گرین لینڈ کے وزیراعظم جینس فریڈرک نیلسن نے کہا ہے کہ اگر ان کے عوام کو ’فی الفور‘ یہ کہا جائے کو وہ کسی مُلک کا انتخاب کریں تو وہ امریکہ کی بجائے ڈنمارک کو ترجیح دیں گے۔
گرین لینڈ کے وزیراعظم جینس فریڈرک نیلسن نے یہ بیان حال ہی میں ڈنمارک کی وزیراعظم میتے فریڈرکسن کے ساتھ ایک مشترکہ پریس کانفرنس میں دیا، جسے اُن کی جانب سے اب تک کا سب سے سخت اور واضح ردعمل قرار دیا جا رہا ہے۔
یہ اعلان ایک ایسے وقت میں سامنے آیا ہے جب امریکی صدر ڈونلڈ ٹرمپ نے ایک بار پھر گرین لینڈ کو حاصل کرنے کی تجویز پیش کی ہے۔ ٹرمپ کا کہنا ہے کہ روس اور چین کے خطرات سے بچاؤ کے لیے امریکہ کا گرین لینڈ پر ’مالکانا حق‘ ضروری ہے۔ وائٹ ہاؤس نے جزیرے کو خریدنے کی تجویز دی ہے، تاہم اسے اپنے ساتھ شامل کرنے کے لیے طاقت کے استعمال کے امکان کو بھی رد نہیں کیا۔
بعد ازاں منگل کو جب صدر ٹرمپ سے نیلسن کے اس بیان پر سوال کیا گیا تو انھوں نے کہا کہ ’یہ ان کا مسئلہ ہے میں ان سے متفق نہیں ہوں۔۔۔ یہ ان کے لیے ایک بڑا مسئلہ بننے والا ہے۔‘
گرین لینڈ ڈنمارک کا نیم خودمختار علاقہ ہے اور اس کی اپنی حکومت موجود ہے۔ دوسری جانب ڈنمارک نیٹو کا رکن ملک ہے اور وزیراعظم میتے فریڈرکسن نے خبردار کیا ہے کہ اگر فوجی طاقت استعمال کی گئی تو یہ ٹرانس اٹلانٹک دفاعی اتحاد کے خاتمے کی علامت ہوگی۔
شمالی امریکہ اور آرکٹک کے درمیان واقع گرین لینڈ کی جغرافیائی حیثیت اسے میزائل حملوں کی صورت میں ابتدائی وارننگ نظام کے لیے نہایت اہم بناتی ہے، جبکہ بحری جہازوں کی نگرانی کے اعتبار سے بھی اس کی اسٹریٹجک اہمیت مسلم ہے۔
