پنجگور میں مغرب کے وقت شروع ہونے والی جھڑپ کئی گھنٹوں تک جاری رہی، جبکہ پاکستانی فورسز کے جانی و مالی نقصانات کی اطلاعات موصول ہوئی ہیں۔
تفصیلات کے مطابق بلوچستان کے ضلع پنجگور سے ملنے والی اطلاعات کہ مطابق مسلح افراد نے گرمکان میں قائم پاکستانی فورسز کے کیمپ کو حملے کا نشانہ بنایا۔
ذرائع کے مطابق جھڑپ کے دوران کمک کے لیے آنے والے پاکستانی فورسز کے قافلے پر بھی مسلح افراد نے گھات لگا کر حملہ کیا، جبکہ علاقے میں طویل وقت تک فائرنگ اور دھماکوں کی آوازیں گونجتی رہیں۔
کیمپ اور قافلے پر کیے گئے حملوں میں پاکستانی فورسز کو جانی اور مالی نقصانات پہنچنے کی اطلاعات موصول ہوئی ہیں۔
واضح رہے کہ گزشتہ ایک دن کے دوران بلوچستان کے مختلف اضلاع جن میں قلات، کوئٹہ, کیچ، چاغی اور پنجگور شامل ہیں، میں 23 سے زائد حملوں میں پاکستانی فورسز، پولیس، سرکاری تنصیبات اور ریلوے ٹریک کو نشانہ بنایا گیا ہے، جبکہ مسلح افراد نے کوئٹہ اور ایران باڈر جانے والے راستوں پر بھی ناکہ بندیاں قائم کیں۔
چاغی میں مسلح حملہ آوروں نے پاکستانی فورسز کے مرکزی کیمپ کو خودکش حملے کا نشانہ بنایا، جہاں تاحال جھڑپوں کی اطلاعات موصول ہورہی ہیں۔
چاغی سمیت مختلف علاقوں میں ہونے والے حملوں کی ذمہ داری بلوچ آزادی پسند مسلح تنظیموں نے قبول کی ہے، تاہم پنجگور میں ہونے والے حملے کی ذمہ داری تاحال کسی گروپ نے قبول نہیں کی۔
گزشتہ چوبیس گھنٹوں کے دوران ہونے والے حملوں میں سے متعدد واقعات کی تصدیق پاکستانی فورسز کے حکام بھی کر چکے ہیں، جبکہ حکام نے تاحال چاغی حملے میں چھ اہلکاروں کی ہلاکت کی تصدیق کی ہے۔
