بلوچستان کے دو مختلف اضلاع میں پاکستانی فورسز پر حملوں میں فورسز اہلکاروں کی جانی نقصان اور زخمی ہونے کی اطلاعات موصول ہوئی ہیں۔
ضلع کیچ کے علاقے تمپ نذرآباد میں زبیدہ جلال مین روڈ پر دھماکوں اور فائرنگ کی آوازیں سنی گئیں۔
ذرائع کے مطابق فائرنگ فوج کی لائٹ کمانڈو بٹالین کے قافلے پر کی گئی، جو فوجی آپریشن کی غرض سے جنوبی پہاڑی علاقوں کی جانب روانہ تھا۔
سرکاری ذرائع کا کہنا ہے کہ حملہ آوروں نے پہاڑی علاقے سے قافلے کو نشانہ بنایا، جس کے بعد تمپ سے فرنٹیئر کور (ایف سی) کا ایک قافلہ امدادی کارروائی کے لیے جائے وقوعہ کی جانب روانہ کردیا گیا۔
ابتدائی اطلاعات کے مطابق حملے میں دو اہلکار زخمی ہوئے ہیں، جبکہ واقعے کے بعد علاقے میں سیکیورٹی سخت کر دی گئی ہے۔
واضح رہے کہ مذکورہ علاقے میں گزشتہ روز سے مسلح افراد کی موجودگی کی اطلاعات تھیں، جہاں انہوں نے مختلف مقامات پر ناکہ بندیاں قائم کرتے ہوئے اسنیپ چیکنگ کی اور ایک مواصلاتی ٹاور کو تباہ کردیا تھا۔
مسلح افراد اس دوران دو گاڑیوں کو بھی قبضے میں لے کر اپنے ہمراہ لے گئے تھے۔
ادھر بلوچستان کے ضلع آواران کے علاقے پیراندر میں پاکستانی فورسز کو آئی ای ڈی دھماکے میں نشانہ بنایا جس میں پاکستانی فورسز کے تین اہلکار نائیک دین محمد، سپاہی عرفان اور عدنان ہلاک جبکہ لانس نائیک یونس شدید زخمی ہوا ہے۔
