول کریسر ولے اینو نورا تنیا ئس، مہرو اوڑتون اوار اَلو۔ نورا شکائست آتون طوبے کن اُروک ئس۔ رہی آن تدوکا دیر خل تیتون لگیسہ بولان اٹ چُھپی تون معصوم ءُ مُون تننگ اس ئس۔ تؤ وارس قطب نا پارہ غان بریسہ جِر و بوچ آتا خوْش آ گند ءِ ایسکہ و وارس ایلو پارہ غان بریسہ نورا نا بدن تون لگیسہ مہر نا خوْش آ گند ءِ تالان کریکہ۔ نورا خوْش آ گند آتیتون بولان اٹ تولوک مارگٹ نا مَش ءِ اوننگ ئس۔ مَش ئنا پد آن طوبے بولان ءِ روشنائی بشخنگ کن بے جارات ئس۔

نورا جتائی نا داستان تون مہرو نا یات آتیٹ بے گواہ ئس۔ اسہ سال اس مُست مہر آن پُر آ ساہت آک اسٹ اسٹ آاونا مونان گدرینگ ئسرہ۔ ہمو ساہت آک ہراتم مہرو نورا نا کوپہ غا کاٹم ءِ تخوک تینا مہر ءِ بولان نا شابیتی تون ہمگرنچ گمان کریسہ تینا عشق ءِ بولان کن کہوک آتا جنون تون اسٹ کننگ ئس۔

نورا ہمو ندارہ ءِ امر بے خیال کننگ کیک ہراتم بولان اٹ چانڑدئی نا طوبے پاش کے و مہرو اونا کوپہ غاتیا کاٹم تخوک مہر و عشق ئنا درشانی ءِ کننگ آ مرے۔

او یات آتیان آزات مسکہ گڑا دڑد اس اودے پلویڑ کریکہ۔ بولان تون چرکاؤ خلیسہ تیوہ غا ہیت آتے کننگ نا اونا اُست خوائسکہ۔ او چانڑدئی نا طوبے نا بے جاراتی تون کسر اُروک ئس۔ طوبے نا مونا نورانا بولان تون گپ و تران مروئی ئس۔ ہمو سوغند آتا ہیت آتے کروئی ئس ہرا نورا و مہرو نا نیامٹ اندا جاگہ غا مسوسُر۔

نورادنکہ بھاز آ سال آتیان خاچتویسُس۔ اونا خن تیٹ تُغ اَلو۔ اندن دنکہ تیوہ غا کائنات نا پند ءِ خلیسہ دمد درینگانے۔ او تینا گُڈیکو مِزل آ سر مریسہ قانود، قدرت، کائنات، خدا تون ہمکلام مننگ خوائسکہ۔ او تینا سوج آتا ورندی خوائسکہ۔

نورا نا سوج آک اندن سادہ ئسر۔ بیرہ جتائی نا اَلورہ۔ بولان ناسوغند و چانڑدئی نا طوبے نا شاہدی عشق و مہر نا دا داستان ءِ شابیتی اس بشخنگ ئس۔ بولان نا قانود تفوک اس دا داستان تون۔ دا بولان مُدام سلامتی ئس بولان نا تاریخ ، تہذیب، قانود ناوخت ئسے آن سلامتی ئس۔ یخیناً دا تیوہ غاتیان معلومدار مننگ کن قانود تون اواری المّی ئس۔

اندا سوب آن مدام آ روشنائی، خوْش آ گند آتیتون آ تؤءُ وہوکا دیر نا باگل نورا ءِ تغ ئنا خمب اٹ دننگ نا کوشست اٹ ئسر۔ قانود نورا ءِ تینتون اوار کریسہ اونا سوج آتا ورندی ءِ تننگ خوائسکہ۔

داڑے نورا نا خنک تَر مسر ایڑے بولان تینا تیوہ غا شابیتی تون تینا مہر، تینا مابت آتیتون اونا مونا بس تُوس۔۔۔تاریخ تینا پنہ غاتے ملوک نورا تون بولان نا عظمت ءِ بیان کریسہ اونا سوج آتا ورندی ءِ تننگے بناء کرے۔

بدن ءِ ڈھکنگ نا شعور آن اورک لوچ آ بندغ آتیانہ ہلیس تہذیب نا بڑز کردار آ تاریخ ءِ نوشتہ کروکا انسان آتے اسکان نا ‘کاروان آک نورا نا مونا ئسر۔

فطرت نا رنگ آتیتون رنگ آتے اوار کروکا پِر تیان ہلیس بولان نا اُزبہ اُزبہ ءِ خوْش ءُ گند اس بشخوکا تؤک، بولان نا بدن آن ودی مروکا تہذیب آتا، مہر نا داستان و عشق اٹ کہوک آتا حوال ءِ بنفنگ ءِ بناء کرے۔

نورا خنا کہ تاریخ نا اولیکو لوچ آ بندغ بولان نا مَش تیا چشمہ و وادی تیٹ زند ئنا زیبائی تیتون خوْش ئس ہراڑے بندغی شعور تینا بناء اٹ بؤشی آن تہذیب نا پارہ غا پند اٹ مہر ءُ عشق ءِ تینائی کریسُس۔ او بولان ءِ ہند کریسہ قانود تون موْن تننگ ئس۔

