عالمی یومِ انسانی حقوق کے مناسبت
سے بلوچ یکجہتی کمیٹی کے رہنما سمی دین بلوچ نے کہا ہے کہ بلوچستان آج سب سے سنگین انسانی حقوق کے بحران کا سامنا کر رہا ہے۔ دہائیوں تک جاری رہنے والے منظم تشدد، خوف اور ظلم نے بلوچستان کے عوام پر گہرا نفسیاتی، سماجی اور سیاسی زخم چھوڑا ہے۔ بلوچستان کے عوام کی مشکلات کو بین الاقوامی برادری اور وہ تنظیمیں جو خود کو انسانی حقوق کے علمبردار کہتی ہیں، بڑے پیمانے پر نظر انداز کر رہی ہیں۔
انہوں نے کہا کہ بی وائی سی کے انسانی حقوق کے شعبے کے مطابق، جبری گمشدگیاں خطرناک حد تک پہنچ چکی ہیں، اور اس سال ہی 1,080 کیسز رپورٹ ہوئے ہیں، جن میں 53 نابالغ شامل ہیں۔ تشویشناک بات یہ ہے کہ پاکستانی حکام اب خواتین اور لڑکیوں کو بھی نشانہ بنا رہے ہیں؛ 2025 میں 12 لڑکیاں جبری طور پر لاپتہ ہوئیں، جن میں سے تین اب تک لاپتہ ہیں، اور 189 غیر قانونی ہلاکتیں رپورٹ ہوئیں، جن میں چھ خواتین شامل ہیں۔ پاکستانی فوجی کارروائیاں، ڈرون حملے، مارٹر گولہ باری، توپ خانے کی فائرنگ اور دیگر حملے بلوچستان میں روزمرہ کا معمول بن چکے ہیں، جس کے نتیجے میں پورے دیہات اور چھوٹے قصبے بے گھر ہو گئے ہیں۔
انہوں نے اس بات پر زور دیا کہ انسانی حقوق کے کارکن مظلوم عوام کے لیے امید کی کرن ہیں۔ لیکن بلوچستان میں انسانی حقوق کے علمبرداروں کو دھمکیاں دی جاتی ہیں، انہیں فرضی مقدمات میں گرفتار کیا جاتا ہے، اور سینکڑوں طلبہ و اساتذہ پر پرامن سرگرمیوں کے لیے جھوٹے الزامات اور ایف آئی آرز درج کیے جاتے ہیں۔ رائے اور اظہار کی آزادی کو جرم سمجھا جاتا ہے۔ اس خطے کو میڈیا بلیک آؤٹ میں دھکیل دیا گیا ہے، جہاں صحافی ریاستی ظلم و تشدد کے بارے میں رپورٹنگ اور حقائق افشاء کرنے پر خاموش اور ہراساں کیے جا رہے ہیں
