بلوچستان کے ضلع زیارت میں حالیہ دنوں سی ٹی ڈی نے سات افراد کو ہلاک کرنے کا دعویٰ کیا تھا، جن میں سے ایک کی شناخت ایک لاپتہ فرد کے طور پر ہوئی ہے۔
وائس فار بلوچ مسنگ پرسنز نے ایک مختصر بیان میں کہا ہے کہ فورسز نے چوتیر سنجاوی میں سات افراد کو ہلاک کرنے کا دعویٰ کیا تھا۔ ان میں سے ایک شخص کی شناخت گل محمد مری ولد غلام نبی کے طور پر ہوئی ہے، جنہیں 20 دسمبر 2024 کو فورسز نے سنجاوی سے جبری طور پر لاپتہ کیا تھا۔
تنظیم کے مطابق، گل محمد مری کی جبری گمشدگی کی تفصیلات ان کے لواحقین نے فراہم کی تھیں، اور ان کا کیس لاپتہ افراد کے کمیشن میں بھی درج ہے۔
واضح رہے کہ پاکستانی فورسز پر جبری لاپتہ افراد کو جعلی مقابلوں میں قتل کرنے کا سلسلہ جاری ہے۔ گزشتہ ماہ دُکی میں بھی ایک مبینہ جعلی مقابلے میں پانچ افراد کو ہلاک کیا گیا تھا۔
یاد رہے کہ ان لاشوں کی برآمدگی کے بعد مقامی لوگوں نے سی ٹی ڈی کے دعوے کو مسترد کرتے ہوئے کہا تھا کہ علاقے میں کوئی مقابلہ نہیں ہوا، بلکہ فورسز نے لاشیں پھینک کر انہیں مقابلے کا رنگ دیا ہے۔