تاریخ نا پنہ ایمون مس گڑا عظیم آ مہر گڑھ نا مہروان آدراوڑ بندغاک تہذیب نا گچینی تون جہان کن تاریخ جوڑ کریسہ خننگار۔ نورا خنا کہ فطرت آ زوراک مہر گڑھ نا بندغاک ہچو خدا یا مافوق الفطرت ہستی ئسے نا مونا کاٹم ءِ شیف کننگ نا جاگہ غا بانسری نا توار آ چھاپ ئتون ئسر۔ بولان نا عشق و مہر اوفتے فطرت آ داخہ در زوراک کریسُس کہ اوفک دے ئنا عبادت ءِ کننگ نا جاگہ غا اونا قانودی گچینی تیان کاریم ہلیسہ تینا ساڑی مننگ ءِ الّمی کننگ ئسر۔ طوبے نا پرستش آخہ بلکن طوبے نا مہر ءِ تینا کریسہ شبل ئتون خننگار۔۔۔تہذیب نا بالاد دا ئس کہ مہر گڑھ نا بندغاک سلاء جوڑ کریسہ جنگ اٹ اسٹ ایلو آ زوراکی کننگ نا جاگہغا بانسری دوتیٹ ارفوک ساز و زیمل آ چھاپ کریسہ اسٹ ایلو ءِ خمب اٹ کننگ آ خننگار۔ مہر گڑھ نا نازو چاگڑد اٹ غیرت نا پِن آ ندر ءُ دود آ گواچی مننگ نا جاگہ گا بُٹ ئسے آ تولوک تینا نورا نا کوپہ آ کاٹم تخوک طوبے نا مونا مہر و عشق ءِ بیان کننگ آ خننگا۔

تاریخ پالو ءِ بدل کرے گڑا آریا تہذیب نا جلہو نا مونا اندا مہر گڑھ نا بندغاک بولان نا خمب اٹ باہوٹ ہلوک تینا دھرتی نا عشق اٹ ایسر مریسہ ، ندر مریسہ اونا رَک اکن خننگار۔

تاریخ اٹ ہراڑے قدرت آن کرامات دوئی کروکا صوفی تا دور بس گڑا ہموڑے نورا پیر غیب و بی بی نانی نا دروشم اٹ عظیم آ صوفی تے بولان نا عشق اٹ بے سُد خنا۔

نورا راستیکو پارہ غا سیل کرے گڑا او کماش سفر خان ءِ خیری آ بارن ءُ اِرغ اس تفوک کوپہ غا توفک ٹنگوک نود گوار آن سارو ءُ بزگر گٹ آن کوہ ماران نا بڑزی تیا دھرتی نا عشق اٹ باگل پاریسہ گشت کریسہ خنا۔

نورا خن تے تر کرے ملا تو اندا ڑتون بولان اٹ شَلوکا پِر ءِ شے مرید ءُ حانی نا شپاد آ نَت تا رندے آتے دروت ہلیسہ خنا۔

نورا بولان نا رنگ آتیٹ بے گواہ ئس کہ میل* خوافوک پلیا نا جنگ نا ہنین آ توار اودے تینا پارہ غا توار کرے، ہرا میل*تا چڑینگ آتیتون اوار مریسہ زیبدارو باگل مریسہ ہرپارہ غا تالان مننگ ئسر۔

نورا بولان نا ہر رنگ، ہر کڑدار اٹ تینا مہرو، تینا عشق، تینا کسہ ءِ خنا دنکہ او دا تیوہ غاتیان چاہندار ئس، دنکہ او ہر دور اٹ دا کڑدار آتیٹ زندہ مسونے۔ دنکہ ہر کڑدار اوڑان مریسہ گدرینگانے۔ دا بولان ناقانود ءِ ہرا تینے ٹی عشق، مہر ءُ جنون تخک۔ ہراڑے کڑدار آک اودیم مریسہ بولان نا فطرت نا بشخ مریرہ۔ اوفتا عشق بولان جوڑ مریک، اوفتا کڑدارک مہر تون اوار مریرہ۔

نورا بولان نا عشق و مہر آن پُر آ تاریخ ناپلویڑ آن پیشن متویسُس کہ ہرک نا بغل اٹ بٹوکا موْن آ گدان آتیان اسٹ ئسے نا توار اودے سٹفے۔۔۔ نورا خنا کہ مہرو تینا گدان آن پیشن مریسہ گد ئنا پَلو ءِ دنتان تیٹ گٹ ہلوک بشخندہ ءِ۔۔۔ نورا بے سُد تینا مہرو نا پارہ غا درک کرے انداڑتون اونا تُغ پنا۔ ہر پارہ غا چُھپی تالان ئس دنکہ اسہ طوفان ئسے آن گڈ چُھپی تالان مرے۔دے ئنا روشنائی بولان اٹ تارمئی تے ایسر کریسُس۔ نورا منہ ساہت چُھپ تولوک مس، او بولان ءِ سیل کریسہ کرے، بولان مہرو آنبار بشخندہ کننگ ئس۔

نورا چَپیکو پارہ غا وہوکا دیر نا پارہ غا اُرا گڑا او درخت آتا پَن آتے دیر نا زی آ وہنگ آ خنا ہرا تینے تیوہ دیر نا دُو اٹ تریسہ اونا وہنگ تون شبل ئتون ئسر۔ نورا عشق ءِ سرپد مسوسُس۔ او بولان نا ہر رنگ اٹ مہرو ءُ ہر پارہ غا عشق ءِ خننگ ئس۔

دی بلوچستان پوسٹ : دا نوشت اٹ ساڑی ہیت و خیال آک نوشتوک نا جند ئنا ءُ، دی بلوچستان میڈیا نیٹ ورک نا دا ہیت آتے مننگ الّمی اَف و نئے کن دا ادارہ نا پالیسی تا درشانی ءِ کیک.