پاکستانی فوج کا کہنا ہے کہ بلوچستان کے علاقے پشین میں کارروائی کے دوران ایک مبینہ خودکش بمبار نے خود کو دھماکے سے اڑا لیا جبکہ چار دیگر شدت پسندوں کو ہلاک کر دیا گیا ہے۔
پاکستانی فوج کے شعبہ تعلقاتِ عامہ آئی ایس پی آر کی جانب سے سوموار کے روز جاری ایک بیان میں کہا گیا ہے کہ 22 فروری کو سکیورٹی فورسز نے ضلع پشین میں شدت پسندوں کی موجودگی کی اطلاع پر ایک آپریشن کیا۔
بیان میں دعویٰ کیا گیا ہے کہ ’آپریشن کے دوران، شدید فائرنگ کے تبادلے کے بعد خودکش بمبار نے خود کو دھماکے سے اڑا لیا‘۔ آئی ایس پی آر کا مزید کہنا ہے کہ سکیورٹی فورسز نے چار دیگر مسلح افراد کا تعاقب کر کے انھیں ہلاک کردیا۔
آئی ایس پی آر کے مطابق، ہلاک ہونے والے مبینہ شدت پسندوں کے قبضے سے اسلحہ، گولہ بارود اور دھماکہ خیز مواد بھی برآمد ہوا۔
