سابقہ وزیر اعلیٰ نے کہا ہے کہ بلوچستان کے مسئلے کا حل فوجی طاقت نہیں لاپتہ افراد کی بازیابی ہے۔
سابق وزیر اعلیٰ بلوچستان نواب محمد اسلم خان رئیسانی نے ایک نجی ٹی وی سے گفتگو میں کہا ہے کہ بلوچستان میں جاری تحریک محض آپریشن سے ختم نہیں ہوگی حکمران ہمیشہ دعوی کرتے ہیں کہ دہشت گردی ختم کریں گے، سب کچھ قابو میں ہوگا، مگر زمینی حقائق اس کے برعکس ہیں۔
نواب اسلم رئیسانی نے کہا کہ ان کا دل نوجوان سپاہیوں کے لیے بھی دکھتا ہے جو ڈیوٹی پر اپنی جانیں دیتے ہیں، مگر اس سے بڑھ کر ان کا دکھ لاپتہ افراد کے لواحقین کے ساتھ ہے۔
انہوں نے کہا کہ بلوچستان میں ہزاروں لوگ لاپتہ کردئے گئے ہیں مگر یہ واضح نہیں کہ انہیں کون لے گیا، کہاں لے جایا گیا اور ان کا انجام کیا ہوا۔
انہوں نے کہا کہ اگر حکومتِ پاکستان کہتی ہے کہ لاپتہ افراد اس کی تحویل میں نہیں تو پھر اسے ثبوت کے ساتھ یہ بات ثابت کرنا ہوگی۔
اسلم رئیسانی نے زور دیتے ہوئے کہا کہ سیاسی کارکنوں نے قومی حقوق کے لیے پرامن جدوجہد کی ہے، اس لیے لاپتہ افراد کے معاملے میں شفافیت اور حقائق سامنے لانا وقت کی اہم ضرورت ہے۔
