ضلع کیچ میں پاکستانی فورسز نے گذشتہ شب چھاپہ مارکر دو طالب علموں کو حراست میں لینے کے بعد نامعلوم مقام منتقل کردیا ہے۔
دونوں طالب علموں کو تربت کے علاقے ڈاکی بازار، آبسر سے حراست میں لیا گیا ہے دونوں کی شناخت سرفراز ولد ایوب اور یوسف ولد پٹھان کے ناموں سے ہوئی ہیں۔
علاقائی ذرائع کے مطابق رات گئے تین بجے فورسز نے چھاپہ مارکر دونوں طالب علموں کو جبری گمشدگی کا نشانہ بنایا ہے۔
خیال رہے کہ بلوچستان بھر سے روزانہ کی بنیاد پر جبری گمشدگی کے کیسز رپورٹ ہورہے ہیں۔ رواں ہفتے بلوچستان کے مختلف علاقوں سے کیسز رپورٹ ہوئے ہیں جہاں سے فورسز نے لوگوں کو جبری گمشدگی کا نشانہ بنایا ہے۔
