افغانستان گرین ٹرینڈ کے چیئرمین اور سابق نائب صدر امراللہ صالح نے کہا ہے کہ بلوچستان میں تحریک درمیانے درجے کی شدت پر ہے، جبکہ خیبر پختونخوا میں یہ ایک اعلیٰ درجے تک پہنچ چکی ہے، ظاہر ہوتا ہے کہ دونوں صوبوں میں پاکستان نے سیاسی حمایت کھو دی ہے اور صورتحال کو مستحکم کرنے کے لیے طاقت کا سہارا لے رہا ہے۔
انہوں نے کہاکہ ایسے تنازعات کی تاریخ کی بنیاد پر، جس میں پاکستان کافی ماہر اور تجربہ کار ہے، یہ باغیانہ تحریکیں جیتی نہیں جا سکتی ہیں کیونکہ اس کے کئی داخلی اور خارجی عوامل ہیں۔
انہوں نے کہاکہ ڈیورنڈ لائن کو جان بوجھ کر سب سے زیادہ رسائی والا بارڈر بنایا گیا تاکہ کابل کو غیر مستحکم کیا جا سکے اور ایک پسندیدہ نظام قائم کیا جا سکے، جو پاکستان کے زیر اثر ہو۔ خیبر پختونخوا اور بلوچستان کے زخم ممکنہ طور پر طویل عرصے تک خون بہاتے رہیں گے۔ چاہے انہیں کسی بھی نام سے پکارا جائے، یہ علیحدگی پسند تحریکیں ہیں جن کی کئی پرتیں ہیں۔ ایماندارانہ تجزیہ ہمیشہ تلخ ہوتا ہے اور میں جانتا ہوں کہ یہ GHQ کے جذبات کو تکلیف دے گا۔
